Gah chức năng cap mek dom urang peih bruk  pablei salih manuac

Tapa panuac khan di dom urang gaok bala mai veik meng dom labik rambah rambup di gah daih negar meng mboh cambaih, kol pablei salih menuac oh klaak tapa bruk bleik saliek halei piah pachot, piah ba menuac tapa Trung Quốc pablei mek jien. Hadei di tuk kol nyu pambuak bruk hu haong kol pablei salih menuac di Trung Quốc, kol nyu mai veik Việt Nam, nao tal dom puk, palei bhum atah bayah, pandar mạng xã hội piah pachot lac anit ranam, sanya mek ngak diuk. Tuk mboh urang laik tame bruk pachot di kol nyu, ye kol nyu pablei urang tame labik ngak kumei me-in, pablei veik ka dom urang likei Trung Quốc mek ngak diuk.

Dalam tuk duah thau piah vak kadha vak ini, kol dahlak hu taom gaok adei Hồng Thị C. (umo 20 thun, daok di palei Noh Prông, xã Hòa Phong, huyện Krông Bông) lac urang mai veik meng labik kanjah jhak di abih piah pang adei khan veik bruk pandik harao hadei di tuk adei njauk urang pablei nao, pablei mai di Trung Quốc. C. khan lac: Tapa mạng xã hội, adei ngak sahabat haong 1 urang angan Phàng. Hadei di 1 tukvak anit ranam gauk angaok mạng, Phàng lac khin mek C. ngak diuk. Min hadei di tuk taom gaok C, Phàng pachot ba tabiak tỉnh Lào Cai, hadei di nan C. hu pablei tame labik ngak kumei me-in di Trung Quốc:  “Tuk menyai gauk angaok facebook,nyu sanya lac mek adei ngak diuk,tuk camereip adei oh jia, min lavik lavik harei adei jia lac nyu khin mek adei ngak diuk, blaoh nyu nyim ayut mai taduan adei. Tuk taom gaok gauk, adei yau menuac lahik suan yava, oh daok thau hagait, tok thau nao tui urang nan min”.

Hadei di tuk laik tame sruh ngak kumei me-in, C. hu 1 urang likei Trung Quốc blei mai ngak diuk. C oh taduan panuac, njauk po labik sruh kumei me-in pa-eik, taong paoh biak jhak. Min biak patuah, tuk kol pablei salih menuac ba C. nao sang “pasang” ye njauk Công an Trung Quốc pasang iek saong daong paklah.

Tukvak tapa, dalam tỉnh Đắk Lắk, bruk ngak di kol pablei salih menuac, abih di nyu lac pablei salih uraniah, urang kumei ba tabiak negar lingiu piah ngak diuk suan hukum saong pablei ka dom sruh kamei me-in di negar lingiu rah tabiak rilo. Di jabat Cảnh sát điều tra Công an tỉnh Đắk Lắk, ja Thào A Vảng, daok di xã Đắk R’Măng, huyện Đắk Glong (Đắk Nông) khan lac: “Urang oh ka thau drei lac menuac kanjah jhak pachot ba tapa Trung Quốc pablei nan ye urang nao haong drei. Abih tih adei pachot hu 4 urang ba tapa Trung Quốc pablei mek jien”.

Dom thun tapa, piah pacang cakak bruk pachot pablei menuac tapa gah daih negar, dom báo, đài hu rilo mbang khan brei thau, karja hu tame bruk pathau khan, paglaong akaok sahneng di bhap bini min oh ka siam lagaih hadom. Ta-eng di Đắk Lắk, tal urak ini, Công an tỉnh mboh lac hu 14 urang kumei njauk lah pachot pablei tapa Trung Quốc saong hu dom urang tal harei ini oh ka duah mboh, oh ka thau daok pak halei.

Anak bruk yau nan, Công an tỉnh Đắk Lắk hu ba tabiak dom jalan ngak samu gauk piah samar duah mboh, piah pacang caga kol pablei salih menuac. Gam haong nan, gah công an jeng hu daong ka pakat ủy, karja palei piah ngak siam dom sarak patagok kinh tế, khik kajap an sinh xã hội, hu jalan daong ka dom adei sa-ai kumei sang biak kan kandah, Ba bruk hit ngak mbang ka dom urang gaok bala di dom bruk pablei salih menuac piah daong ka dom urang nan samar ba drei tame veik haong raidiuk. Đại tá Phạm Minh Thắng – Phaok Yam ndok Công an tỉnh Đắk Lắk – brei thau: “Caong lac dom pakat dom gah dom jabat brei thau pambuak bruk haong gah công an pathau khan cambaih bruk pachot di kol pablei salih menuac, abih di nyu lac khan tal dom urang mbuan laik tame bruk lah pachot dalam bhum bhap bini bangsa takik daok di bhum atah bayah piah thau ka jalan ngak di kol pablei salih menuac”.

Tui kuhria mboh di Mintri Lao động thương binh saong xã hội, yaok thun, dom gah chức năng mboh hu 400 bruk pablei salih manuac, hu tal yaok ratuh, yaok rabau urang gaok bala. Dalam nan, dom bruk pablei salih menuac tabiak negar lingiu meblah tal 80%. Kol pablei salih menuac rilo meng lac kol kanjah jak, hu duas, hu njauk guk blaoh ka bruk pablei salih menuac, kol nyu pambuak haong dom kol jhak daok di bhum atah bayah, bhum tapen negar piah jak, piah pachot ba menuac tabiak negar lingiu piah pablei.

Urang gaok bala di kol pablei salih menuac bhian lac urang kumei haong uraniah, njauk ba nao ngak kumei me-in atau kateik greik ngak bruk, lac sa janih ngak halin saman bahrau. Hu dom urang hu ngak maha tok pasang Trung Quốc meng 1 urang bahrau thau tapa mạng min jia tui, nao tui tapa gah daih negar, blaoh tatuak drei tuk thau lac drei njauk kol jhak ba pablei ka urang ini, blaoh pablei ka urang daih yau sa janih pandap.

Lingiu di nan, bruk pablei salih uraniah, abih di nyu lac anek saih dom sang bac bangsa gam bac gam daok rah tabiak kan thau hu. Kol pablei salih menuac pagam pambak tame bruk khik iek cadu di amaik ame, di sang bac, tapa dom blah mạng xã hội (Zalo, Facebook…) kol nyu taom gaok, jak ba nao me-in, blei pandap alin hadiah brei, pachot lac nao ngak hu jien bilan glaong piah ba mai ban raya pablei ka nhà hàng, quán karaoke di dom labik du lịch, labik ngak kong atau tapen jalan roya, kateik greik ngak kumei me-in, kateik greik ngak bruk atau pablei tabiak negar lingiu.

Dom jabat chức năng hu peih ngak rilo jalan piah samar thau hu dom bruk saong duah jalan langyah, daong paklah dom urang gaok bala; khan brei thau dom bruk pambuak tal pacang caga kol pablei salih menuac, duah dom urang daok lahik, daong jien padai ka dom urang gaok bala di bruk pablei salih menuac, daong duah labik daok plaih, daong gah adat hukum, daong gah tâm lý ka urang gaok bala saong amaik ame gauk gar di dom urang nan./.

Urang lang: M. Phương – 13/12