Tuk daok gaok kan kandah, yaok pluh baoh sang kathaot di xã Nhơn Sơn, huyện Ninh Sơn, tỉnh Ninh Thuận hu Karja daong phun jien piah salih bruk ngak tui Quyết định 755 di Thủ tướng Raja-ei. Oh ka abih uan tabuan ye urang njauk laik tame duh hatai kayua xã “kateik” urang blei dom drei limo taha, limo lavang, limo njauk ruak ba mai raong piah menek. 

Núi Ngỗng lac palei bhap bani bangsa takik biak kan kandah di tỉnh Ninh Thuận. Atah di ini labaih 1 bilan, 16 baoh sang urang Raglây palei ini gam haong 21 baoh sang urang Cam di palei Lương Tri, xã Nhơn Sơn taduan hu sarak salih bruk ngak tui Quyết định 755 di Thủ tướng Raja-eo. Tui nan, yaok baoh sang hu daong 5 triệu đồng meng kadung jien karja saong hu mesre 15 triệu đồng meng Gilang pariak Sarak karja. Yaom jien 20 triệu đồng ini piah raong limo menek.

Amuk Mang Thị Mẹo, urang bangsa Raglây daok di palei Núi Ngỗng lac sang hu daong dalam mbang ini. Ba drei limo lavang lavaih, hu laka atah di kreh ka-ing, nao tame van, amuk Mẹo ndom lac oh bui sambai hu kayua limo jhak yau nan ye thau tal tuk halei meng hu laba: Limo mboh oh siam. Ba mai sang raong, luac bilan ini mai luk oh thau hadom jru, blei jru luk miat nyu meng siam jang dahlau hasit.

Jaik sang amuk Mẹo, dom baoh sang karei hu mbang tui sarak nan jeng daok raong dom drei limo taha, lavang mboh talang, hu drei jaoh take, jaoh tagei saong njauk rambuis di bộ phận sinh dục. Tui mikva dalam palei, limo ini kayua ong Đạo Văn Sói, Phaok akaok Ủy ban bhap bani xã Nhơn Sơn kateik mikva blei pak van limo di ong Nguyễn Văn Huynh, xã Mỹ Sơn. Sa-ai Mang Thị Dung lac: Karja daong 5 triệu, khaol dahlak mesre 15 triệu tra jeng 20 triệu blei sa drei limo. Khaol dahlak sahneng lac limo siam, limek cak, min tagok nao mboh limo lavang lavaih, ruak kik. Dalam tuk nan, khaol dahlak hu mboah tangin blaoh, nan ye khaol dahlak tok thau dui limo mai sang. Ba limo mai sang bo drei halei jeng mboh lavang lavaih, ruak kik.

Tuk mboh limo jhak, mikva hu panuac pathau tagok, ye ong Phaok Chủ tịch Đạo Văn Sói ndom lac “meyah oh dui limo nao sang ye ong ba phun jien daong saong jien mesre ka urang karei”. Oh daok jalan halei kareitra, mikva njauk ba dom drei limo jhak ini mai sang raong. Mong drei limo jaoh takaiy, sa-ai Mang Thị Út – urang Raglây daok di palei Núi Ngỗng, xã Nhơn Sơn drut droi khan lac: Dalam van, mboh drei halei jeng lavang abih. Mboh drei ini limek jang hasit, min nyu jaoh takaiy, drei mek nyu mai sang. Thau ngak habar ini. Meyah oh dui mai sang, urang jakar lac ba nao ka urang karei, nan ye jeng huac.

Melam 15/12, Đảng ủy saong Ủy ban bhap bani xã Nhơn Sơn hu taom gaok bhap bini palei Núi Ngỗng mbang puac abih piah duah thau ka hatai saneng, hatai caong khin di mikva, saong pandar po trại limo Nguyễn Văn Huynh salih veik limo siam jang ka mikva. Hadei di mbang nyaom, mikva mboh bui hatai ka jalan langyah di akaok Ủy ban bhap bani xã. 

   Daok bruk ong Đạo Văn Sói – Phaok Akaok Ủy ban bhap bani xã iek gah bruk ini hu panuac ndom yau kateik mikva mek limo oh siam di trai limo ong Nguyễn Văn Huynh, ngak srau kadau tal hatai saneng di bhap bani ye njuak ba tabiak xử lý, kiểm điểm. Ong Nguyễn Hữu Chí, akaok Ủy ban bhap bani xã Nhơn Sơn, huyện Ninh Sơn, tỉnh Ninh Thuận ndom lac: Ini lac bruk khaol dahlak tui pang taduan mek, meda peih ngak kiểm điểm, phê bình tapak piah dalam tukvak anak tal, dalam bruk điều hành, tacei pato do xã oh daok rah tabiak dom bruk yau nan tra.

    Bruk kateik  bhap bani kathaot blei limo taha, limo oh siam ngak jeng dư luận oh siam ka karja palei di tỉnh Ninh Thuận dalam dom harei tapa. Ini jeng lac kadha praong njauk rút kinh nghiệm dalam bruk daong ka urang kathaot di t ỉnh ini./.