8 bilan ni mai, di xã Phước Thành, huyện Bác Ái oh hu mbang hajan khang halei. Phun pala dalam bilan Đông Xuân di xã ni dok khut trak kayua kurang ia. Karja xã brei thau, dom boh sang ginup, meda daok hu brah mbang dalam dom bilan anak tal, dok dom boh sang kan song jiak si kan kathaot daok caong hu brah dong eik lipa di Rajaei.

Dang anak bruk ini, langiu di bruk daong tani tanat rai duik ka mik va, huyện Bác Ái samar taduan mek brah dong di Rajaei song samar parabha ka bhap bini tui jalan lac oh caik ka boh sang halei eik lipa. Labaih 100 tấn brah hu dong ka huyện Bác Ái piah brei ka boh saang kan kathaot song boh sang jiak si kan kathaot dok ngak nong njauk khat lihik kayua pandiak bhang. Saai Pi Năng Thị Tuyết – dok di xã Phước Thành, huyện Bác Ái – tỉnh Ninh Thuận bahrau taduan hu brah ndom lac:

Thun ni mik va ngak mbang biak kan kandah, meng hu Karja daong brah, mik va uan tabuan hu karja dong brei thau dar phol biak rilo.

Hadei di tuk taduan brah meng Gilang khik piah karja bhum Nam Trung Bộ, UB bhap bini huyện Bác Ái samar ngak danh sách dom boh sang kan kandah, oh klak boh sang halei. Ong Mẫu Thái Phương- Akaok UB bhap bini huyện Bác Ái, tỉnh Ninh Thuận brei thau :

“Hadei di tuk taduan brah, UB bhap bini huyện Bác Ái tacei pato dom gah pambuak bruk song dom xã pataom tame bruk brei tal tangin ka bhap bini, thau cambaih boh sang kan kathaot, boh sang jiak si kan kathaot song boh sang khat lihik dalam mbang ni, Vụ Đông Xuân oh pala drak hu. Khol hulin tacei pato brei brah ka njauk menuac, oh caik ka mik va eik lipa.

Dalam mbang pandiak bhang meng bloh, huyện Bác Ái njauk khat lihik labaih 500 ha phun pala dom janih kayua pandiak bhang. Ni lac khat lihik prong ngan saong huyện bhum ceik dok rilo kan kandah ni. Tui jalan ngak lac oh caik ka boh sang halei eik lipa, oh boh sang halei kurang ia pandar, Karja huyện Bác Ái, tỉnh Ninh Thuận dok kham merat parabha brah song ieu pataom dom radaih, dom phương tiện pabak ia pandar ka bhap bini. Tapa nan dong ka mik va tani tanat rai duik./.