Dalam tukvak mbeik drei tame dunya, urang chăm an giang thau pambuak tame  bruk daong di islam dunya piah padang cơ sở vật chất, hạ tầng patagok kinh tế, paglaong akaok saneng, hu taom gaok rilo ilamu… Pandar siam dom bruk daong dalam negar, yau danak dak 134, 135 piah patagok kinh tế baoh sang, patagok dom palei ngak meng kan.

10 thun mai ini, hạ tầng kỹ thuật di dom palei chăm dalam tỉnh dak harei dak hu ngak siam. Dom bruk pabak ka raidiuk bhap bini yau điện, jalan mbak, sang bac, blai iek ruak hu karja padang ngak ginup piah pabak bruk ngak mbang, bac daa saong nao mai di bhap bini. Dom danak dak daong meng rajaei yau danak dak 134, 135 (patagok cơ sở hạ tầng dalam bhum urang bangsa) patagok hu kein lagaih, daong ka palei chăm patagok. Urang chăm dalam tỉnh oh daok cang bruk daong di karja, bo mikva thau duah jalan ngak mbang ka sang drei piah duah jien diuk rai. Langiu dom bruk ngak meng kan yau menyim sà rông, khan bai, raong pabe, limo saong ngak padai… urang chăm daok thau ba drei tame saong patagok siam dom cơ hội mai meng bruk hội nhập kinh tế dunya di taneh ia. Ralo sang hu tagok ban raya HCM peih nhà hang, pablei dom janih pandap mbang halal ka urang islam mai du lịch di VN yau cà ri limo, pabe, lisei nị, har tapei jan. Ong Ka Rim brei thau:

 “Sang dahlak dom thun tapa ngak mbang hu saong kaya meda tagok meng hội nhập ba mai. Kol dahlak hu peih nhà hang, pablei dom janih pandap mbang halal ka urang islam dunya tuk urang mai ban raya HCM ngak bruk atau nao du lịch. Meng nan, dahlak raong hu diuk anek saong hu jien payua nao palei daong mikva kan kathaot dalam palei”. 

Langiu bruk peih nhà hang, khách sạn duh ka urang islam dunya, urang chăm An Giang daok hu peih labik pablei khan ao, pandap cuk ka urang islam, pablei ka tuai du lịch mai meng dom taneh ia yau Malaysia, Indonesia, dom Tiểu Vương quốc Ả Rập thống nhất, Libi… dom janih Makhana, khan me-om di urang kamei, kapiak saong sarong urang likei pablei hu biak ralo. Hu ralo urang peih xưởng, ngak dom pandap ini piah pablei ka tuai du lịch. Saai Ro Hy Mah lac:

 “Tuk camereip, kol dahlak ngak dom pandap piah pablei iek. Hadei ini, mboh pablei hu, pablei laik nan ye kol dahlak peih xưởng ngak khan ao pableika tuai du lịch mai meng dom taneh ia islam di dunya”.

Urak ini, langiu bruk daong di rajaei tapa dom danak dak 134, 135… dom palei chăm dalam tỉnh daok hu bruk daong di dom taneh ia islam di dunya. Cambaih laih nan lac, yaok thun, sang bac đại học islam, gilang pariak patagok châu Á, tập đoàn dầu khí negar Malaysia… jeng hu brei ka anek kamuan palei chăm ralo paok jien bac piah nao tapa dom taneh ia patagok bac daa. Hu yaok rituh anek kamuan urang chăm nao bac, ngak bruk di dom taneh ia ini. Ini lac sa rai rah urang chăm barau, urang gam hu bac da-a glaong, gam hu ilamu, abih hatai jai ka bruk dak padang palei negar. Ong Mách Sa Lế, phaok akaok mban lambaok bhap bini chăm islam tỉnh An Giang brei thau: “Langiu bruk daong di rajaei saong puk aplei dalam tỉnh, bhap bini chăm islam tỉnh An Giang jeng taduan hu bruk daong meng dom taneh ia islam di dunya. Urang daong ngak tatua tuan, ngak sang bac mầm non bangsa chăm, blai y tế saong ralo bruk karei karei”.

Patagok pren khang di drei, pambak tame bruk daong di gah lingiu, urang chăm An Giang dak harei dak patagok, mbeik drei tame hu siam lagaih saong dunya, bo daok khik hu ilamu bangsa. Ong Jac Ky, akaok mban lambaok bhap bini chăm islam tỉnh An Giang brei thau: ‘tukvak anak tal, mban lambaok bhap bini islam tỉnh AG patui bruk daong meng dom taneh ia gah langiu piah payua anek kamuan nao bac dom taneh ia, piah hu ilamu, duah jalan ngak mbang. Patui khik ramik saong patagok dom yaom glaong ilamu meng kan bo dom rai rah urang chăm hu buh pren yava tabiak dak padang. Gam saong Đảng, karja, bhap bini islam dak padang rai diuk văn minh, baoh sang ilamu di dom palei chăm dalam tỉnh”.

Tui ong Go Sa Ly, Chánh Văn phòng Ban lambaok bhap bini islam  tỉnh An Giang ndom lac: mbeik drei tame bruk ngak mbang dunya, urang kamei chăm oh daok dalam sang yau dahlau deih, bo hu yam tagok hu mbaok tame dom bruk bac megru, ruah duah ilamu, nao ngak bruk di dom taneh ia patagok yau Malaysia, Indonesia, Ấn Độ, Libi, Ả Rập… Urang kamei chăm jeng hu tagok sân khấu daoh tamia, rik daong tame bruk daoh tamia di dom palei chăm dalam tỉnh, ngak brei dom palei chăm dak harei dak chreih chrai jang./.