Piah pasiam veik hadei di tuk ndih kandang, rilo labik ravang me-in, labik  brei pah bilik daok dalam tuk ravang me-in di tỉnh Bến Tre hu ba tangin tame caga dom bruk piah taduan raok tuai mai ravang me-in, tui jalan khik kajap bruk pacang caga jit COVID-19. Urak ini Bến Tre hu 70 dalam 162 labik ngak du lịch dalam tỉnh tut angan ngak bruk veik dalam tuk siam mekre bahrau.

Bến Tre bahrau taduan raok kapul 40 tuai du lịch ban raya HCM camereip abih hadei di jit Covid-19, daok dalam danak dak ravang me-in “Bhum hijao palei la-u”. Sa-ai Nguyễn Công Khanh (tuai dulịch daok di quận 1, ban raya HCM) brei thau: Mai Bến Tre, bruk njauk ndom tal di abih lac dom labik ravang me-in jeng hu pambuak ứng dụng khoa học công nghệ, pambak tame prein khang du lịch sinh thái hu blaoh piah cakrok. Tukvak jit ruak, piah nao du lịch ye drei brei klauk ginup 2 mbang vaccine, tour du lịch hu peih tui jalan pacang sre, khik kajap salamat nan ye tuai mboh sahanang hatai tuk nao ravang me-in di tukvak ini.

Tui taong yaom di rilo doanh nghiệp lữ hành, Bến Tre lac labik hu rilo prein khang piah cakrok du lịch haong dom bruk ravang me-in chreih chrai, rilo janih, yau ye: ravang me-in kraong ia, bein kayau; ravang iek labik halau gha pambuak haong ilamu - sajarah; ravang me-in pambuak haong palei ngak meng kan, palei bingu kiểng, baoh kayau Chợ Lách; ravang me-in tasik Ba Tri, Bình Đại, Thạnh Phú; ravang iek pambuak haong pandap mbang palei la-u … biak lagaih haong tuai du lịch di ban raya HCM.

Ong Võ Thanh Sơn, Phaok Yam ndok Pasak brei thau peih bruk ravang me-in, Sở Ilamu thể thao saong du lịch tỉnh Bến Tre khan lac, jalan ngak di Bến Tre lac taduan raok tuai mai tui tour pacang sre piah daong duah mboh, pacang caga jit, tapa nan rik daong cakrok gah du lịch. Pasak daok taong yaom veik labik tut angan ngak bruk tui dom tanut siam mekre, salamat. Urak ini, bruk jit ruak daok pasang iek hu siam, Bến Tre lac labik nao tal lagaih haong dom tour du lịch siam mekre, salamat, dui pachreih, lagaih ka dom doanh nghiệp lữ hành di ban raya HCM peih ngak, kayua labik nao mbuan lagaih saong jalan nao tal Bến Tre atah oh hadom.

Piah peih veik bruk ravang me-in palei la-u, tỉnh Bến Tre hu panuac ieu gah ilamu, thể thao saong du lịch pambuak bruk haong dom gah pambuak tal, hu jalan ngak yau gauk dalam tuk peih bruk, taduan-raok tuai damuai; jak ba dom doanh nghiệp, labik ngak mbang gah du lịch patagok rilo janih du lịch; sangka patagok janih du lịch ndung bak bruk ravang me-in kraong ia palei la-u, patagok bruk pambuak gauk cakrok janih du lịch, tour, tuyến du lịch dalam  tỉnh, dalam bhum, pambuak dom bhum, cakrok du lịch pambuak haong khik ramik, patagok dom yaom glaong ilamu meng kan, inem mek sajarah ilamu, dom rija meng kan di puk palei piah pamere saong dui pachreih tuai mai ravang iek.

Anak tal, gah du lịch Bến Tre jeng brei jhul khang bruk peih ngak, yaih khan du lịch, brei thau ka labik nao tal ravang me-in di Bến Tre - “Ravang me-in bhum hijao palei la-u”; jhul khang bruk pandar công nghệ 4.0 dalam khik iek gah du lịch saong bruk brei thau, pathau khan, peih bruk du lich. Bruk salih bahrau dalam peih ngak, yaih khan piah ngak jeng bruk pambak tabiak praong dalam gah yaom glaong ilamu, thaot binguk, angan du lịch palei la-u Bến Tre tal tuai du lịch dalam saong langiu taneh ia, peih ngak hu siam dom danak dak, jalan ngak, pambuak bruk patagok du lịch haong dom tỉnh, abih di nyu lac pambuak gauk peih ngak hu siam bruk sanya gauk pambuak bruk cakrok du lịch ban raya  HCM haong 13 tỉnh, ban bhum taneran kraong Cuu Long vaktu 2020-2025, pambuak gauk patagok bruk ravang me-in gah timur bhum taneran kraong Cuu Long. Peih praong bruk pambuak gauk patagok du lịch haong dom tỉnh, ban dalam taneh ia saong khu vực piah peih praong tour tuyến, ngak jeng pandap du lịch bahrau piah dui pachreih tuai dalam saong langiu taneh ia./.

Urang lang: Ai Nghiem -11/12/2021