Oh peih ngak dom adat cambat meng kan di urang Cam dalam tukvak jit ruak daok tamuh khang

Lac akaok Mban adat cambat palei Thành Tín, xã Phước Hải, huyện Ninh Phước, anak bruk srau kadau di jit Covid-19, ong Châu Văn Thuê hu jhul khang bruk pathau khan brei bhap bani thau ka dom jalan pacang caga jit Covid 19. Harak pathau khan hu lang tapa sap Cam saong bhian puac angaok loa papar sap di palei nan ye bhap bani palei Thành Tín thei jeng thau cambaih dom jalan pacang caga jit ruak.

Ong Châu Văn Thuê, Akaok MBan adat cambat palei Thành Tín, xã Phước Hải, huyện Ninh Phước, Ninh Thuận, lac:  "mBan adat cambat hu ba tabiak sa harak gar jak ba bhap bini dalam palei ngak njauk bruk pacang caga jit Covid..."

Piah plaih pataom rilo manuac, MBan adat cambat palei Thành Tín pambuak haong Hội đồng sư cả Bà ni oh peih ngak dom adat cambat meng kan di urang Cam dalam tukvak jit ruak daok tamuh khang. Meng bruk hu mbaok di dom halau janeng dalam MBan adat cambat ngan haong jalan pathau khan katut panak, mbuan thau nan ye bhap bani hu thau ka jit ruak saong urang halei jeng ngak siam dom bruk pacang caga jit Covid-19 di palei.

Ong Kiều Ngọc Lương, Hội đồng sư cả Bà Ni tỉnh Ninh Thuận brei thau: "Piah khik siam makre ka puk palei, oh peih dom bruk ngak adat cambat viek tra…" 

Bruk diukrai pataom gauk hu jeng kadha siam gheih dalam rai diuk di bhap bani Cam meng kan mai. Min tuk jit ruak rah tabiak, bruk bhian randap ini njauk salih karei piah ka bhap bani juai pataom rilo manuac, takik taom gaok gauk piah pacang caga jit Covid-19. Urak ini dom gah chức năng, karja puk palei daok jhul pakhang bruk pathau khan, daong ka bhap bani salih bahrau bruk bhian randap, pacang caga jit Covid-19 ka nyu siam jang.  

Ong Trượng Lắc, Akaok mban khik ramik khu phố Mỹ Nghiệp, ban sit Phước Dân, huyện Ninh Phước, Ninh Thuận, brei thau:“Khol dahlak parabha hu 8 kapul, yaok kapul hu 3 urang ngak bruk pathau khan…” 

Ndom ka jalan ngak ba mai siam lagaih rilo, ong Phạm Văn Binh, Bí thư Huyện ủy Ninh Phước, t.Ninh Thuận brei thau:“Hadei di tuk hu asal kadha pathau khan ye khaol dahlak brei ka jabat chuyên môn ngak dom talăm pathau khan meng sap Cam piah pathau khan angaok loa papar sap  di huyện saong loa papar sap di xã. Saong payua talăm pathau khan ka dom palei peih brei ka bhap bani pang. Meng nan, hu ngak brei ka mikva salih bahrau jalan saneng piah mikva hu mbaok tame pacang khik bhum hijao di drei, rik daong haong huyện ngak habar samar gilac veik rai diuk siam mekre bahrau.”

Dalam tuk jit Covid-19 daok tamuh khang, bruk huyện Ninh Phước patagok pathau khan pacang caga jit Covid-19 di bhum urang Cam hu daong ka bhap bani thau cambaih bruk daok rah tabiak saong bruk mbuan ba tal metai lahik di jit ruak piah thau jalan plaih. Meng nan, hatai saneng di bhap bani Cam hu patagok, ba tangin tame rik daong haong puk palei jhul kadhul likuk jit ruak./.

Urang lang: Jasi – 06/10