Jaik sa thun tapa, urang ngak di Công ty ia menyum Tân Hiệp Phát, ban Thuận An, tỉnh Bình Dương jeng daok mboh huac meng bala di Nguyễn Văn Nhớ  umo 44 thun, palei di Tiền Giang. Dalam tuk daok ngak pasiam jalan điện ngaok lầu sang xưởng, sa-ai blait takai, laik trun metai. Sa bala karei kayua điện handok ngak brei sa-ai Hà Trọng Tấn umo 18 thun, palei Cà Mau metai tuk daok ngak bruk di sa công ty di ban sit Bến Cát. Ini lac 2 dalam 40 urang metai kayua bala meng bruk ngak dalam 1.012 bala rah tabiak di Bình Dương thun 2020, tagok 167 mbang dut saong thun 2019, dom urang gaok bala daok veik njauk ruak kik dalam rup luac rai. Lingiu di nan, yaok thun Bình Dương daok hu yaok rituh urang ngak njuak ruak kayua bruk ngak.

Ndem ka makna ba tal dom bala dalam tuk ngak bruk, ruak kayua bruk ngak thun hadei glaong jang thun dahlau, ong Trần Ngọc Vân- Phaok akaok Công đoàn dom Khu công nghiệp Bình Dương langyah, langiu bruk oh tani tanat di urang tuk ngak bruk ye rilo doanh nghiep oh ka peih bruk pasram dom jalan ngak piah khik salamat, oh tui iek tuk ngak bruk; oh caik hatai pasang iek, pasiam mac jam riah, pandap panda saong oh hu khan ao khik caga rup ka urang ngak: “Dahlak mboh lac, bruk pabak pandap khik caga salamat ka urang ngak ye rilo doanh nghiep hu sangka min daok hu labik ngak oh ka siam. Abih di nyu, lac doanh nghiep mbuan hu bala rah tabiak dalam tuk ngak bruk, ruak kayua bruk ngak glaong yau gah  ngak kayau, ngak tôn, thép oh ka ngak hu siam”.

Yaok thun Bình Dương hu yaok ribau urang gaok bala dalam tuk ngak bruk, ruak kayua bruk ngak, bruk nan oh lac pandik pandua di baoh sang bo daok lac bruk haduh hatai biak biai di manuac sia. Dom doanh nghiep jeng khat lahik oh lac takik tuk buh tabiak jien iek ruak, jien baya, jien daong; ngak jhak tal angan je,  bruk ngak mbang pabeli salih meda njauk klaik klaoh. Jeng kayua yau nan, doanh nghiep jeng daok maong iek veik bruk ngak di drei dalam bruk padang labik ngak bruk salamat.

Công ty TNHH Omron Healthcare Manufacturing Việt Nam, di khu công nghiệp VSIP II Bình Dương lac sa công ty ngak siam. Dom thun tapa, Mban yam ndoc Cty tuk halei jeng kham padang labik ngak bruk hijao -hacih- salamat. Ong Nguyễn Thành Châu, Trợ lý akaok jabat Tổng vụ Công ty Omron brei thau, Cty hu padang kapol nyaom hu 12 urang piah khik caga salamat ka urang ngak bruk, bhian pasram ilamu khik brei salamat ka taong abih urang jakar, urang ngak saong pasang iek jamraih piah pasiam tuk hu bruk kan kandah rah tabiak:“Ba jamriak birau tame pandar ye brei hu taong yaom gah bala. Dom urang di Mban khik iek salamat trun mai dut iek mac jamraih, meyah mboh mbuan hu bala ye brei pasiam veik meng ba tame ngak bruk. Bruk khik iek, pasiam mac jamraih hu mbaoh tangin saong gah langiu, mac sit ye kỹ sư di Cty brei khik iek pasiam”.

Piah padang labik ngak bruk hu salamat ka bhap bini, Công đoàn dom pakat di Bình Dương hu pambuak bruk saong công đoàn cơ sở tacei pato, pasram bruk khik brei salamat labik ngak bruk ka urang ngak. Dom công đoàn cở sở daok peih gam dom Mbang pakacah “Salamat, urang khik hacih naih joi” piah paglong akaok sahaneng, jalan ngak bruk saong kỹ năng ka dom urang khik brei salamat, hacih  sa-at naih joi di doanh nghiep.

Urak ini hu oh takik urang gaok bala dalam tuk ngak bruk, ruak kayua mac jamraih ngak bruk ba tal min bruk duah thau, pasang iek di dom đơn vị daok takik. Sở Lao động-Thương Binh saong Xã hội tỉnh Bình Dương mboh lac, kayua urang jakar pasang iek bruk salamat, hacih sa-at labik ngak bruk biak takik yau nan ye oh pasang iek hu abih rilo doanh nghiep. Ông Nguyễn Kim Khánh, Chánh thanh tra Sở LĐ,TB saong XH tỉnh brei thau, anak tal brei patagok bruk pasang iek:“Jabat khik iek di karja brei patagok bruk pasang iek  ngak tui bruk ba tabiak di karja ka salamat hacih sa-at di dom DN dalam tỉnh; caik hatai tal bruk padang ngak, jalan ngak bruk salamt di doanh nghiep. Thanh tra brei pakhang bruk pasang iek bala tuk ngak bruk ngan saong dom urang ngak bruk oh hu harak pambuak bruk ngak bruk”.  

Tui dom urang ilamu ka bruk khik salamat ka urang ngak, langiu bruk kham merat di dom gah piah khik salamat ka drei, urang ngak brei ndok urang pandar drei ngak bruk brei padang labik ngak bruk salamat piah trun takik abih bruk bala rah tabiak, ruak kayua bruk ngak. Langiu di nan, dalam tuk ngak bruk brei biak caik hatai sangka, kayua bala tuk halei jeng rah tabiak hu, oh langiu di sa urang halei./.

Urang lang: A.Nghiem  23/4/2021