Pathau mikva saong taong abih gauk! Mbang Kate, sa dalam dom rija praong abih di bhap bini Chăm Ahier di Ninh Thuận hu rah tabiak meng harei 11 tal harei 13/10 ini. Dalam dom harei ini, gam saong dom palei chăm dalam tỉnh, bhap bini 2 palei ngak meng kan lac palei lan am Bàu Trúc saong palei menyim khan bai Mỹ Nghiệp, huyện Ninh Phước jeng daok jar var kuhria caga dom pandap barau piah pablei ka tuai damuai mai rivang palei ngak dalam tuk mbang kate. Urang pambuak bruk Văn Cảnh saong Minh Triều hu kadha vak brei thau ka bruk nan. Daa mikva saong taong abih gauk tui pang:

Lac urang kak gam lavik thun saong bruk menyim khan bai chăm Mỹ Nghiệp, bruk bui sambai praong abih di amuk Thuận Thị Trào dalam tuk mbang kate ini, lac dom nghệ nhân di palei hu pasiam veik 7 bingu la klak piah yaih khan tal tuai damuai daok dalam saong langiu taneh ia. Kate thun ini, palei mỹ Nghiệp hu caga labaih 100 janih pandap, yau kadung bak, ao, bop, ba lô, khan lang bàn… piah taduan tuai mai rivang, blei pandar. Taphia di nan, Mỹ Nghiệp daok hu ramik veik duk parang iek piah duh siam jang ka tuai du lịch dalam tuk mbang kate. Amuk Thuận Thị Trào – nghệ nhân menyim khan bai chăm Mỹ Nghiệp, xã Phước Dân, huyện Ninh Phước, tỉnh Ninh Thuận brei thau:

“Labik menyim di dahlak daok caga dom janih pandap ka harei kate thun 2015 lac dom mẫu mã barau, dom pandap barau saong dom bingu la, dom pandap jhik gia công piah taduan tuai mai mbang Kate thun 2015. Tuai mai rivang palei Mỹ Nghiệp ralo nan ye labik di kol dahlak kuhria caga biak tani tanat dalam tuk mbang kate thun 2015 ini”.

Di palei ngak lan am chăm Bàu Trúc, dom nghệ nhân jeng daok samar ngak pandap hu mẫu mã barau piah caga taduan kate meng kan di urang chăm. Urak ini, palei ngak Bàu Trúc hu labaih 200 baoh sang ngak lan am meng kan, pachreih hu labaih 1.000 urang ngak. Langiu dom janih pandap meng kan hu bhap bini takre yau: rup patau bimaong chăm, rup patau kamei yang Apsara, dom nghệ nhân daok hu ngak dom bingu la, hình thể angaok dom pandap lan am ka nyu mekre meta jang. Amuk Đàng Thị Phan – nghệ nhân palei ngak lan am chăm bàu Trúc, xã Phước Dân, huyện Ninh Phước, tỉnh Ninh Thuận lac:

 “Caong khin dalam tuk mbang kate pandap di drei, dalam palei drei ngak habar piah par atah hu piah drei patagok. Meyah pandap di drei dalam taneh ia thau ye langiu taneh ia urang oh ka thau ye drei ngak yau habar piah bruk cuh, sah jangaih, bingu la piah tuai du lịch mai maong iek kayua taneh ia lngiu urang takre thủ công jang”.

HTX lan am chăm Bàu Trúc hu caga ralo pandap pabak ka bruk blei pandar di tuai damuai dalam tuk mbang kate. Dalam nan, hu dom janih pandap barau, pandar piah trang trí yau: lọ bingu, 12 drei lasak, bình phong thủy, phù điêu trang trí nội thất saong dom pandap pandar yaok harei dalam sang. Urak ini mikva xã viên daok samar ngak ka nyu salah bloh dom pandap hu mẫu mã mekre piah pablei ka tuai mai maong iek. Saai Trần Ngọc Minh Hoàng – urang tuai mai meng ban raya HCM chreih chrai khan lac:

 “Mai rivang labik ini adei mboh takre di abih lac bimaong, labik tabung bimaong chăm piah ngak jeng biak kan saong biak ralo chi tiết, tapa nan mboh lac urang chăm biak gheih, kayua ini lac dom pandap biak sơ khai bo urang hu ngak tabiak bimaong hu ralo chi tiết kan yau nan adei mboh biak gheih saong ilamu di urang biak dalam. Mbang nao ini biak chreih chrai saong ilamu chăm daok kandaong veik dalam adei  biak ralo”.

Uan raok kate thun ini, bhap bini dom palei ngak meng kan chăm ninh thuận dak chreih chrai jang tuk rai diuk dak harei dak kaya meda jang, bruk ngak tani tanat. Ngan saong urang, duh ka tuai mai mbang kate oh lac bruk hadah mbaok meta bo ini daok lac tuk piah ka mikva yaih khan dom ilamu siam mekre meng kan di palei chăm dalam tuk padang ngak palei pala barau./.