Dom bimon kalan hu tuai damuia biak takre 

Ngan haong sa-ai Nguyễn Thị Hồng Thu daok di Quận 3, bal raya Hồ Chí Minh, Mũi Né hu jeng labik bhian randap di baoh sang. Saong bahrau ini, Pandanus Resort lac labik bo baoh sang sa-ai palih ruah piah padeih padei. Sa-ai Hồng Thu brei thau, Pandanus Resort lac labik dahlak payua hatai jia ka mbang padeih padei di baoh sang, dahlak biak takre resort ini kayua lac labik hijao ngan haong rilo phun kayau mbang baoh, langik biak hacih sa-at. Taphia di nan, Pandanus daok hu pandap panda duk ndih siam gheih jeng yau mbuan pandar, dom pandap mbang biak bingi di bhum tasik gam haong langik tasik laneng lanoi, hacih sa-at... Yau nan min, kadha daok ngak ka sa-ai Thu caik hatai di abih nan lac ilamo Cam hu brei mboh pak ini tapa dom sambo màu nâu bhong di kiak am, dom klaih rup patau biak karei. Tuai damuai mai ini daok hu iek, hu pang ragu ragam Cam biak gheih hu parang me-in meng dom kapul urang Cam daok pak ini: 

  "Sang dahlak mai pak ini rilo mbang paje, dom kaya mbang di bhum tasik ini, dom labik gheih mekre biak pachreih dahlak saong hu sa kadha bo dahlak mboh biak takre nan lac ragu ragam Cam saong pandap panda ilamo di urang Cam hu paramg iek dalam resort ini."

Daok ini lac makna ngak ka sa-ai Trầm Lâm – jeng lac sa tuai mai meng bal raya HCM bhian palih ruah Pandanus Resort ngak labik mai ka mbang padeih padei di drei,

"Mai haong Resort Pandanus ini langiu di mblang tasik biak mekre daok hu kapul daoh tamia biak gheih, biak bingi pang. Dahlak biak takre resort ini, kan var hu. Resort ini ngan haong dahlak lac biak gheih, biak mekre".

Mai haong Pandanus Resort, tuai damuai meda mong mboh hu dom thaik binguk bhian randap di urang Champa meng kan, meng bingu la sarak di mblang gah anak di resort tal dom rup patau di dom po Yang yau Shiva, Brahma, Vishnu… hu parang tabiak di dom jalan nao. Abih di nyu lac, thaik binguk di dom urang daoh tamia Cam dalam khan ao meng kan salam raok tuai damuai meng dom ragam ragu di sap Ghinăng, Paranưng biak karei, hu prein dui pachreih tuai tamuai meng di tuk akaok merep. Abih di nyu lac labik parang iek dom janih pandap panda ilamo Cam yau: Daneng menyim meng kan, kadung bak, ao ngak meng jih dalah…Taong abih yau ngak brei ka tuai damuai hadar veik sa janih ilamo meng kan di urang Cam pak bhum taneh Bình Thuận.

Ngan haong 10ha bein, mblang tasik saong dom mbuan laghaih piah ma-in padhih, dom công ty saong kapul nyaom dalam negar jeng yau negar langiu hu caik hatai jia tuk palih ruah labik ini piah peih ngak dom bruk prong, payak mbang me-nyum, ngak lakhah. Labik bein saong duk nyaom biai hu padang ngak laghaih ka dom bruk ma-in padhih, dom bruk ngak langiu langik.  

Amuk Đỗ Thị Mỹ Hạnh – Akaok jabat Pablei salih saong meyaih khan di Pandanus Resort pak Mũi Né, bal Phan Thiết, tỉnh Bình Thuận brei thau, meng akaok thun tal ini kayua jit ruak Covid -19 nan ye tuai damuai dunya oh hu hadom. Tui nan, jabat jeng hu pasiam veik saong ngak bahrau cơ sở hạ tầng, padang ngak rilo jang 134 duk, patagok jeng 257 duk.

  "Abih di nyu lac padang ngak labik pasak nyaom biai Champa Center angaok mblang taneh 650 m2 piah taduan raok dom kapul nyaom tuai damuai dalam saong tuai damuai dunya tuk Việt Nam peih pabah mbang veik. Daok ndom ka urang ngak ye khaol dahlak jeng hu peih rilo tal piah pato pathram ka urang ngak, pabak jang ilamu ngak bruk dalam tukvak ini"

Pandanus Resort jeng hu salih mbaok meta brei thau bahrau ka laghaih haong jalan ngak mbang cak rok patagok kinh tế pambuak pagam haong khik ramik ilamu puk palei, pacang khik alam môi trường. Langiu di bruk ngak mbang kinh tế, jabat ini daok hu bruk ngak lac ba thaot binguk di Mũi Né mai jaik jang haong tuai damuai daok dalam negar saong angaok dunya.

Piah hu sa labik hijao – hacih – mekre duh ka tuai damuai rivang ma-in, jeng yau caong khin payua kadha lac sa tangin haong gauk pacang khik môi trường, yaok bilan Pandanus Resort jeng hu peih ngak harei pataom ka môi trường. Tui nan, harei Jip akaok meti di yaok bilan, taong abih urang ngak nao dhul hareik oh lac tok dalam resort di drei bo daok nao tabiak gah langiu mbuan cuah bhong saong dom labik jaik taphia. Hu tukvak pambuak bruk haong dom labik yau: dom adei anek saih di sang bac THPT Bùi Thị Xuân, urang jakar công an, biên phòng di Mũi Né… piah pambak prong kadha, meng nan manuac sia drei jak gauk pacang khik alam môi trường.

Meng dom kham merat brei ka bhap bani saong inem mek ilamo puk palei caik veik dalam hatai tuai damuai, Pandanus Resort daok daong ngak brei medeih veik gah rivang ma-in di Mũi Né jang yau di tỉnh Bình Thuận hadei di tuk vak cuang kandah kayua jit prong covid-19./.

Urang lang: Mousaphuong -29/11