Baoh sang di diuk pasang sa-ai Thào Thị Dê daok di bản Gia Khâu 1, xã Nậm Loỏng, ban sit Lai Châu urak ini klaak saoh hadei di tuk sa-ai Dê  duah tal lá ngón piah pametai rup eng meng mebuk hatai kayua pasang metai, sang gaok kan kandah.  3 urang anek di sa-ai Dê nan lac Chang A Sang, umo 22 thun, Chang Thị Dở  umo 8 thun saong  Chang A Do umo 6 thun njauk nao calah di gauk kayua oh daok hu dalam baoh sang joa lange, kurang amaik ame. Hadei di harei amaik metai hu 2 bilan, urang anek likei kacua njauk nao ngak mbang duah jien saong payua 2 urang adei brei wa iek glang, daong raong.

Sang wa jeng kan, drap ar dalam sang kayau oh hu hagait. Amaik metai, var lisei huak hu njam mbang nan lac biak patuah ngan saong dom anek naih metui medhua. Mboh dom kamuan rambah rambup, glaih glar tuk kurang plak tangin di urang amaik, thei jeng nit. Amuk Sùng Thị Say daok di bản Gia Khâu 1, xã Nậm Loỏng, ban sit Lai Châu lac:

  dahlak taha ye min dahlak oh khin sahneng tal bruk metai, kayua adei nyu khin metai nyu nao duah mbang lá ngón, bloh klaak veik 2 urang anek brei ka dahlak raong, yaom lac kan kandah dahlak jeng kham merat raong 2 kamuan mbiah tal tuk kol nyu praong jeng menuac

Daok atah di pasak ban sit Lai Châu oh ka tal 3 mbaik jalan, min bản Gia Khâu 1, xã Nậm Loỏng bahrau ini hu tal 3 urang metai kayua pametai rup eng meng lá ngón.  Phun Lá ngón lac janih phun tamuh jeng mbu, sit, tapak, pambak tame phun karei, atah meng 10 tal 12m. Hala hijao jangaih, hình trứng, kaok hala haluak. Bingu tamuh jeng chùm, sambo kanyik, bilan bingu meng bilan 6 tal bilan 10. Rilo labik ieu nyu lac phun “đoạn trường thảo” atau phun pametai tung. Janih phun ini nyu pametai oh thau hadom menuac, ngak srau kadau oh thau hadom puk palei, ngak calah calai oh thau hadom baoh sang. Sa-ai Sùng Thị Sính, akaok kapul urang kumei xã Nậm Loỏng brei thau:

Kol dahlak hu jak ba adei sa-ai kumei jhui mbang lá ngón, kayua lac drei metai bloh ye dom anek oh hu thei iek glang, caik ka nyu metui medhua biak anit ka nyu. Nan ye kol dahlak hu jak ba, khan brei adei sa-ai kumei thau dom kadha oh siam tuk mbang lá ngón)

Tui kuhria mboh di Công an tỉnh Lai Châu, meng thun 2011 tal ini dalam tỉnh hu 78 urang metai kayua pametai rup eng meng mbang lá ngón. Yaom lac karja palei saong dom gah chức năng bhian khan brei thau dom kanjah jhak di janih phun ini min urang pametai rup eng meng lá ngón jeng daok hu rilo tapa dom thun. Ndom ka bruk ini, Đại tá Nguyễn Tiến Dũng, Trưởng phòng cảnh sát hình sự, Công an tỉnh Lai Châu brei thau: tapa pasang iek, duah thau dom bruk metai menuac pambuak tal mbang lá ngón pametai rup eng nan hu biak rilo lý do min bhian patabiak meng dom lý do biak sit oh khin jia. Anit gauk bo oh tok gauk hu ye nao duah lá ngón; diuk pasang ginaong gauk, kamlah gauk jeng nao duah lá ngón; ngak mbang kan kandah jeng nao tal lá ngón. ....

Cảnh sát hình sự hu pambuak bruk haong dom gah yau kapul urang kumei, kapul dam dara, karja xã, pathau khan, jak ba mikva duah thau adat hukum. Saong duah thau dom bruk kandah gauk dalam sang, dalam but pajaih meda ba tal pametai rup eng piah langyah brei mikva thau saong oh nao duah mbang lá ngón tra bo njauk duah jalan karei piah langyah

Di sa tỉnh bhum ceik yau Lai Châu, oh kan piah duah janih phun angan ieu lá ngón. Nyu tamuh bak puk palei. Meng dalam glai, angaok puh, tapen jalan tal daning sang. Tok hu 3 lá ngón ye meda pametai hu sa urang, sa phun lá ngón ye ginup pametai abih menuac dalam palei. Hu rilo labik, karja hu jak ba mikva nao buac, nao rok klaak janih phun ini. Min dak buac, daok rok, gha phun klaoh tabiak nyu tamuh samar jang, khang jang. Kayua yau nan ye, piah palahik bruk mbang lá ngón ini, kadha praong di abih nan lac brei salih hu akaok sahneng di bhap bini./.