Urak ini Việt Nam hu rilo brah pahe saong hu chất lượng siam

Tui ong Nguyễn Văn Đôn - Akaok Công ty brah Việt Hưng, tỉnh Tiền Giang, yaom brah Việt Nam tagok dalam tukvak katut panak meng blaoh nan lac kayua bruk blei patagok dalam tukvak katut panak min suai lavik chất lượng brah jeng lac bruk ka yaom brah pablei tabiak negar langiu. Chất lượng brah oh samu gauk ba tal bruk padang angan brah Việt Nam tapa rilo thun jeng oh ka hu siam tagok hadom. Binah prong  brah Việt Nam pablei tabiak negar langiu tui lô ka dom doanh nghiệp blei brah tame eng drei tame kadung saong ba pablei, oh ka mboh hu dom angan je karei meda dang tabiak pablei tapak tal urang blei mbang. Dom doanh nghiệp meda pablei brah pahe tabiak negar langiu ngan haong angan je karei biak takik hu saong brah pablei jeng biak takik.

Dalam tuk nan, ong Phạm Thái Bình,  Tong Yam ndok Cty Ngak nong Công nghệ glaong Trung An ndom lac, urak ini Việt Nam hu rilo brah pahe saong hu chất lượng siam, yau nan min binah prong doanh nghiệp pablei brahViệt tabiak negar lingiu daok biak mbuan dalam bruk pablei salih, daok taduan pablei yaom biar jang Thái Lan piah pablei samar. Cagar veik, dom urang pablei brah tabiak negar langiu di Thái Lan daok pambak tame rilo cơ hội piah khik veik brah, ginum biai hu yaom meng pablei nan ye tuk halei jeng dang akaok dunya ka yaom pablei tabiak negar langiu, kein laba mek tame glaong jang. Việt Nam hu brah ST24, ST25 hu brei angan lac brah bingi abih dunya min jeng oh ka tagok yaom pablei tabiak negar langiu hu kayua doanh nghiệp oh ka thau jalan meyaih khan angan je, patagok yaom ka asar brah.

Tui ong Nguyễn Văn Đôn, doanh nghiệp pablei brah tabiak negar lingiu di Việt Nam jeng thau sahneng tal tal bruk pasiam veik chất lượng brah piah patagok yaom min bruk paglaong chất lượng brah pambak tame biak rilo bruk saong sa drei doanh nghiệp kan si ngak hu.

Piah hu brah siam yau gauk brei hu bruk samu gauk meng pajaih, khak, ilamu pala drak di urang nong tal bruk mblang hamu, yuak kuak, khik piah saong ngak tabiak. Piah ngak hu yau nan, brei pala drak praong min anak meta mboh lac bruk peih prong mblang humu prong dom thun tapa daok hu rilo tavak tavaiy. Sarak taneh riya oh brei adat ka doanh nghiệp pataom veik hamu taneh prong, dalam tuk nan urang nong jeng daok ngak sit sot tui ilamu meng kan. Doanh nghiệp pablei tabiak negar langiu njauk nao blei brah meng rilo labik karei ngan haong rilo janih saong chất lượng brah karei di gauk.

Bruk pambuak gauk di doanh nghiệp haong urang nong jeng biak lamar lamuac. Urang nong caong khin hu kein laba cambaih laih meng hu mbaok tame  mblang hamu prong dalam tuk doanh nghiệp tok meda blei tame tui yaom darak pasar ye oh sanya blei tame tui yaom di urang nong caong khin. Tuk hu mbaok tame pambuak gauk ngak mblang hamu prong doanh nghiệp njauk buh jien tame ngak samu gauk meng bruk pabak pajaih, pandap panda, jru khik caga phun paka, urang jakar pato pathram, pasang iek ilamu pala drak tal bruk cơ giới hóa, bruk blei tame, sang mac sai padai, gilang khik piah ngan haong phun jien buh tame ngak biak prong.

Dalam tuk nan, sarak daong di Karja, di tỉnh ban ngan haong mblang hamu prong oh ka ba mai kein laba hu mboh di anak meta. Ong Lâm Định Quốc, urang dahlau diah ngak Yam ndok Công ty Lương thực Sóc Trăng brei thau, padang angan je ka asal brah njauk peih akaok meng bruk ngak tabiak  hu asar brah janih yau gauk, siam yau gauk, yau nan min bruk ngak padai pataom sa labik di Việt Nam urak ini biak takik. Oh ndom pak halei atah, di Bhum taneran kraong Cửu Long, labik ngak padai prong abih di taneh aia ye bruk padang mblang hamu prong jeng oh mek hu jak jeng siam mekre yau hatai caong khin. Yaok sa baoh sang hu 5 công hamu (5.000m­2) saong bal thei thei ngak nan ye bruk pandar mac moc jamriak, đầu tư pajaih saong ilamu jeng biak kan. Pala drak oh siam gheih ye kan si padang hu angan je. Makna di nyu mai meng rilo gah, daok gah sarak, hukum taneh riya jeng daok hu rilo kadha pambuak pagam haong hamu taneh, dalam tuk nan sa doanh nghiệp kan si pambuak haong yaok rituh yaok ribau baoh sang urang nong./.

Urang lang: Jasi – 05/09