Langyah biak catang dom urang tame negar suan hukum

Dom harei tapa, gam gam hu rilo urang Trung Quốc tame negar Việt Nam suan hukum tapa jalan haluk njauk gah chức năng mboh, cap khik. Bruk njauk biai nan lac harei 9/3, gah chức năng tỉnh Nghệ An mboh sruh radaih kik ndih (nduac meng Quảng Ninh nao Cần Thơ) pajeng 53 urang Trung Quốc tame negar suan hukum tuk nao tal ban sit Hoàng Mai. Jeng dreih yau nan, harei 7 bilan 3, di Thanh Hóa, kapul jakar duah mboh 12 urang Trung Quốc tame negar Việt Nam suan hukum. Daok di Bình Phước, melam 8 bilan 3, hu 9 urang Trung Quốc tame negar suan hukum njauk bhap bini haong Công an pak ni mboh saong cap khik. Bilai pasang iek Tiền tiêu, xã Nậm Cắn huyện Kỳ Sơn tỉnh Nghệ An daok jaik tapen jalan negar Việt – Lào, hu padang tagok meng bilan 3 thun ni, lac tukvak tamuh jit Covid 19… Lac labik praong, langik tasik biak kan kandah, bilan pandiak ye pandiak khang yau apui, daok bilan liar ye biak liar, hu tuk trun 0 độ C min dom urang lin biên phòng di pak ni halan hatian daok veik khik iek rilo bilan ni mai . Langiu dom var lisei huac samar drah ye dom saai tuk halei jeng hu mbaok di dom jalan haluk sit nao mai di tapen negar, piah pacang cakak dom menuac tame tabiak negar suan hukum. Đại úy Nguyễn Văn Tình, urang lin bilai Tiền tiêu, xã Nậm Cắn, huyen Kỳ Sơn, tinh Nghệ An brei thau, anak bruk jit Covid-19 rahtabiak sarau kadhau ngan haong rilo biến thể bahrau, adei saai klaak veik bruk di drei, halain hatain tanduan saong ngak siam bruk hu jao brei: “Mayah oh hu jit ruak ye adei saai takik glaih glar jang, hu tukvak mai rivang sang danaok, min meng di tuk hu jit ye halan hatian daok veik khik iek jalan tapen negar, nan ye klaak veik bruk di drei piah ngak bruk ka taneh ia.”

Đồn biên phòng pabah mbang negar pakat dunya Nậm Cắn hu brei bruk khik iek canah jalan tapen negar atah jaik 30km. Yaom lac labik praong, ceik gilai nao mai biak kan kandah min kapul hu caga, kuhria mboh dahlau bruk rah tabiak nan ye ngak hu siam dua bruk haong gauk lac, gam khik iek quyền ngak po bhum tapen negar, gam ngak siam bruk pacang caga jit Covid-19. Trung tá Nguyễn Hồng Đức, akaok Đồn biên phòng pabah mbang negar pakat dunya Nậm Cắn, Kỳ Sơn - Nghệ An brei thau, gam haong bruk mesuh pacang kol tội phạm, đồn hu padang 7 kapul  khik iek luac harei melam, peih bruk pathau khan brei bhap bini thau ka jit Covid 19 saong pacang cakak menuac tame negar suan hukum: “Đảng uỷ, mBan Chỉ huy thau lac brei ngak siam dua bruk haong gauk, gam ngak siam bruk khik caga quyen ngak po bhum tapen negar gam ngak siam bruk pacang caga jit Covid-19, kapul hu peih bruk pathau khan bhap bini ngak njauk tui bruk pacang caga jit, tacei tabiak kol ngak siam hukum pambuak tal bruk tame tabiak negar suan hukum, taong tayah hu rilo jalan pablei salih aphin suan hukum.”

Meng akaok thun blaoh, anak bruk njom mbak sarau kadhau di jit COVID-19, Bộ đội Biên phòng Nghệ An hu padang tagok saong khik ramik 01 Sở pato pakai gah anak, 56 kapul khik iek di labik, 11 kapul khik iek nao mai di jalan tapen negar hu 318 urang jaka, urang lin, harei melam khang hatai khik kajap, yam tapa yaok kan kandah, glaih lar piah pacang caga jit, ngak jeng paga pacang sre angaok jalan tapen negar, pacang cakak, langyah samar drah dom bruk tame negar Viet Nam suan hukum. Đại tá Lê Như Cương, Chính ủy Bộ Chỉ huy Biên phòng tỉnh Nghệ An brei thau: “Lac kapul dang akaok khik iek jalan tapen negar, dom thun tapa gah biên phòng bhian hu sangka, pachreih ba piah ka dom urang jaka, urang lin yam tapa kan kandah, ngak siam bruk hu jao brei. Anak tal khol dahlak ba tabiak dom jalan ngak lagaih haong bruk pacang caga jit, khik sron mbon bhum tapen negar, oh caik ka menuac tame negar suan hukum.”

Meda ndem lac, tuk bhum tapen negar hu pasang iek, taong abih dom labik di bhum tapen negar, angaok mbaok haluk, mangaok tasik hu khik kajap, dom gah chức năng sa hatung hatian haong gauk, ba gauk pacang cakak urang tame negar suan hukum, meda daong ka bruk pasang iek jit ruak Covid-19 hu siam lagaih./.

Urang lang: Thu Thảo – 17/03