Jak ba dom baoh sang hu mbaok tame, peih prong bruk buh jien tame dom bruk ngak mbang duah jien

Tỉnh Ninh Thuận hu mblang taneh glai saong taneh quy hoạch patagok glai labaih 204 ribau ha (dalam nan hu labaih 155 ribau ha hu glai). Thun 2020, dalam tỉnh Ninh Thuận hu pala bahrau jaik 843 ha glai, dalam nan hu 530 ha glai pacang caga, 312 ha glai salih bahrau, 0,5 ha glai pasiam veik; mong iek mblang taneh glai pala dalam dom danak dak cak rok patagok bruk ngak glai khang kajap labaih 1.294 ha; raong pala pasiam veik glai tamo 3.027 ha.

Gam haong nan, tỉnh daok jhul pakang bruk jao brei glai piah mong iek tui Sarak ka 75 harei 9-9-2015 di raja-ei, hu labaih 66.587 ha, kuhria rah tapa yaok baoh sang taduan khik iek 30 ha yaom 12 triệu đồng sa thun. Tỉnh hu caik tabiak phun jien blei brah daong ka yaok ribau baoh sang hu mbaok tame bruk pala glai pasiam veik angaok hamu apuh dalam dom bilan daok cang paik, yuak piah sahanag hatai khik iek glai. Meng dom jalan khik caga, cak rok patagok glai, mboh lac glai dalam tỉnh dak harei dak siam tagok, rilo glai oh siam urak ini daok tamuh siam veik, trữ lượng dak harei dak patagok, paglaong bruk me-om pacang glai thun 2020 tagok 46,8%. Glai tamo di Ninh Thuận jeng daok hu pasang iek biak catang, oh caik rah tabiak labik pandiak jah tak glai. Di dom labik glai kan tamuh siam hu, Ninh Thuận meng brei salih bruk pandar taneh glai. Dom danak dak tỉnh caong salih bruk pandar glai jeng lac dom danak dak biak prong duh ka raidiuk di bol bhap rah ra, an ninh năng lượng saong cak rok patagok kinh tế - xã hội di dom puk palei.

Piah paglaong kein laba bruk cak rok patagok glai, anak tal, tỉnh Ninh Thuận daok pathau khan, pato pakai adat hukum ka pasang iek, khik caga saong cak rok patagok glai; jhul khang bruk pala glai salih bahrau, glai pacang caga, pala glai ngak pandap di salabik praong. Patagok bruk pambuak gauk dalam tui iek, khik caga glai di dom gah, abih di nyu lac di gah khik iek glai, tapon nyaom bol pan phao krong, karja palei haong dom baoh sang, bol bhap rah ra daok tapen glai. Gam haong nan, tỉnh daok jhul khang bruk jak ba, pablak tame dom bruk daong cak rok patagok bruk ngak glai; jak ba dom baoh sang hu mbaok tame, peih prong bruk buh jien tame dom bruk ngak mbang duah jien, dalam nan hu bruk ngak mbang praong, siam, ngak habar piah ka dom baoh sang hu mbaok tame bruk khik iek glai hu jien padai patak pataom, rai diuk mbang angui dak harei dak tani tanat, khang kajap saong oh  daok thei tame glai jah tak phun kayau, palai pajoa glai./.

Urang lang: Jasi – 21/12