Rilo kapul nyaom rik dong pandap pandaka urang kan kathaot

Anak bruk jit ruak tamuh khang, rilo urang ngak lahik bruk, trun jien mek tame, ong Nguyễn Văn Tới halan hatian brei trun meteh yaom jien mek tame di drei piah klah rabha kan kandah haong menuac sia. Ong Tới (angan bhian ieu lac Út) hu 32 bilik brei pah daok trọ di hẻm 352 (phường 28, quận Bình Thạnh). Tuk jalan hẻm ini njauk pacang veik kayua jit, ong Út samar brei trun meteh yaom jien pah bilik daok bilan 6 piah klah rabha kan kandah haong mikva urang pah bilik daok. Lingiu di trun jien pah bilik daok, ong Út daok brei brah, mì gói saong dom pandap mbang huak karei ka urang dalam labik daok trọ. Ong haong menuac dalam sang nao blei pandap mai blaoh ba gauk parabha pandap, hadei di nan brei phiếu ka dom bilik daok pah daok piah mikva mai mek pandap.

Daok sa-ai Nguyễn Thị Thúy Hiền (daok di phường 15, quận Bình Thạnh) pablei pandap mbang menyum min quán brei padeih kayua jit. Sa-ai khan lac sang oh kaya meda hagait min hu hagait ye daong nan ka mikva. Meng harei  quán padeih pablei, sa-ai Hiền ba tangin tame ngak dom pandap mbang mesup, brei saoh ka mikva dalam labik njauk pacang veik. Tuk camereip, sa-ai Hiền eng drei dang tabiak daong ka mikva daok jaik taphia min dak harei dak hu rilo labik njauk pacang veik, tui nan dom menuac caong daong dak harei dak rilo jang. Nan ye sa-ai ba tagok Facebook ieu menuac sia ba tangin tame daong sa-ai ngak pandap mbang mesup atau lisei huak var jala brei ka mikva. Urang halei daong njam patam, baoh kraoh, brah ye sa-ai blei ralow, ikan piah ngak lisei blaoh parabha jeng pok payua tame ka mikva. Harei halei oh ginup pandap ye sa-ai nduac nao likau lasei di dom labik karei mai brei ka dom labik njauk pacang veik.

Meng bruk anit ranam, daong gauk dalam kan kandah bo sa-ai Dung (daok di hẻm 57 Điện Biên Phủ, quận Bình Thạnh) mboh hu rilo bruk njauk iek praong di vil val drei hadei di 1 adit daok dalam jalan hẻm njauk pacang veik. Dalam tukvak ini, sa-ai meng hu krein randap rilo jang haong mikva daok jaik taphia. Meng harei hẻm njauk pacang veik, dom urang ngak pahla mai daong biak rilo, sa-ai oh kanal hadar abih. Yaok harei jeng hu menuac ba pandap mbang mesup, lisei var jala, njam patam, baoh kraoh, ralow, ikan... nao tal sang.

Jeng meng nan bo menuac dalam hẽm sa-ai daok, thau jum pataom gauk jang, halan hatian klah rabha ka gauk. Tuk oh ka hu jit, Bei Gon biak jar var, urang halei jeng glaih glar haong bruk hit, ngak mbang duah jien. Yau nan bo harei ini bruk anit ranam gauk oh hu panuac halei piah ndom hu abih!

J it tamuh tabiak, rilo bruk daong ka urang kan kandah yau bruk: lisei 0 đồng, sruh radaih 0 đồng, sạp njam 0 đồng, ATM brah, tu la-an duh ka bhap bini... patui gauk tabiak rai. Caik di labik 100 jalan Ung Văn Khiêm (quận Bình Thạnh), tu la-an duh ka bhap bini di sa-ai Nguyễn Tuấn Khởi yaok harei pabak njam patam, baoh kraoh, baoh ada, baoh menuk ... brei ka urang kan kandah. Urang halei kurang ye mai mek, urang halei labaih ye meda buh tame piah daong gauk. Lingiu di tu la-an nan, yaok harei sa-ai Khởi haong ayut sahabat daok hu padang 4 ging lasei tahanek 10.000 pok lisei brei ka urang daok dalam labik brei daok karei, labik pacang veik.

Sa bruk ngak karei lac ATM brah, yaom lac oh bahrau min hu daong ka rilo menuac yam tapa kan kandah. ATM brah hu caik di rilo labik yau: Sang bac mầm non Bông Sen (phường Thạnh Lộc, quận 12, TP.HCM), Labik pato pasram quân sự quận Tân Phú, Sang uraniah quận Phú Nhuận... Di labik ATM brah di phường Thạnh Lộc, yaok harei hu jaik 50 urang halan hatian gam gam hu mbaok piah alin hadiah brah saong peih “labik pablei pandap 0 đồng” ka mikva dalam phường, yaok harei alin hadiah ka rahra 2 tấn brah haong 2 tấn njam patam, baoh kraoh hu urang ngak pahla meng rilo labik payua mai.

Saong daok hu biak rilo, oh khan abih hu dom bruk klah rabha kan kandah, daong brei ka gauk, brei mboh hatai anit ranam di bhap bini ban raya, ba gauk yam tapa tuk kan kandah./.

Urang lang: Mousaphuong -17/7