Kuhria dalam 5 thun ini mai, ong Thái Trường Chinh hu buh rilo prein yawa nao jak ba dom kapul nyaom, menuac urang daong ka yaok rituh labik ngak pahla daong urang kan kathaot saong yaom jien jaik 647 trieu ndong; gam saong nan, yaok thun, ong daok nao tal sang piah rivang saong daong meng 10 tal 20 kilo brah saong dom janih pandap karei ka dom urang kan kandah. Langiu di nan, ong hu daong padang ngak birau saong pasiam veik 18 baoh sang ka urang kan kathaot, urang jaoh jo kan kan kandah sang daok, kuhria abih tih labaih 150 trieu ndong.

Oh padeih di nan, ong daok jak ba urang rik tame yaok rituh trieu ndong piah daong dom sang gaok kan kandah dalam raidiuk, urang ruak kik, sang kathaot hu manuac plang lahik, daong brah saong dom janih pandap karei karei ka dom labik tahanek lisei anit ranam di dom sang iek ruak, atau blei bảo hiểm y tế ka yaok rituh urang kan kathaot piah iek ruak…Ong Chinh hadar veik: 

Ngak pahala bruk halei drei jeng caik hatai abih. Dahlau di abih lac prein yawa di anek manuac, ruak trak khin hu jien nao sang iek  ruak drei brei daong chip. Yau thun blaoh, dahlak hu nao rivang anai diah ruak u tasau, oh hu jien nan ye ndih di sang, mehit yau nan dahlak mai chip. Dahlak brei 4 triệu, dahlak jak ba adei sa-ai, anai, wa ini diah hu jaik 24 triệu đồng, peih radaih di sang ba nao iek ruak. Ngak harak ba nao Soc Trăng, Sóc Trăng ba nao Ung buou, daong hu dhit abih ruak.

Kayua caong khin iek ruak oh abih jien ka urang kan kathaot, dom thun tapa, ong Chinh nao grauk labik duah kaoh jru glai mai pambu piah brei ka dom jabat jru nam dalam saong langiu tỉnh. Tui nan, dalam 5 thun tapa, hu labaih 50 tấn jru nam thu dom janih kayua ong Chinh jao brei piah iek ruak ka dom urang ruak kan kathaot oh kuhria jien padai.

Ndem meyai saong ong khol dahlak meng thau lac, raidiuk di ong Chinh pambuak pagam saong bruk ngak pahala meng tuk daok nao bac. Ong Chinh khan, dahlau diah sang ong kan biak kan, yaom lac yau nan, min amaik ame bhian daong ka urang kan dalam palei yaok mbang sa kilo atau 2 kilo brah. Ngak tui amaik ame, ong saong dom ayut bac saong gauk, nao duah dom phun jru nan piah jao ka dom  bilai jru nam dalam tinh. Ong Chinh lac: 

Drei ngak pahala meng tuk daok sit, mboh biak bui sambai. Daong hu ka urang drei mboh bui. Yau ye bruk dahlak daong brah, yaok bilan sa tấn brah. Sa tấn brah ini dahlak oh iew urang mai mek bo pajeng nao tal sang ka urang taha, daok sa drei…

Ong Chinh daok brei thau lac, sang kan kathaot, min meng hatung hatian anit ka urang, ong kham merat ngak mbang meng prein yawa di drei piah hu raidiuk kaya meda, hu jalan piah daong ngak pahala. Bruk ngak di ong hu danei atah, rilo urang ngak duah mai rik tame ngak pahala saong ong.

Harei ini, tukvak ong ngak bruk daong xã hội, daong urang karei rilo jang tukvak ong caik ka sang danaok jeng yau rup ong. Kadha ini jeng mbuan thau, tuk sang ong lac labik di rilo urang kan duah mai, likau daong. Yaok bilan, hu yaok pluh harak thu payua mai likau ong daong. Ndem ka bruk ngak pahala hu makna praong di ong Thái Trường Chinh, amuk Nguyễn Thu Hương, Akok Kapul Chữ thập đỏ tỉnh Sóc Trăng brei thau:

Cei Thái Trường Chinh hu jak ba urang daong, yaok bilan cei nao tal sang daong ka urang kan kathaot, abih di nyu nan lac, urang taha, daok sa drei. Bruk daong ngak pahla di cei thun hadei glaong jang thun dahlau . Mbiah tal harei ini, rup ong jak ba daong yaok bilan ka 101 labik ngak pahala daong ka urang.

Hatai anit ka urang di ong Thái Trường Chinh biak njauk iek praong. Umo 63 thun, min hatai caong khin ngak pahala daong ka urang kan kathaot oh tuk halei padeih dalam ong. Ong Chinh caong khin, dom bruk ngak sit sot nan meda daong klak rabha meneing dom kan kandah dam raidiuk, piah ka dom urang nan yam tagok ba drei tame saong bhap bini. Bruk padaong bo ong sahaneng lac sit nan, hu daong ba mai yaok rituh, yaok ribau cambuai khim klao, haniam phol ka yaok rituh, ribau urang kan biak kan, oh patuah jamo./.