Urang hu angan je dalam palei Cam Baoh Dhang halain hatain jak ba bhap bini ngak siam dom adat pacang caga jit

Palei Baoh Dhang, xã Phước Thuận lac palei camreip abih hu huyện Ninh Phước, tỉnh Ninh Thuận pilih ruah ngak iek “bhum hijao” di bhum urang Cam. Tukvak tapa, palei Baoh Dhang hu labaih 100 urang ngak bruk di dom tỉnh Bình Dương, Đồng Nai saong ban raya HCM mai veik palei, meng ngak siam bruk duah thau, pasang iek urang daok karei di sang, nan ye tal urak ni dalam palei Baoh Dhang oh hu urang halei njom COVID-19 dalam rahra. Piah padang “bhum hijao” salamat dalam pacang caga jit, palei Baoh Dhang hu padang bilai pasang iek di dom jalan tame, tabiak palei. Dom menuac palei karei caong tame dalam “bhum hijao” njauk pathau khan y te, brei hu harak gar saong brei hu bruk hagait. Ong Dương Tấn Kiểm, Bí thư Chi bộ palei Baoh Dhang, xã Phước Thuận, huyện Ninh Phước, t.Ninh Thuận brei thau: “Pakat ủy, Rajaei saong mBan pato jalan pacang caga jit COVID-19 xã Phước Thuận pilih padang bhum hijao salamat ka palei...”

Lac akaok mban ngak bruk mặt trận di palei Baoh Dhang, ong Não Thiên hu nao tal yaok sang dom halau janeng Cam Ahier saong dom urang hu angan je dalam palei piah pathau khan, jak ba bhap bini ngak catang tui dom panuac kakei, dom adat di karja dalam bruk pacang caga jit COVID-19. Abih di nyu nan lac oh pataom rilo manuac, sang halei daok di sang nan, plaih ngak ka jit ruak njom mbak. Ong Não Thiên, akaok mban ngak bruk mặt trận palei Baoh Dhang ndem lac: “Piah khik khang kajap bhum hijao, dahlak dang tapak nao tal dom sư cả, urang hu angan je piah puac naih gam sa tangin jak ba bhap bini…”

Lac urang hu angan je dalam palei Cam Baoh Dhang, dom harei tapa, oh lac halain hatain jak ba bhap bini ngak siam dom adat pacang caga jit, ong Thuận Ngọc Liêm daok halain hatain khik iek bilai gam haong dom kapul,  meng hatai saneng lac dom bilai pasang iek oh lac daong khik ka rup drei, gauk gar bo daok khik ka rahra. Ong Liêm caong maong lac bruk ngak ini hu peih praong piah ka dom palei Cam karei jeng hu dom “bhum hijao” salamat: “Dalam palei padang ngak bhum hijao, dahlak biak uan tabuan, jak ba dalam sang khik hacih saat.”

Bhap bini palei Cam Baoh Dhang chreih chrai kayua “bhum hijao” hu salamat, abih tih hu khik biak catang. Meng ilamu dalam bruk pacang caga jit COVID-19 dalam tukvak tapa, huyện Ninh Phước meda peih praong “bhum hijao” salamat ka taong abih palei Cam di dalam huyện. Ong Bạch Văn Nguyên, akaok UBND huyện Ninh Phước, tỉnh Ninh Thuận brei thau: “Sa jalan ngak bo khol dahlak daok brei ngak biak catang lac padang “bhum hijao” di bhum palei Cam. Tui nan, pilih ruah dom palei Cam piah ngak iek, hadei di nan peih praong tabiak 20 palei Cam. Tui ilamu siam mekre meng kan di bhap bini, khol dahlak pathau khan, jak ba dalam but pajaih, cak rok patagok bruk ngak di urang hu angan je, abih di nyu nan lac tapa dom urang ilamu Cam, patagok hu dom siam lagaih di jalan diuk rai jum pataom gauk di bhum bhap bini Cam.”

Tui jalan ngak lac “khik kajap, pasang iek catang”, yaok rahra di dom palei Cam dalam huyện Ninh Phước, tỉnh Ninh Thuận tuk halei jeng thau ngak njauk dom adat pacang caga jit ruak, sa hatung hatain haong gauk daong khik bhum hijao./.

Urang lang: Thu Thao – 15/09