Pandap meng kan hu pablei ka tuai mai rivang main 

Dom harei puac thun, palei ngak lan am Hamu Traok daok kham merat ngak piah pabak tui harak pambuak bruk blei pandap tuk Tết Nguyên đán. Sa-ai Đàng Hải Phương – urang ngak lan di Hợp tác xã lan am Cam Hamu Craok brei thau, thun ini langiu di bruk ngak tui harak pambuak bruk yau: Bình phong thủy, rup patau Apsara, rup patau bimon kalan,… ye dom janih pandap lan am karei jeng hu railo tuai damuai dalam saong langiu negar thau tal, duah blei; ba jien tame oh takik ka xã viên:

"Pandap hu ngak tabiak hu rilo janih karei di gauk yau kadung bak, talei kaing..."

Tui hatai tuai damuai, meng thun 2002, urang palei lan hu dom salih bahrau dalam bruk ngak piah pabak hatai caong khin di darak pasar. Nan lac, langiu di bruk ngak dom pandap lan am meng kan ye rilo baoh sang urang Cam daok ngak tabiak dom janih pandap lan am mỹ nghệ. Amuk Đàng Thị Quạ, hu labaih meteh rai kak kajap haong bruk ngak lan am Hamu Craok brei thau:

"Bruk ngak lan am di khol hulin hu karja pak ni biak sangka... "

Oh lac tok hu palei ngak lan bo palei menyim jih dalah Cam Caklain tuk vak ini jeng daok jan van haong bruk ngak piah ginup pandap jao ka urang blei. Amuk Lưu Thị Em, urang dalam Hợp tác xã jih dalah Caklain brei thau, Tết nan lac tukvak urang mboh tangin blei pandap biak rilo, urak ini amuk daok  kham merat menyim, piah samu jao pandap ka urang blei. Min oh lac yau nan bo ngak ka hu ngak, kayua ini lac pandap ngak meng tangin brei ngak ka nyu tani tanat nan ye njauk caik hatai pataom tame ngak piah hu pandap panda njauk hatai takre:

"Khol dahlak hu pato menyim jih dalah ka anek kamuan pak ni..."

Dalam thun blaoh, kayua jit Covid-19 nan ye tuai damuai mai rivang iek dom palei ngak hu takik, ba tal jien mek tame di mikva jeng takik tui. Kayua yau nan ye, piah ka pandap palei ngak yam atah jang, dom sở ngành di Ninh Thuận hu peih ngak, tacei pato pablei pandap online, ba pandap menyim jih dalah tagok mạng internet.

Ong Phú Minh Thuần, Akaok Hợp tác xã lan am Cam Hamu Craok brei thau, bruk ba ilamu  công nghệ hu hợp tác xã peih ngak labaih 2 thun ini mai. Oh lac piah meyaih khan, ba dom pandap panda tagok internet bo dalam bruk pambuak gauk peih ngak jeng biak mbuan laghaih. Tui ong Thuần ye taong abih 46 xã viên thei jeng pandar smartphone. Tuk hu mẫu pandap bahrau ngak tui panuac caong khin di tuai damuai, tok payua tapa zalo ye dom xã viên ngak chip, oh cang pataom gauk veik piah khan brei thau.

Urak ini jit ruak daok tamuh veik di dom labik nan ye tuai mai palei ngak jeng takik, kayua yau nan ye, bruk meyaih khan pandap panda saong mboh tangin tame harak pambuak bruk pablei salih tok hu ngak tapa online. Urak ini, hợp tác xã hu pagam mạng internet oh hu talei dalam mblang bein parang pandap piah ba mbuan laghaih ka tuai damuai tuk mai rivang iek. Ong Phú Minh Thuần daok brei thau lac:

"Dom palei ngak meng kan hu yaih khan pandap panda di drei angaok mạng piah ka tuai damuai thau tal..." 

Meyah ngan saong palei ngak lan, bruk ba pandap panda tagok internet hu peih ngak meng lavik ye ngan haong urang palei menyim jih dalah Cam Caklain daok mboh bahrau bahrang. Amuk Lâm Nữ Minh, Phaok Akaok Hợp tác xã jih dalah Caklain brei thau, ini lac jalan ngak mbang bahrau min biak laghaih dalam tukvak jit ruak yau urak ini, nan ye amuk saong dom hội viên karei jeng kham merat bac megru:

"Cong khin karja pak ni biak sangka tal mik va bangsa takik siam jang piah rai duik mik va dak harei dak siam..."

Urak ini, jien mek tame di bhap bani 2 palei ngak meng kan lac: Lan am Hamu Craok saong palei menyim jih dalah Cam Caklain hu 44 triệu 500 rabau đồng sa thun. Dalam jalan ngak brei cak rok patagok palei ngak meng kan di urang Cam, huyện Ninh Phước daok pasiam veik bruk ngak di dom hợp tác xã palei ngak piah ba bruk ngak, patagok jien mek tame ka mikva. Ong Bạch Văn Nguyên, Phaok akaok UBND huyện Ninh Phước, tỉnh Ninh Thuận brei thau, huyen biak caik hatai tal bruk cak rok patagok palei ngak pambuak haong bruk rivang ma-in saong duah thau ka ilamo Cam:

"Meng 2 inem krung ilamo oh mboh di meta pambuak haong bruk rivang iek palei ngak saong rivang iek ilamo, jeng yau rivang ma-in gah sinh thái. Urak ini palei daok hu dom janih pandap daok hu tuai damuai biak sangka tal nan lac rivang ma-in danao caraih palei Caklain, abih di nyu lac rivang main  pambak tame inem krung di palei ngak lan Hamu Craok."

Dom janih pandap di dua palei ngak daok hu khik ramik saong cak rok patagok meng dom palak tangin gheih ngak di dom urang ngak. Min piah paglaong jien mek tame, patagok yaom pandap di palei ngak ye karja palei njauk daong ka mikva dom jalan ngak mbang pablei salih ka nyu laghaih. Tapa nan, hu rik daong paglaong jien mek tame ka dom baoh sang saong daok ngak brei pandap panda palei ngak yam atah jang tabiak grauk labik di dunya./.

Urang lang: Jasi -7/2