Khik ramik ilamo pambuak haong patagok kinh tế meda ba mai dom salih bahrau biak siam

Sang saai Triệu Thị Thoa di xã Hợp Tiến, huyện Đồng Hỷ, tỉnh Thái Nguyên, bhian jhik dom blah khan aw meng kan di urang Dao. Oh lac jhik khan aw ka bhap bini dalam bhum, dom khan ao nan daok hu saai Thoa yaih khan di mangaok mạng xã hội piah ka rilo urang thau tal jang.  

Lac sang hu rilo rai ngak đông y, saai Triệu Văn Tiến daok di puk Bãi Bông, xã Hợp Tiến, thun 2016, saai Tiến peih bilik iek ruak đông y di sang. Sa dalam dom caong khin di saai Tiến lac ngak pasiam viek dom jru manei di ong muk amaik ame caik viek, piah yaih khan ka ilamo meng kan di drei. “Meng harei dahlak ngak jru taong ruak,dahlak ngak bồn kayau saong bilik manei biak siam ghieh. Meng nan, sang dahlak jeng ngak mbang hu tani tanat. Dahlak blei hu radaih, sang danaok biak kajap, anek bhik hu nao bac da-a ginup abih.”

Daok di huyện Định Hóa, dom inem krung ilamo oh maong mboh di mata di urang Tày, urang Dao jeng hu maong lac pandap du lịch, tuk pak ini padang ngak danak dak ka cak rok patagok du lịch bhap bini pambuak haong khik ramik, patagok dom yaom glaong ilamo, sajarah meng kan di dom bangsa. Ong Nguyễn Minh Tú, Akaok UBND huyện Định Hóa, tỉnh Thái Nguyên brei thau: Huyện kuhria padang 3 danak dak du lịch, piah dak harei dak kak kajap bruk cak rok patagok du lịch bhap bini saong khik ramik dom yaom glaong di ilamo: “Khol dahlak thau lac bhap bini lac pasak, mbang anak tal, khol dahlak meda daong ka bhap bini meng bruk ngak ngak pasiam viek sang danaok, pasiam viek labik menei ia, njul drei, blaoh pato pasram ka dom kapul rahra. Pagap yau bruk ngak dom pandap mbang meng kan, jhik khan aw, ngak pandap pabak ka dom kapul daoh tamia piah duh pamere rahra.”

Tui akaok Mintri – Chủ nhiệm Ủy ban bangsa Hầu A Lềnh, ilamo di dom bangsa hu rik tame bruk patagok prein khang jum pataom abih bangsa, lac sa dalam dom bruk pok paglaong labik dang di taneh ia di mangaok dunya. Mayah dom siam lagaih hu blaoh hu peih ngak siam, ilamo meda ngak tabiak dom prein khang langyah dom bruk kan kandah di bhap bini. “Tuk ngak du lịch bhum Tây Bắc, Trung du bhum ciek gah Barak, khol dahlak ngak brei mboh lac ilamo ba tal jaik mateh bruk cak rok patagok di kinh tế. Patagok kinh tế bahrau lac sa binah, peih ngak prein khang di kinh tế, dalam nan dom prein khang ka patagok kinh tế lac ilamo. Ini lac sa bruk bo kol drei oh klaak tapa hu.”

Khik ramik ilamo pambuak haong cak rok patagok kinh tế, paglaong jien mek tame di mikva bangsa takik meda lac asal kadha daok dalam Danak dak bruk ngak pakat negar cak rok patagok kinh tế xã hội bhum bangsa takik saong bhum ciek tukvak 2021-2030. Bruk ngak piah khik ramik ilamo pambuak haong patagok kinh tế, meda daok hu patagok dalam tukvak anak tal, rik tame bruk patrun kan kathaot samr drah, khang kajap di bhum bangsa takik./.

Urang lang: Thu Thao – 24/12