Urang lin dok dong padang sang veik ka mik va di bhum jit 

          Bruk uak hacih, pruh jru pametai anek ruak dom labik tangin pan…., urak ini jeng bruk bhian randap yaok harei di rilo sang dalam tuk hu jit. Gam haong nan, bruk ngak tui 5 paka di Mintri Y tế jeng hu dom menuac dalam yaok sang kakei gauk ngak. Amuk Lê Thị Vinh daok di Đào Duy Anh, Hà Nội lac:

Sang dahlak njauk gauk ba tabiak dom bruk pacang caga jit dalam sang, urang praong bhian randap bloh, min uraniah jeng daok brei kakei, pato, pahadar. Yau bruk takik tabiak jalan tukvak ini, oh tapa sang karei me-in, mesup ndih tagok brei kalung pabah haong ia sara, pahat rup. Tame thang máy oh menyai gauk, bhian rao tangin.

Taphia dom bruk bhian randap tamuh tabiak dalam tuk hu jit, tukvak tapa, hu biak rilo danak dak daong ngak pahla, dom bruk, dom jalan ngak gheih dalam klah rabha, daong ka urang kan kandah hu pambak praong di rilo labik dalam taneh ia. Pak halei hu labik pacang veik ye di pak nan, dom bruk ngak siam mekre hu tamuh tabiak, menuac sia daong brei gauk dom pandap oh kurang hu, yau ye pataih pacang mbaok, ia jru pamerai anek ruak, pok njam, brah, ikan, sara…

Njauk caik hatai lac, bruk hu mbaok di dom menuac hu angan dalam pasak jit di ban raya HCM meng blaoh hu daong pachreih bruk ngak pahla. Ca sỹ Thái Thuỳ Linh khan lac:

Meyah daok di Hà Nội, atah di Bei Gon 2.000 mbaik jalan saong tok iek, tok pang dom khau tin ye drei oh daong hu hagait ka Bei Gon, daok meyah drei hu mbaok di pak nan, tantu drei ngak hu rilo bruk. Nan ye harei hadei drei par tame chip.

Nghệ sỹ Tuyết Thu jeng brei mboh hatai bui sambai tuk hu mbaok tame dom bruk ngak pahla daong ka urang kan kathaot, urang gaok kan kandah kayua jit ruak:

Thu hu mbaok tame rik daong hasit prein yava piah klah rabha haong mikva kan kandah dalam jit ruak. Yaok urang sa hatung hatian, kol drei ba tangin tame.

Bruk “anit ranam gauk”, “hala siam pacang hala tahak” di urang Việt dak brei mboh cambaih tapa biak rilo bruk daong, yaom lac takik atau rilo meng dom urang ngak nong yau sa-ai Trương Ngọc Hà daok di Sóc Trăng:

Taneh ia gaok rilo kan kandah, sang hu raong 01 bingun ikan labaih 1 tấn, payua daong ka dom labik ngak mbang huak di gah pacang caga jit piah hu ikan mbang dalam var lisei.

Lac menuac hu mbaok dalam rilo danak dak ngak pahla, hu mboh dom bruk ngak siam, daong ka rahra dalam pasak jit, nhà văn Nguyễn Quang Vinh ndom lac:

Tuk taneh ia gaok bala meng langik tasik, njauk rabuk, ia sua, abih di nyu lac jit ruak yau ini, ye bruk bhap bini anit ranam gauk nyu hadah tagok. Bruk daong ka gauk dalam tuk kan kandah hu daong ka ilamu siam mekre di urang Việt hu patoa veik meng rai ini tapa rai daih. Kol drei njauk patagok prein khang ini, nan lac bruk biak siam, biak hu yaom glaong.

Meda lac kol drei oh var hu bruk dom urang y tế di labik pacang jit jeng daok harei melam daong ka urang ruak, dom y bác sỹ meng grauk labik dalam taneh ia ba gauk mai daong ka gah meraong, atau dom kapul, nyaom ngak pahala oh huac kan kandah, glaih glar, nao tal yaok jalan sit, ba brei dom pok lisei, dom pandap mbang ka urang kan kandah. Bruk anit ranam gauk, daong ba gauk, jum pataom gauk, nan lac ilamu mekre, biak hu yaom glaong di urang Việt Nam daok hu khik ramik saong patagok./.

Urang lang: Mousaphuong - 4/9