Kayua jit Covid-19 yau nan ye thanh long laik yaom

Dahlau dieh, mboh phun thanh long ba mai kein laba glaong nan ye rilo menuac di huyện Châu Thành (Long An) klaak ngak padai, klaak raong ikan, kaoh klaak dom janih phun karei piah salih tapa pala thanh long haong hatai caong ngak kaya mada. Dom labik vil val yau ye Tân Trụ, Thủ Thừa, Thạnh Hóa, ban sit Tân An… jeng mblah tui, pala thanh long. Nan ye meng dom ribau hécta tuk camriep, oh suai lavik, dalam tỉnh Long An hu tal yaok pluh ribau hécta thanh long, rilo meng lac phun thanh long tai meriah bhong. 

Dom thun jaik di ni, thanh long laik yaom, abih di nyu nan lac di thun 2020, kayua jit Covid-19, bruk pablei tabiak negar langiu gaok kan kandah nan ye yaom thanh long trun biak khang, daok dom ribau đồng sa kg. Rilo sang pala khat lahik phun. Oh takik sang daok kaoh klaak, yah bien pala thanh long piah salih tapa pala dom janih phun karei. Yau ong Tám Toản, daok di ấp 5, xã Phước Tân Hưng (huyện Châu Thành) yah klaak jaik 1ha thanh long salih tapa pala bingu mai kanjik. Daok jaik nan, sang ong Thịnh jeng yah klaak labaih 1ha thanh long jaik 1.300 gha kayua khat labaih 300 triệu đồng hadei di 3 thun kham ngak. Ong Bình (jeng daok di ấp 5) brei yah klaak jaik 0,6ha thanh long kayua abih jien piah buh tame ngak veik…

Tapa duah thau, di Long An urak ni hu labaih 200ha bien pala thanh long njauk kaoh klaak, dalam nan hu dom mblang taneh hu pala veik phun thanh long bahrau, daok veik rilo meng salih tapa pala janih phun karei yau ye baoh darum, me-mbat, panat Thái… Di huyện Châu Thành, labaih 130ha thanh long (rilo meng lac phun taha) hu kaoh klaak. Sang halei daok jien ye pala veik phun thanh long  haong hatai caong yaom meda tagok tuk abih jit Covid-19; hu sang pala phun karei atau pala njam patam piah samar paih pablei. Di 2 huyện Tân Trụ saong Thủ Thừa hu jaik 50ha thanh long njauk kaoh klaak. Rilo meng lac thanh long bahrau pala, min kayua khat nan ye po bien brei kaoh klaak. Rilo sang brei thau, piah iek glang 1ha thanh long (brei baoh 3 vụ), yaok thun jien buh tame labaih 100 triệu đồng (oh kuhria jien buh tame tuk camriep, abih yaok rituh triệu đồng). Rilo po bien jeng masre jien di gilang pariak piah pala thanh long, blei tavak pandap panda di dom đại lý… 

Phaok Yam ndok Sở NN-PTNT tỉnh Long An Nguyễn Chí Thiện brei thau: “yaom thanh long gam gam trun bier dalam tukvak suai lavik, ngak duh hatai bhap bini. Mayah tukvak anak tal, yaom thanh long oh tagok ye meda ngak kan kandah praong tal dom sang pala, tuk nan ka oh thau yau habar”. Jeng tui ong Thiện, taneh pala phun thanh long di tỉnh Long An urak ni labaih 11.822ha (daok hu baoh labaih 11.142ha), rilo meng lac di huyện Châu Thành, Tân Trụ, Bến Lức, Thạnh Hóa, ban sit Tân An… Langiu di Long An, rilo sang bien pala thanh long di huyện Chợ Gạo (tỉnh Tiền Giang) jeng daok duh hatai kayua yaom thanh long biak bier./.

Urang lang: Thu Thảo – 04/02