Di ban raya HCM urak ini hu jaik 300 urang dahlau daih ngak bol lin bhian hu mbaok tame chiến dịch sajarah dak rai ĐBP. Yaom lac umo taha praong thun min dom urang lin samar dahlau nan bhian taom gaok gauk, klah rabha ka gauk dom bruk dom kadha tapa mban liên lạc meng kan ĐBP. Dom harei ini, dalikan hu dom Wa, dom cei ndom ralo di abih nan lac dom mbang taong, dom kỷ niệm njauk hadar di ĐBP 60 thun dahlau. Kadha vak “ký ức Điện biên” di Minh Hạnh, urang vak daok di ban raya HCM hu khan brei thau veik dom dalikan yau nan. Daa mikva saong taong abih gauk tui pang.

Đại tá padeih hưu Đinh Công Ty thun ini umo 80 thun. Dalam chiến dịch ĐBP 60 thun dahlau, ong lac sa dalam dom urang lin daok ranaih abih di mblang mesruh, tuk umo bahrau 19 dua pluh, barau tame ngak lin. Tuk nan, meng quân khu 4, ong saong dom urang ngak lin saong gauk dalam đại đoàn 312 nao labaih sa bilan tame tal mblang mesruh Điện Biên, meng  dua gah takai saong 40kg quân trang, quân dụng angaok bara. Tal labik, đại đoàn di ong taduan bruk dang mesruh di labik Him Lam. Eng ong hu brei bruk, tacei jalan pambuak bruk di đại đội 3, tiểu đoàn 11, trung đoàn 141. Đại tá Đinh Công Ty hadar veik:

“Dalam chiến dịch ĐBP, taong abih jeng lac lệnh truyền miệng tapak oh hu harak gar. Tuk nan chỉ huy meng panuac. Điện đàm tok  hu di pakat trung đoàn tagok saong bộ tổng chỉ huy mặt trận chiến dịch. Daok đại đội, tiểu đoàn nan lac meng dok, meng tín hiệu. Lệnh di đại đội trun trung đội A, trung đội B lac njauk sangka hagait, pabak hagait ye liên lạc tuk nan tok pandar cambuai, takai nduac, ruon ala lubang. Nao yau nan gaok tuk chiền hào thông, gaok tuk vướng thương binh ye brei talap veik bloh nao trun. Sa mbang talap yau nan,  ye cối 60 ly patuh, jaik metai”.

Dalam đại đoàn 312 tuk nan, hu Nguyễn Thị Cân, tuk nan lac kamei Hà Nội, hu bac tapa tal quân y bloh tame mblang mesruh ngak y tá. Meng labik lac oh ka hu sa harei halei glaih glar, tame ĐBP, amuk Cân gaok ginup abih dom glaih glar, rambah rambup, mboh di anak meta bruk pandik harau, saong mbuan metai lihik. Urak ini umo 86 thun, amuk jeng daok kanal cambaih dom mbang gam saong bác sỹ blac draih ka thương binh bo oh hu janih jru pran atau jru cadu pandik halei, dom mbang gui thương binh nduac ala mbom, ala siu, dom melam tram hajan kua phao khik ka kabu liệt sĩ klah athur glai… Yau nan, bo dalam mblang mesruh biak khang biak khốc liệt, amuk Cân jeng daoh, jeng juak ariya, ndom dalikan di rup drei saong di đồng đội:

“Candiah asal phao njauk dalam kandol takai, oh hu jru pran, ong Tại likau: raih metah ka dahlak nao, caik ye dahlak oh nao dil đơn vị. Tuk nan, hatai di urang lin khang lo, oh saneng hagait tal rup drei. Tuk nan dahlak biak anit đồng đội.

Meng dom anek menuac, dom dalikan yau nan hu ngak jeng sa ĐBP “tatuan megei baoh taneh, dane angan dunya”. Sa dalam dom urang hu mbaok di ĐBP meng tuk kuhria caga  tal tuk jayah, thau dom bruk praong, dalam saong hu khan brei thau dom quyết định di tổng tư lệnh Võ Nguyên Giáp, lac Trung tướng Lê Nam Phong. Tuk nan, ong Lê Nam Phong pan akaok đại đội 225, đại đoàn 308, taduan bruk dang mesruh di cụm cứ điểm Độc lập.

Ong Lê Nam Phong daok kanal cambaih hoàn cảnh saong bruk tabiak rai quyết định salih jalan taong, meng “taong samar, jayah samar” tapa “taong kajap, yam tagok kajap” saong jalan taong yau Yuan lac “vây, lấn, tấn, diệt” di tướng Giáp tuk nan. Quyết định ini hu ba bol bala drei nao tal jayah di ĐBP. Jalan taong ini jeng nao tui đại đội trưởng Lê Nam Phong meng chiến dịch ĐBP, tal akaok sư đoàn 7 – quân đoàn 4 Lê Nam Phong dalam chiến dịch HCM sajarah dak rai 1975, bloh tham mưu trưởng quân đoàn 4 Lê Nam Phong tuk nao ngak nghĩa vụ quốc tế peih paha Phnom-pênh, CPC. Trung tướng Lê Nam Phong lac:

“Meng taong samar, langyah samar salih tapa taong kajap, yam tagok kajap. Tuk nan dui phao tame bloh min brei  dui phao tabiak veik. Đơn vị di dahlak njauk tapa thượng lào nghi binh, bloh taong tui  gah nan. Bruk hadah hadai, bruk naih gheih di mintri chính trị, di TƯ nan lac tacei jalan taong ĐBP tui jalan salih phương châm. Dahlak dak harei dak mboh thấm, nao bac dom taneh ia, urang biak pok meyaom jalan taong di drei. Nao bac di TQ, nao bac di LX, tapa nan urang tangi sua “kế hoạch ini lac di thei?. Kế hoạch ini lac di ong Giáp. Urang biak iek praong”.

Hadei di chiến dịch ĐBP, urang jakar, urang lin di dom đơn vị daok ba gauk nao tui dom mbang taong, dom bruk sajarah dak rai praong di taneh ia. Yaok menuac yaok urang jeng hu praong tagok gam saong dom jayah nan. Min dalam hatai di dom urang dahlau daih ngak bol lin điện biên, 60 thun tapa, oh tuk halei var hu, tuk halei jeng mboh hadah mbaok meta saong hatai sahneng ka jeng daok tamo./.