Rilo doanh nghiệp brei urang ngak daok veik di Cty piah daong patrun njom mbak jit ruak tame sang mac, khik salamat ka urang ngak

Labaih 1 bilan tapa, meng di tuk jit ruak rahtabiak di ban sit Tân Uyên, jeng lac tuk Công ty Earth Corporation Việt Nam, di labik ngak kong Nam Tân Uyên jak ba jaik 200 urang jakar, urang ngak daok veik di sang mac piah khik salamat. Piah hu labik padeih padei laneng lanoi, mban Yam ndok haong urang ngak ba gauk puh, ramik mac jamraik dalam jabat ngak bruk. Sang mbang huac jeng hu rami ramik veik piah ka abih urang ngak meda eng drei tame ngak mbang huak. Dalam luac tukvak daok veik di Cty piah ngak bruk, mban Yam ndok saong urang ngak jeng cuk aw Cty, ba bui sambai, chreih chrai ka taong abih gauk. Amuk Phan Thị Phương Linh, Yam ndok Nhân sự Cty Earth Corporation Việt Nam brei thau, urang jakar, urang ngak daok veik di sang mac, langiu di jien bilan, jien thưởng, jien tăng ca, daok hu mbang huak harei 4 mbang. Cty brei ka yaok urang ngak 5 trieu mateh piah pachreih urang daok veik: “Jit ruak daok biak sarau kadhau, abih di nyu nan lac di dom labik sang trọ. Bruk urang ngak hu daok veik di sang mac meda rik daong tame bruk pacang caga jit ruak, khik kajap prein yava, bruk ngak mbang pablei salih di Cty).

Piah hu labik daok ka labaih 700 urang jakar, urang ngak, Cty TNHH Điện tử Foster Việt Nam di labik ngak kong Việt Nam - Singapore II, ban Thủ Dầu Một brei ramik veik 2 labik sang xưởng, caik mac laar, kamo, phui; ngak vòi hoa sen di sang vệ sinh. Langiu di 4 var huak brei saoh, yaok urang ngak daok hu Cty daong 100.000 đồng sa harei saong alin sa thùng ia tasau. Urang ngak angan Võ Thị Huỳnh Gương brei thau lac: “mayah drei nao nao, mai mai saong nao darak blei pandap ngak huac ye taom gaok menuac gah langiu biak rilo, oh thau urang hu ruak halei oh nan ye biak mbuan njom ruak. Tuk drei daok veik di cty saong abih gauk jeng hu dut iek Covid-19 ye biak salamat, plaih hu dom kan kandah”.

Jit ruak ngak ka yaok pluh doanh nghiep di Bình Dương njauk padeih ngak kayua hu menuac njom Covid-19, yaok pluh rabau urang ngak njauk nao daok karei pataom gauk atau daok di sang. Piah klah raba kan kandah haong đoàn viên, urang ngak, Liên đoàn lao động tỉnh Bình Dương hu kaoh tabiak meng kadung jien công đoàn piah daong 3 triệu đồng/sa urang ngan haong urang ngak lac F0; dom urang F1 hu daong 1 triệu meteh sa urang; F2 hu 500.000 đồng sa urang. Tui Liên đoàn lao lao động tỉnh Bình Dương, dalam tukvak urak ni, tuk jit ruak Covid-19 daok njom mbak samar tame dom sang mac , labik ngak kong, bruk doanh nghiệp ramik labik ka urang ngak daok veik di sang mac lac sa bruk biak siam lagaih, oh ngak klaoh bruk ngak. Tal urak ni, dalam tỉnh hu 48 doanh nghiệp ngak tui bruk ini, saong hu labaih 7.000 urang ngak daok veik di sang mac ngak bruk. Amuk  Nguyễn Kim Loan- akaok Liên đoàn Lao động tỉnh Bình Dương ndem lac, daok pambuak bruk haong dom pakat công đoàn jak ba po doanh nghiệp peih ngak, rami ramik labik lagaih ka urang ngak daok veik labik ngak; saong brei tut angan haong karja pak nan ka dom urang daok veik piah mbuan khik ramik: “Dom doanh nghiệp daok pachreih tui bruk nan. Yaom lac kan kandah yau nan min doanh nghiep tuk halei jeng iek praong urang ngak, nao gam haong urang ngak piah patagok. Khol dahlak biak klah raba haong doanh nghiệp dalam tuk kan kandah ni”

Dalam tukvak ni, bruk rami ramik ka urang ngak daok veik di sang mac, takik nao mai meda daong patrun bruk njom mbak jit ruak, min brei hu bruk pachreih tui, pambuak gauk ye bruk pacang caga jit meng hu siam lagaih; doanh nghiệp jeng khik takai hu urang ngak bruk, daong ka dom urang ngak sanang hatai pambuak bruk suai lavik./.

Urang lang: Thu Thảo – 16/07