Dom mblang taneh khat lahik kayua tua riya pandiak bhang dalam vụ mùa saong đông xuân thun ini di tỉnh Kiên Giang tagok tal labaih 34 ribau ha nyu ngak kan kandah tal rai diuk, bruk ngak mbang di labaih  18 ribau baoh sang. Tui kuhria mboh, taong abih mblang taneh ini jeng daok pak bhum U Minh Thượng. Khat lahik kayua pandiak bhang, mbak njaom tame jeng oh ka padeih veik bo daok mboh dak harei dak khang jang. Kiên Giang hu nyaom biai saong peih ngak chip dom jalan ngak piah pacang  mbak, samar daong ka urang ngak nong pala drak veik.

Ong Lê Hữu Tâm, daok di palei Lô 2, xã Hưng Yên, huyện An Biên ngak  25 công padai. Bilan đông xuân ini oh mek hu sa asar padai halei kayua nyu paiy pait abih. Ong Tâm brei thau: Bilan hè thu dahlau nan, yaom lac padai thu lagu min jeng daok mek hu dom jak sa công, daok vụ ini oh hu hagait. Urak ini sang ong daok tavak jien blei pajaih, khak drak, jru cavao di dom đại lý labaih 50 triệu đồng. Anak bruk tua riya pandiak bhang khang yau nan, ong Tâm jeng yau bhap bani labik ini meda klaak taneh saoh tal jaik puac thun meng pala drak hu saong dalam tukvak ini ralo urang njauk nao duah bruk ngak karei. Ong Tâm drut droi lac: Thun ini langik tua riya pandiak bhang khang. Tuk drak jeng daok aia taba. Drei oh thau lac nyu mbak samar yau nan. Pandik harao ralo kayua drei oh daok jalan duah jien nan ye njauk nao duah bruk karei ngak, daok pak sang jien pak halei piah bayar sre khak drak, daok pak sang thun tal jeng tavak sre, dua klau thun hadei taneh  jeng pablei abih.

Ong Ngô Trấn Hỷ, kaok phòng nông nghiệp huyện An Biên brei thau: urak ini dalam huyện hu labaih 500 ha taneh oh pala drak hu kayua njaom mbak. Dalam tuk nan huyện An Minh dak harei mblang taneh njom mbak dak ralo, urak ini hu jaik 6 ribau ha taneh njaom mbak oh ngak padai hu. Pak xã Vĩnh Phong di huyện Vĩnh Thuận dalam vụ ngak padai hu jaik sa meteh mblang taneh pala drak di xã, jaik 2 ribau ha oh pala hu padai. Oh lac gaok pandiak bhang, kurang aia pala drak, bhum U Minh Thượng daok kurang gam aia pandar. Abih di nyu nan lac pak dom labik tapen tasik aia taba dak kan duah jang saong biak chit.

Di 4 xã dalam huyện An Minh nan lac Vân Khánh Đông, Vân Khánh, Tân Thạnh saong Đông Hưng A bhap bani njauk nao blei aia taba pandar dalam dom bilan tapa. Sa-ai Phạm Thị Hận daok di palei Mương Đào C dalam xã Vân Khánh brei thau: yaok bilan drei pandar jaik 4 kuang aia, yaok kuang jaik 600 lít yaom 35  - 40 ribau đồng. Daok atah di pasak huyện jaik 1km min bhap bani labik ini njauk nao blei aia taba mai pandar. Ralo sang cao bingun mek aia min aia njaom mbak khang nan ye cao blaoh oh pandar hu. Sa-ai Phạm Thị Hận daok brei thau lac: Cao bingun min oh pandar hu kayua mbak, mbak ralo. Bhap bani pak ini cao ralo, rah rah tui ini khoan ralo ralo min pandar oh hu kayua mbak.

Tui kuhria mboh oh ka ginup abih, bilan padai mùa pak Kiên Giang tok mek hu labaih 204 ribau tấn, trun labaih 79 ribau tấn dut haong bilan ini thun dahlau. Vụ đông xuân mek hu jaik 2 triệu 105 ribau tấn, trun jaik 120 ribau tấn dut haong bilan ini thun dahlau.

Tui kuhria mboh dahlau di Viện khoa học thuỷ lợi gah meraong: bilan thu thun 2015 – 2016 lac thun hu mbak njaom tame samar saong glaong jang tukvak ini thun dahlau. Tui kuhria mbak daok patagok tal abih bilan 5/2016 meng 9 – 22g/l di kraong Cái Lớn, Cái Bé, pambak tal aia pala drak saong ia pandar di dom huyện bhum U Minh Thượng. Dom thun jaik di ini, độ mbak duk hu angaok dom kraong praong di huyện An Minh, Vĩnh Thuận meng 20 – tal labaih 30 phần ribau. Langik tasik dak harei dak pandiak yau urak ini meda ngak ka tua riya, njom mbak dak catang jang. Urak ini huyện Hòn Đất daok hu jaik 20 ribau ha padai thu đông daok mbuan njaom mbak. Dalam tuk nan, huyện Giang Thành, Kiên Lương daok samar beik binek cakak mbak piah daong ka yaok ribau ha padai daok veik. Bhap bani di labik ini yau daok angaok apui”./.