“Passport vắc-xin” lac bruk daok hu rilo taneh ia angaok dunya ndom tal dalam tukvak jaik di ini tuk vắc-xin pacang Covid hu ba tabiak kalauk pacang. Ini lac harak hu brei ka  dom menuac hu klauk ginup 2 mbang vắc xin pacang Covid-19 piah meda nao tal dom taneh ia karei meyah hu brei adat tame. Meyah “Passport vắc-xin” hu ba tabiak pandar meda daong peih veik dom jalan par dunya, peih tabiak jalan pasiam veik kinh tế saong du lịch. Rilo doanh nghiệp gah du lịch di Việt Nam jeng daok caong ini meda lac jalan piah peih pabah mbang. Gam haong nan, doanh nghiệp jeng thau lac, bruk pandar“Passport vắc-xin” brei hu jalan nao khang kajap piah khik hu bruk pacang jit jeng yau khik salamat ka darak pasar du lịch dalam taneh ia urak ini. Amuk Bà Đoàn Thị Thanh Trà, Yam ndok Tiếp thị saong truyền thông Lữ hành Saigontourist khan lac: “Saigontourist jeng yau taong abih dom Cty du lịch jeng caong khin peih veik pabah mbang du lịch dunya di dua gah nao saong gah mai. Min kol dahlak sahneng lac dom jabat dom gah pambuak tal njauk roh duah tani tanat jalan peih “Passport vắc-xin”. Njauk peih ngak yau Yuan lac “từng bước” saong meda roh duah ngak iek haong dom taneh ia hu taong yaom glaong ka bruk salamat, pasang iek jit ruak piah gam ngak iek, gam taong yaom kein laba di anak meta”

Jeng sahneng mboh yau nan, amuk Huỳnh Phan Phương Hoàng, Phaok TGĐ Viettravel mboh lac, piah pandar “Passport vắc-xin”hu salamat ye dahlau di abih brei klauk vắc-xin ginup abih ka menuac sia di dom labik nao tal saong dom urang ngak gah du lịch. Lingiu di nan brei pato pasram paglaong ilamu pacang caga jit ka dom labik hu mbaok tame dom tour taduan raok tuai dunya, abih di nyu lac ka dom urang hu mbaok tapak duh ka tour. Amuk Phương Hoàng ba tabiak bruk bo negar Thái Lan daok ngak saong gah du lịch Việt meda bac megru: “Dahlak pagap yau urak ini di Thái Lan, lingiu di bruk daok cang brei pandar “Passport vắc-xin” ye urang jeng hu tacei pato dom labik daok saong dom labik ravang me-in piah pasiam veik saong caga taduan raok dom tuai hu “Passport vắc-xin”. Urang hu jalan ngak biak catang meng tuk taduan raok tuai tame Thái Lan blaoh nao tal labik bo tuai daok”

Daok bruk peih ngak iek “Passport vắc-xin” haong dom taneh ia, ong Nguyễn Việt Anh, akaok jabat khik ramik Lữ hành, Sở Du lịch ban raya HCM brei thau, urak ini dom taneh ia yau Singapore, Thái Lan, Nhật Bản, Nga... daok ba tabiak bruk ini haong Việt Nam. Min bruk pilih ruah jalan pambuak gauk peih ngak saong pambuak gauk tal halei jeng daok brei roh duah saong pasang iek tani tanat. Lingiu di nan, ong Việt Anh hu panuac caong lac, brei sahneng kuhria ruah jalan du lịch mbuan pasang iek, hu salamat saong takik gaok bruk oh siam: Ka sa lac du lịch y tế ye urang mai piah iek prein yava saong meda pambuak haong padeih padei di resort atau dom labik hu langik tasik siam, lac labik salamat, plaih nao mai rilo. Yau nan dahlak sahneng ini lac 2 janih bo kol drei njauk peih tabiak ngak dalam tuk camereip”

Meda mboh lac, piah pandar “Passport vắc-xin”, hu biak rilo bruk bo gah du lịch njauk ngak saong pambuak bruk khang kajap haong dom gah pambuak tal piah ngak ka nyu samu gauk, piah ngak hu 2 bruk haong gauk lac gam patagok kinh tế, gam pacang caga hu jit ruak. Hadei di labaih 1 thun mesruh haong jit praong Covid-19, Việt Nam lac taneh ia hu taong yaom glaong. Kayua yau nan ye, meyah peih ngak siam “Passport vắc-xin” ye meda peih tabiak jalan ka gah du lịch hu siam veik dalam khang kadang./.

Urang lang: M.Phuong -24/5/2021