Palei Cam Bình Đức, xã Phan Hiệp, huyện Bắc Bình lac palei ngak lan  meng tangin daok veik di Bình Thuận

  Dalam hatai saneng di bhap bani, palei ngak lan meng kan Bình Đức tuk halei jeng chreih chrai meng hu rilo radaih tame tabiak palei piah pablei salih, pajeng ba lan. Urang likei dalam palei jan van haong bruk mek haluk lan, duah njuh, daok urang kamei ye kaong ka-ing harin haluk, srau haluk, tapat lan. Dahlau diah di Bình Đức sang halei jeng ngak lan, urang halei jeng ngak lan. Bruk ngak “amaik pato veik ka anek” ini hu ba mai rai diuk trei sil ka urang Cam di labik ini. Min nan lac dalikan di 10 thun dahlau, urak ini bruk ngak lan di palei lan Bình Đức daok takik nao, baoh sang tui bruk ngak meng 100 urak ini daok 64 baoh sang min. Ong Trần Xuân Phong, Phaok Akaok Miuyim Bình Thuận brei thau, makna ba tal bruk nan, lac kayua yaom pablei lap, takik hu menuac blei:“Pandap lan ngak tabiak ye oh hu darak pasar piah pablei, mikva eng drei nao pablei, karja oh ka hu jalan ngak, oh ka sangka duah darak pasar ka mikva. Saong sa kadha tra nan lac pandap panda mikva ngak tabiak mboh rilo lac kaya pandar dalam sang.”

Oh lac gaok kan kandah dalam bruk duah labik pablei bo urak ini pandap piah ngak lar yau haluk lan, njuh cuh jeng daok kurang biak rilo, saong dak harei dak kan duah. Kayua kurang nan ye yaok sruh radaih limo haluk lan dahlau diah yaom 300 tal 400 ribau đồng ye urak ini tagok meng 500 tal 600 ribau đồng. Yaom haluk tagok min kan blei hu. Urang ngak Nguyễn Thị Minh caong khin…

Anak bruk yau nan, bilan 12/2020, UB bhap bani huyện Bắc Bình hu tacei pato gah chức năng saong lambaok dom baoh sang ngak lan nao pasang iek piah duah labik hu rilo haluk lan. Tapa pasang iek mboh labik di palei Hải Thuỷ, xã Hải Ninh, huyện Bắc Bình hu haluk lan biak prong, laghaih piah ngak lan. Yau nan min, labik haluk lan ini daok dalam taneh quốc phòng kayua Ban Chỉ huy quân sự huyện Bắc Bình khik iek.

  Ong Huỳnh Duy Khôi, Phaok Akaok UB bhap bani huyện Bắc Bình, tỉnh Bình Thuận brei thau, huyện hu pok panuac caong Sở Padang ngak pathau khan tagok urang pal akaok tỉnh saong dom sở ngành pambuak tal piah pasang iek:“Sở Padang ngak jeng hu harak payua ka UB bhap bani tỉnh brei thau ka bruk nan. Kayua asal di haluk lan piah ngak gaok glah nyu karei jang haluk ngak kiak nan ye jeng pok likau pabak tame, meda caik tabiak mblang taneh 3ha ini piah ka mikva mek haluk lan njauk tui Hukum Khoáng sản.”

Daok ong Võ Văn Hoà – Akaok Sở Công thương Bình Thuận ndom lac, langiu di haluk piah ngak ye bruk duah labik pablei ka pandap panda jeng njauk kuhria tal; taphia di nan njauk hu quy hoạch karei ka bruk ngak di palei ngak lan Cam Bình Đức: “Njauk hu urang buh jien tame ngak bo urang nan brei hu hatai oh kayua pablei salih, bo kayua khin khik veik bruk ngak lan saong cak rok patagok bruk ngak ini dalam harei hadei piah duh ka bruk rivang ma-in nan ka meng veih tagok hu saong cakrok hu. Daok meyah caik yau urak ini biak kan piah ngak.”

Tapa pasang iek, hu thau hu palei ngak lan jeng gaok kan kandah yau palei ngak lan Bình Đức, Bình Thuận min hadei di tukvak quy hoạch cak rok patagok jeng palei ngak ye palei ngak lan ini hu salih bahrau mbaok meta saong dak harei dak hadah hadai, nan lac palei ngak lan Hamu Craok di Ninh Thuận. Kayua yau nan ye, hu rilo panuac lac gam haong bruk duah haluk piah ngak, njauk nao duah thau piah bac megru ilamu saong pandar ngak tui piah cak rok patagok palei ngak lan Bình Đức yau jalan ngak di palei ngak lan Hamu Craok piah rik ndaong khik ramik palei ngak lan Cam meng kan di Bình Thuận./.

Urang lang: Jasi – 31/05