Tal tuk 13 yaok harei, di 3 labik blei pataom paneing meda di palei Nhơn Lộc I, ban sit Phong Điền, huyện Phong Điền, ban Cần Thơ, hu rilo menuac ba paneing meda mai pablei ka dom thương lái dok cang. Paneing meda oh ka jaoh dhar blei hu di yaok labik labaih 400 kg sa harei. Tui sa urangi blei paneing meda, dahlau deih saai blei paneing taha pablei veik ka dom urang di ban roya HCM song Hải Phòng. Min labaih 1 bilan ini mai, urang salih tapa blei paneing meda song yaom biak glong. Tuk yaom glong di abih lac 72.000 đồng sa kg, urak ni dok labaih 40.000 đồng sa kg. Yaok mbang urang buh brei dahlau ka saai meng 30 tal 50 triệu đồng, hu tuk tagok tal labaih rituh triệu đồng piah blei paneing meda. Urang blei paneing ini jeng brei thau, tuk tangi sua makna di bruk blei paneing meda, dom urang nan oh ndom hagait.

Tangi sua langiu nan urang jeng oh thau. Hulin sua lac blei piah ngak hagait ye urang oh thau, tok jalei lac hu menuac pandar blei. Bloh blei paneing meda dak harei dak khang, hu urang padeih ngak hồ piah nao paik paneing. Sa harei urang duah hu 5- 6 rituh ribau đồng meng pablei paneing meda. Karja palei oh pacang cakak kayua paneing ni nyu oh độc hại, urang pandik bao tử jeng ye urang ruak me-ik saradang jeng bhian mbang..

Meng bruk dahlau deih hu mbaok dom thương lái TQ blei kaya nong hu yaom glong di bhum taneran krong CL ye bruk blei paneing meda urak ni hu caik tabiak dom nghi vấn dalam bhap bini di huyện Phong Điền. Tui saai Trần Trung Tín, dok di palei Nhơn Lộc I, ban sit Phong Điền ye thương lái TQ blei paneing meda urak ni ngak kan knadah praong tal KT di mikva dalam suai lavik. Kayua tui saai Tính ye paneing taha hu ba tabiak gah barak pablei yaom meng 4 tal 5 ribau đồng sa boh. Min urak ni tui saai thau, yaom paneing taha siam gah barak hu jhul yaom tagok glong kayua paneing taha dak harei dak takik, kayua paneing meda di bhum taneran krong CL daok paik abih. Saai Trần Trung Tín jeng brei thau, tui thủ đoạn urak ni di thương lái TQ, nyu nyu buh tabiak sa pok jien sit meda ngak ka urang nong having akaok kayua kein liba sit mboh di anak meta bo var nao dom kein laba suai lavik. Saai Trần Trung Tính mboh lac:

Bruk pablei paneing tui hulin mboh meyah 50.000 đồng sa kg song tabiak tal Hải Phòng kuhria abih chi phí ye jiak 120.000 đồng sa kg,  labaih 6 đô la Mỹ. Di huyện Phong Điền blei hu meng 500 – 700kg/sa harei, tui yaom 6 đôla Mỹ ye abih tih oh hu hadom. Min urak ni paneing taha dok chit kayua tuk vak ni paik paneing meda biak rilo. Urak ni yaom paneing taha 5 ribau đồng, daok urang pablei tal tangin urang blei pandar hu tuk lac 10.000 đồng.

Ndom biai haong urang vak di rayo sap ndom VN, ong Nguyễn Lạc, Phó Chủ tịch kapul urang nong huyện Phong Điền brei thau, urak ni di huyện Phong Điền bruk blei paneing meda daok rah tabiak khang. Tui kuhria mboh di ong Nguyễn Lạc ye bruk blei paneing meda mbang ni hu rilo rủi ro tuk yaom kaom hu jhul tagok glong jang 10 mbang dut song tuk karei. Urak ni, karja palei oh pacang cakak bruk mik va pablei paneing meda min hu dom jalan ngak piah kakei urang nong plaih bruk salih bruk pala drak.

Tui ong Nguyễn Lạc, anak meta karja palei hu tui iek bruk pablei salih paneing meda di dalam huyện piah samar hu panuac tham mưu ka urang pan akaok ban sit saong tacei jalan ka mik va dalam bruk patagok phun pala, khik kajap rai duik. Abih di nyu nan lac hu panuac kakei bhap bini jhui mboh kein liba di anak meta bo salih tapa pala paneing. Meyah ngak yau nan, khat lihik oh thau yau habar meyah dom thương lái padeih blei.

Tapa duah thau ye thau lac thương lái ba nao pablei di Hải Phòng piah ba tapa TQ. Kayua yau nan ye urak ni, tui bruk di kapul urang nong khol hulin hu panuac kakei mik va urang nong oh salih janih phun pala, tak klak phun mbang boh piah pala paneing, oh salih phun pala ngak oh siam tal bruk sx song kein liba harei hadei.

Yau nan, anak bruk blei paneing meda dok rah tabiak khang di Cần Thơ song dom tỉnh dalam bhum taneran krong CL ye bruk prong di abih nan lac bruk hu mbaok di gah chức năng piah samar khan brei thau cambaih laih song tacei jalan ka urang nong. Khang hatai oh caik ka mikva urang nong pang tui panuac pacuh pajarak salih tapa pala paneing, oh nduac tui kein liba anak meta bloh taduan mek khat lihik suai lavik kayua oh hu menuac blei, pataom jeng mbuk bloh ba nao tuh klak yau rilo rilo janih phun karei karei hu rah tabiak dahlau deih./.