Miến Giới Phiên lac sa janih pandap di tỉnh Yên Bái hu tui damuai dalam taneh ia takre. Meng sa palei ngak miến biak thủ công, tal urak ini ralo công đoạn ngak miến hu ngak meng jamriak. Yaom lac jalan ngak hu salih barau, min miến Giới Phiên daok khik hu chất lượng luac dom pluh thun tapa. Tết mai, sang halei jeng ngak miến piah pablei ka drak pasar, min oh ginup, dalam palei tuk halei jeng hu urang cang miến ngak tabiak piah blei ba nao ban praong. Kadha vak di urang vak di rayo sap ndom VN daok di Tây Bắc brei thau ka bruk nan. Daa mikva saong taong abih gauk tui pang:

Dom harei jaik tết, langik Yên Bái pandiak siam, biak lagaih ka bhap bini Giới Phiên pambu miến. Nao angaok dom jalan dalam xã, maong tabiak gah halei jeng mboh dom candaih sambo patih meng yaok rituh, yaok ribau phên miến daok pambu pandiak. Angaok mbaok bak ia hauk dalam dom harei brak di bhap bini labik ini, jeng brok tagok dom bui sambai, chreih chrai.

Bruk ngak miến hu ba tame xã Giới Phiên, ban sit Yên Bái, tỉnh Yên Bái meng labaih 50 thun dahlau. Tukvak patagok di abih, dalam xã hu tal 120 baoh sang ngak miến, ngak hu jaik 250 tấn miến thu yaok thun. Urak ini, dom baoh sang ngak miến dalam xã daok hu labaih 70 baoh sang, ralo meng pataom di palei 6 - xã Ngòi Đong.

Yaok harei, sa baoh sang ngak 150kg tapung that, ngak hu 100kg miến. Dahlau daih, dom baoh sang jeng pala dong saong ngak miến min kayua darak pasar blei dak harei dak ralo nan ye taneh pala dong oh pabak ginup. Piah hu ginup tapung piah ngak, bhap bini ngak miến brei pataom blei tapung dong tal HN, Điện Biên, Sơn La. Dom thun njauk lagaih, yaok baoh sang ngak miến dalam 2 tal 3 bilan tết meda mek tame meng 60 tal 70 triệu đồng jien laba, sa yaom jien oh takik ngan saong dom urang nông tok pamaong tame mblang hamu. Saai Hà Thị Tuyên, palei 6 Ngòi Đong brei thau:

 “Thun ini ngak jeng hu. Urak ini yaom 35.000 sa kg ye yaok tạ tapung jeng laba hu dom rituh ribau. Dahlau tal urak ini ye ngak tabiak du halei jeng oh ginup pablei. Kayua ngak hu chất lượng saong uy tín nan ye ngak hu du halei pablei abih du nan”.

Ngak miến dong di xã Giới Phiên jeng daok ngak tui baoh sang. Urak ini bhap bini di labik ini oh daok ngak thủ công yau dahlau. Mac ép hu bhap bini ruah duah saong salih barau, patrun hu pren ngak, hộp ép miến hu bọc meng thép patih, khang jang saong khik kajap vệ sinh jang. Jaik di ini, dom danak dak pachreih công, pachreih nông di tỉnh Yên Bái saong ban sit Yên Bái hu daong phun jien ka dom baoh sang blei mac iak pandar điện, hệ thống chạy phên meng jamriak.. biak lagaih ka bruk ngak mbang pablei salih. Yaom lac ralo công đoạn hu ngak meng jamriak, min bhap bini Giới Phiên jeng ngak tui njauk quy trình saong hu dom bí quyết karei piah ka miến palei drei kan hu labik halei duk hu. Amuk Phạm Thị Đào, umo 75 thun, daok di palei 6 Ngòi Đong, xã Giới Phiên brei thau:

 “Drei papaoh ia ralo, papaoh tapung tasak ye nyu dai, papaoh kỹ ye nyu oh sạn. Drei halang ka nyu ralo, khoắng tasak bingi ye nyu bingi oh hu bruk hagait”.

Piah yaih khan ka palei ngak, dalam dom mbang công tác tal dom labik karei atau taom gaok ndom meyai nao mai, hội họp, ban sit Yên Bái saong xã Giới Phiên bhian mek miến dong ngak pandap alin, hadiah. Miến dong Giới Phiên jeng hu mbaok dalam dom mbang nyaom darak pasar dom tỉnh ban dalam taneh ia, hu tui damuai meyaom kayua rak miến dai, lacam, hadah, siam, khik hu lavik, abih di nyu nan lac oh pandar hợp chất thực phẩm. Ong Nguyễn Thạc Tác, phaok akaok UB bhap bini xã Giới Phiên brei thau:

 “Kayua palei ngak miến di Giới Phiên hu meng lavik mai nan ye Đảng ủy, karja xã tacei pato dom baoh sang ngak miến brei khik kajap uy tín, chất lượng. Ban sit Yên Bái jeng biak sangka hu dom dự án daong ka dom baoh sang ngak miến piah ngak tabiak luac thun, bhap bini Giới Phiên biak chreih chrai. Thun 2015 ini, ban sit jao ka xã ngak tabiak 600 tấn miến thu pablei tabiak darak pasar piah  patrun kathaot khang kajap”.  

Dom harei ini, miến Giới Phiên hu dom urang pablei salih pataom blei ba nao tal ralo ban praong dalam taneh ia piah pablei tết. Urak ini sa kg miến bingi di palei Đong hu yaom 35 ribau, min tuk tabiak truh palei, nao tal dom drak praong dalam tỉnh Yên Bái nyu hu yaom meng 50 tal 60 ribau, tal dom ban praong dalam taneh ia ye yaom nyu glaong jang. Kayua yau nan ye ralo urang nao duah menuac krein mai tal Giới Phiên duah blei janih miến đặc biệt ini mai ngak pandap alin, hadiah./.