Cuk angaok rup blah aow kanyik di baha, ong bhik Thích Đồng Nguyện dok di baha Pháp Bảo (quận Gò Vấp, ban raya Hồ Chí Minh) lac sa urang sami samar dalam bruk pacang caga jit HIV/AIDS. Patui bilan ngak di taneh ia pacang caga HIV/AIDS thun 2014, Hiếu Hiền, urang vak di rayo sap ndom VN dok di ban raya HCM hu kadha vak ndom tal  ong bhik ni.

Caong gaok Đại đức Thích Đồng Nguyện oh mbuan, kayua ong nao luac harei, jar var langyah ginup dom bruk meng sit tal prong. Phone pan tangin di ong tuk halei jeng hu menuac ieu, meng dom urang nyin, urang njom HIV (ieu katut lac urang njom H), tal dom urang ngak bruk XH di pasak tacei pato song dong ba bhap bini Pháp Bảo kayua ong padang tabiak. Piah ka dom urang njom H, mbuan si taduan hu bruk tacei pato, ong ba laik phone di drei tagok mạng internet yau sa laik điện thoại jalan talei pandiak. Bruk caik hatai pang dom mbang ieu phone tuk kreh melam song gaok tuk mai, njauk nduac tal labik piah dong ka urang, lac bruk bhian mboh ngan saong ong. Hu menuac oh ka mbang halei taom ong min jia tame ong, ieu phone brei ong tacei pato atau khin ong ba tal sang iek ruak Nhân Ái iek ruak kayua oh hu thei karei atau hu min urang mbaiy mbaok, njaik atah. Đại đức Thích Đồng Nguyện lac:Tangi sua lac urak ini khin hagait, urang javap lac khin hu sa lon ia yamen kayua lavik ye  oh hu menyum. Sua gac khin hagait ye urang lac khin gu dep kayua harei kabroi lihik ye. Hu dom cong khin luac di abih di dom urang njom H, oh meda hagait praong. Dom bruk hagait drei ngak hu ye drei ngak piah ka urang bui hatian. 

          Ngan song dom urang nyin atau urang njom H, hu sa bruk piah ngak nan lac biak hu yaom glaong. Thau lac yau nan, Đại đức Thích Đồng Nguyện duah jalan ba bruk ngak ka urang njom H. Sa tukvak suai lavik, bein baha Pháp Bảo hu jeng labik ka dom urang njom H ngak nhang. Ong Thích Đồng Nguyện dok duah rilo bruk ngak krei tra ka urang njom H, pataom tame dom bruk bo urang meda ngak di sang, lagaih song pren yava di urang. Urak ni ong jak ba hu labik daong piah alin brei 6 sruh radeih pablei ia tabau. Hu dom urang yau saai Nguyễn Thị Thúy dok di quận Bình Tân, hadei di tuk hu bruk dong ba meng ong Thích Đồng Nguyện, halan hatain tame kapul daong bruk di pasak Pháp Bảo piah dong ka dom urang yau drei.

Meng bruk dong ba di ong,  drei hu pren jang, tự tin jang. Urak ini drei oh huac piah khan lac drei njom H., saong hu ndom biai yau ini lac biak siam. Dahlau deih tuk tame pasak Pháp Bảo drei oh khin lac drei njauk ruak H. Dom bruk ngak di hulin urak ni cong khin dom urang ruak yau drei  hu pabak pren khang song hu hatai sahanengsiam yau drei.

          Lac sa urang oh ka thau hagait ka jit AIDS, min tuk hu mbaok tame khóa tu di Học viện Phật giáo ban raya Hồ Chí Minh, livik livik harei ong Thích Đồng Nguyện hu ilamu ka HIV/AIDS song kham merat hu mbaok dalam bruk XH. Thun 2007, ong song dom urang halan hatain peih rilo mbang pathau khan ka bruk pacang caga AIDS di khu dân cư, sang trọ, dom baha. Bhian dang akaok kapul pathau khan ka HIV/AIDS di Học viện Phật giáo ban raya Hồ Chí Minh nan ye Đại đức Thích Đồng Nguyện hu mbaok dalam bruk pacang caga AIDS biak siam. Thun 2011, ong padang sa pasak langyah song dong ba bhap bini dok di baha Pháp Bảo. Yaom lac hu 5 urang song 9 tiếp cận viên min labaih 3 thun tapa, pasak Pháp Bảo ngak hu biak rilo bruk dong ka bhap bini yau taom gaok piah langyah ka 675 urang hu duik atau pasang lac urang njom H, peih bruk iek ruak song brei jru ka urang ruak H, ba 20 urang njom H tal dom sang iek ruak. Ong Thích Đồng Nguyện dok pambuak hu song sa công ty piah pabak pandap mbang chức năng ka 15 urang hu menyum jru gam gam piah tagok pren đề kháng, pacang ruak nhiễm trùng cơ hội. Bruk abih hatai jai brei ka bhap bini di Đại đức Thích Đồng Nguyện pachreih hu rilo urang nao ngak bruk XH song ong. Saai Lê Hồng Hào, sa dalam dom urang di pasak Pháp Bảo brei thau:Hulin taom ong dalam chiến dịch pachreih 30.000 dấu vân tay sinya oh dok hu urang njom bahrau HIV. Mboh bruk ngak di ong hu kein lagaih dong ka rilo urang, yau nan ye hulin mai  dong ka ong. Ong lac sa urang biak siam hatai, sahaneng saong kham merat daong ka menuac urang.

Dom rik dong ka bhap bini di ong bhik Thích Đồng Nguyện jeng taduan hu bruk klah rabha meng kapul nyaom, tổ chức xã hội. Saai Nguyễn Thị Thảo, Phó akaok  Ủy ban mặt trận negar  quận Phú Nhuận brei thau Gah pasak di ong jeng hu daa gah MT pambuak bruk pathau khan, ginum biai ka urang njom H, jalan iek glang ka urang njom H. Langiu di nan, ong dok jak ba padang ngak sang anit ranam. Dom mban, ngành, kapul nyaom tong yaom biak glong bruk ngak di ong, dong hu biak rilo ka menuc sia, ka XH.

Dom rik dong di ong bhik Thích Đồng Nguyện dalam bruk pacang caga HIV/AIDS lac sa bruk njauk iek prong dalam rai duik ni. Dom bruk ngak di ong njauk hu bruk daong pren di XH piah ba gauk samar jhul kadun likuk jit ruak HIV/AIDS./.