Dom urang lin bộ đội Biên phòng salih gauk hu mbaok khik iek luac harei melam di dom labik pacang cakak

Lac tỉnh hu jalan tapen negar atah labaih 468 km haong taneh ia Lào, hu rilo jalan pasang iek tapen negar, pacang tame negar suan hukum hu Bộ đội Biên phòng  Nghệ An peih ngak samu gauk, grauk labik saong hu siam lagaih. Dalam nan, iek praong jalan pathau khan tal bhap bini bhum tapen negar. Đại tá Dương Hồng Hải, Phaok akaok Bộ chỉ huy Bộ đội Biên phòng tỉnh Nghệ An brei thau: “Kol dahlak ngak siam bruk pathau khan tal yaok rahra daok di bhum tapen negar, plaih dom bruk ba tangin tame daong ba menuac tame negar suan hukum meng Lào; peih dom thung thư brei thau ka tội phạm di dom labik rah tui jalan tapen negar.”

Pachreih tui Bộ đội Biên phòng, jaik abih rahra dom xã tapen negar jeng thau paglaong akaok sahneng dalam bruk pacang caga jit Covid-19 yau cuk pataih pacang mbaok di labik hu rilo menuac, puh ramik haci hacih, pruh jru pametai anek ruak vil val labik daok. Abih di nyu lac ngak "tanye pang, meta maong" di Bộ đội Biên phòng tuk nao duah thau bruk, samar pathau khan tuk mboh dom menuac tame negar suan hukum hu mbaok dalam palei.

Anak bruk rah tabiak dak harei dak srau kadau di jit Covid-19, Bộ đội biên phòng tỉnh Quảng Bình hu padang 14 bilai pasang iek angaok jalan haluk sit, jalan praong di jalan tapen negar haong taneh ia Lào piah pacang cakak menuac meng bhum jit tame taneh ia drei. Thiếu tá Lê Ngọc Gia, Chính trị viên đồn Biên phòng Làng Ho, Bộ đội Biên phòng tỉnh Quảng Bình brei thau, dalam kan kandah, bộ đội hu bruk daong ba di rahra labik tapen negar: “Kol dahlak biak uan tabuan, yaom lac di jalan tapen negar bo kol dahlak khik iek, raidiuk mikva gaok rilo kan kandah min mikva hu rik daong drap ar, pachreih tui bộ đội. Dalam tukvak anak tal, kol dahlak meda ngak hu siam bruk pacang caga jit Covid-19.”

Tui jalan ngak lac “Pacang jit yau pacang khamang”, dom urang lin bộ đội Biên phòng tỉnh Quảng Bình salih gauk hu mbaok khik iek luac harei melam di dom labik pacang cakak angaok dom jalan sit, jalan praong nao mai haong taneh ia Lào. Dom urang lin oh huac kan kandah, glaih glar, mbang, ndih di kreh glai, padeih padei angaok dom baoh yin. Amuk Hồ Thủy, urang bangsa Vân Kiều daok di bản Eo Bù-Chút Mút, xã Lâm Thủy, huyện Lệ Thủy, tỉnh Quảng Bình drut drui khan lac, mboh bộ đội daok di kreh glai ram tapen negar biak kan kandah nan ye mikva daong, pabak prein ka dom urang lin ngak hu siam bruk hu jao brei: “Meyah mboh menuac oh krein, oh randap tapa jalan tapen negar ye kol dahlak khan brei bộ đội biên phòng thau piah dom sa-ai samar pacang cakak. Gam haong bộ đội phòng pacang jit Covid-19, oh brei tame puk palei di drei.

Kapul taduan raok rahra tame taneh ia di pabah mbang negar pakat dunya Cha Lo, tỉnh Quảng Bình brei thau, piah pasang iek catang dom menuac nao mai di dom labik tapen negar, Bộ Chỉ huy Bộ đội Biên phòng tỉnh Quảng Bình hu padang 14 bilai di angaok jalan sit, jalan praong haong taneh ia Lào. Đại tá Trịnh Thanh Bình, Chỉ huy trưởng Bộ đội Biên phòng tỉnh Quảng Bình brei thau, gam haong bruk nao mai pasang iek, Biên phòng tỉnh Quảng Bình bhian jak ba mikva bhum tapen negar ba tangin tame bruk pacang caga jit ruak Covid-19: “Dom kapul pasang iek biak catang dom menuac nao mai saong peih bruk khik iek rah tui jalan tapen negar. Gam haong nan, pambuak bruk jak ba mikva dalam palei paglaong hatai sahneng ka bruk pacang caga jit, saong brei pataih pacang mbaok, puh ramik haci hacih dom puk palei.”

Po, pathau mikva saong taong abih gauk, dalam tuk jaik abih rahra bhum tapen negar ba tangin tame pambuak haong gah chức năng khik caga tapen negar sron mbon, siam mekre, rik daong pacang caga jit ruak Covid 19, jeng daok hu menuac pagam pambak tame quyền hạn saong bruk ngak di drei, daong ka kol kanjah jhak. Mikva daok kanal hadar halei oh, bahrau ini, bruk ba 200 urang tabiak tame negar suan hukum tapa jalan tapen negar Bản Lầu (huyện Mường Khương, tỉnh Lào Cai) njauk cap mek, hu rilo “thủ đoạn tinh vi” di kol nan hu ngak cambaih. Njauk caik hatai lac, urang dang tabiak daong ka kol rilo mbang ba hu menuac tapa negar, lac Thôn đội trưởng – urang hu mbaok tame bruk pasang iek jit ruak Covid-19 haong Biên phòng.

Kayua yau nan ye, meda ndom lac, meyah yaok rahra sahneng oh njauk, oh ginup ka bruk biak jhak di jit ruak Covid-19 ba mai ka rup drei saong ka puk palei, ye Bộ đội Biên phòng hu rabau tanye, rabau meta, hu mbaok di yaok ratuh rabau labik khik iek di dom jalan sit, jalan praong, jeng oh cakak klaoh hu abih bruk caong ngak di kol jhak, dom jalan talei, kapul nyaom ba menuac tabiak, tame negar suan hukum./.

Urang lang: M. Phuong – 30/12