Nyaom darak Muổi Nọi tok di rah tabiak di mesup harei but saong mesup harei adit yaok adit. Meng sabuh mesup, biak ralo bhap bini mai meng dom puk palei dalam saong langiu huyện mai tal darak Muổi Nọi di huyện Thuận Châu, tỉnh Sơn La. Di nyaom darak ini, bruk njauk biai nan lac biak ralo janih pandap kaya nông kayua mikva ngak tabiak hu parang pablei; meng pabui, menuk, da kangan tal dom pandap brei ka bruk pala drak yau to, văng, jaleing, cop, kiềng bếp. Mikva mai tal nyaom darak, ralo meng lac bhap bini meng dom xã di huyện Thuận Châu saong dom huyện jaik taphia karei. Nyaom darak Muổi Nọi gam lac labik pablei salih pandap, gam lac labik taom gaok, ndom meyai nao mai di dom gauk gar, buat pajaih lavik harei hu taom gauk veik. Saai Lường Thị Cúc – palei Phiêng Tam, xã Chiềng Đen, ban sit Sơn La brei thau:

  “Nao darak sambai lo, hu taom gaok ralo urang, hu maong ralo janih, nao darak piah palih ruah blei dom janih drei takre, min oh blei hu hagait jeng mboh sambai. Pandap panda ye biak ralo, yaom kaom thun ini oh sit jang yaok thun, urang mbuan blei, mbuan pablei kayua yaom kaom mbiah saong kadung jien di drei”.

Bui sambai di abih nan lac dom mbang darak harei xuân. Darak ralo menuac, urang jeik gauk, urang nao darak gam piah blei pandap, gam piah maong iek. Blei hu pandap jeng lac siam, oh blei hu jeng lac oh njauk hagait; gaok tuk urang mai darak piah hu taom gaok, ndom meyai nao mai, piah hu ba drei tame bruk bui sambai. Adei Đèo Văn Minh – palei Thán, xã Muổi Nọi, huyện Thuận Châu, tỉnh Sơn La lac: 

“Adei mai tal ini duah blei baoh chuông piah tuan ka pabe. Tal bilan ye drei oh palao tra bo raong kreik veik klah nyu lahik, sang adei raong labaih 10 drei pabe, caong khin ka tapon pabe di sang drei dak harei dak praong, siam, oh hu jit ruak”.

 Nao darak harei xuân, hatai menuac mboh chreih chrai, yau ba drei tame bruk bui sambai di dom urang nao darak. Thei jeng caong hu nao biak ralo, hu maong biak lavik pandap panda parang pablei meng akaok darak tal puac darak. Takik thei nao darak bo oh ruah ka drei sa pandap njauk hatai, gaok tuk lac ao barau, tuk lac har ka uranaih daok di sang, tuk lac ikan, candiah ralo, njam patam, dom janih pandap yau Yuan lac “cây nhà lá vườn” kayua mikva dalam palei raong, pala, ngak tabiak. Saong nan lac bruk sinh hoạt ilamu labik bhum glaong Tây Bắc./.