Palei Akô Thông dok di jhung jalan Trần Nhật Duật, ban sit Buôn Mê Thuột, lac hình mẫu puk palei di urang Tây Nguyên dok di kreik pasak ban sit ngan song dom boh sang tah tui kiến trúc meng kan di urang Ê Đê. Ni lac palei prong hu meng lavik saman. 

Boh sang atah lac labik rah tabiak dom bruk ilamu, paling kakuh muk kei song pataom gauk dalam dom tuk ngak adat yau: likau njauk padai, kakuh suan padai, me-in cồng chiêng, ndom khan, daoh, tamia. Mik va urang Ê đê di palei Ako Thông dok khik hu dom ilamu meng kan, song bhain peih dom melam pataom gauk tong cồng chiêng. Ngan song urang Ê Đê, công chiêng lac pandap ginreih, lac suan yava di drei. Tapen jeik alak cần song dalah apui hadah melam, sap chiêng yau sap dak dalikan di urang Ê Đê meng tuk bahrau padang palei, dane tagok sap khang di bhum ceik glai.

Mbang cemereip mai du lịch VN, hu rivang iek sang atah meng kan song hu menyum alak cần, hu maong lagu tamia cồng chiêng gheih mekre di Buôn Ma Thuột, saai Natalia, urang tuai Nga biak ấn tượng ka ilamu bản địa song mboh lac, ni jalan pato ilamu bahrau bo saai hu mboh. Saai  Natalia lac:

 Ni lac mbang cemereip khol hulin mai tal VN song hu thau rilo bruk siam ka ilamu VN. Tuk mai tal ni, khol hulin jeng mboh sa jalan pato pakai bahrau, nyu karei jang dom bruk hagait bo khol hulin hu thau, hu pato di taneh ia drei. Khol hulin mboh bruk karei di gauk di 2  nền ilamu karei, bruk nan biak chreih chrai.

Dok saai Nikolai,  urang tuai Nga mai meng ban Ekaterinburg,  negar Nga, mbang cemereip hu menyum alak cần song hu thau ka ilamu Ê đê, saai mboh biak chraih chrai haong bruk menyum alak di labik ni. Abih di nyu tuk thau lac alak cần hu ngak meng brah ye saai dak mboh chreih hatai jang ka janih alak ni. Saai  Nikolai lac:

Ni lac mbang akaok meti hulin hu menyum janih ia hu ngak meng brah, di negar hulin alak Vodka hu ngak meng nguyên liệu karei. Ka 2 nan lac bruk menyum alak di labik ni jeng karei, urang oh menyum yaok urang yaok cavan karei bo menyum meng cần, patui gauk  menyum.

Gam song dom kein lagaih hu gah kiến trúc song ilamu, yaok urang dalam palei jeng thau paglong hatai sahaneng ka bruk khik ramik song yaih khan ilamu bangsa drei brei ka tuai damuai thau. Ong Ama Pi, sa urang di palei  Ako Thông, ban sit  Buôn Ma Thuột brei thau:

 “Kapul cồng chiêng di palei khol hulin daok khik hu kayua tong abih gauk jeng ba abih hatung hatain tabiak, tuk halei jeng khin khik ilamu di drei piah yaih khan tal taong abih menuac sia, tong abih bhum palei  dalam song langiu negar thau hu janih ilamu di urang Ê đê. Abih di nyu nan lac, yaih khan brei urang thau piah ba gauk khik ramik saong patagok ilamu yau ini.

Palei Ako Dhông lac sa dalam takik dom puk palei Ê Đê urak ni dok khik hu dom ilamu meng kan biak karei, biak gheih di urang Ê đê, lac sa muinyim ka ilamu Ê đê di kreik ban sit Buôn Mê Thuột. Bruk njauk caik hatai dahlau di abih tuk mai rivang palei Ako Thông nan lac nyu hacih saat, gheih, mekre yau sa blah rup cih. Labik ni hu mong lac sa labik mai rivang oh kurang hu dalam tour du lịch tal Ban Mê Thuột./.