Pathau khan ka dom urang kumei thau cambaih  plaih di bruk pablei salih menuac

Urang kumei haong uranaih kumei, abih di nyu lac di dom bhum palei kan kandah, dom bhum jaik taphia negar, bhian lac menuac hu kol pablei salih menuac pamaong tal. Kol pablei salih menuac hu rilo kapul, nyaom, meng tỉnh ini tapa tỉnh daih, meng negar ini tapa negar daih, jalan ngak di kol nyu biak kan thau, kol nyu pagam pambak tame bruk khik iek cadu di amaik ame, di sang bac, tapa Zalo, Facebook, Viber…, kol nyu pachot piah ba urang nao pablei.

Meng bruk mboh lac dom urang njauk lah pachot kol pablei salih menuac rilo meng lac urang kumei saong uranaih kumei (abih di nyu lac urang bangsa takik), rilo thun ini mai, meng bruk lac lambaok iek glang, khik caga kein laba njauk adat hukum ka urang kumei haong uranaih kumei, Kapul urang kumei dom pakat hu jhul khang bruk khan brei thau, paglaong akaok sahneng, rik daong pacang caga meng gha bruk pablei salih menuac. Rilo bruk pathau khan pacang caga pablei salih menuac dalam bhap bini, di bhum ceik, bhum glaong, bhum taphia negar, labik hu rilo urang bangsa takik daok hu peih ngak, dom bruk tacei pato urang kumei hu hatai caong khin  nao tok pasang haong menuac negar lingiu, daong tapak ka urang gaok bala, padang dom bruk pathau khan lagaih haong bruk di anak meta, daong jalan ngak mbang duah jien ka urang kumei njauk urang ba nao pablei hu mai veik sang hu peih ngak di rilo puk palei. Amuk Hoàng Tuyết Ban, Phaok akaok UB bhap bini huyện Tủa Chùa, tỉnh Điện Biên brei thau: “Hadei di tuk hu daong paklah, adei sa-ai kumei bhian mboh huac, mboh melau, meng thun 2016 tỉnh hu tabiak sarak daong, min dom adei sa-ai kumei tuk  mai veik palei bhian melau oh nao ngak harak gar piah hu daong, tuk nao tal labik daong tapak ka adei sa-ai kumei gaok bala, urang meng mboh abih huac, abih melau saong caong khin patagok bruk ngak mbang, ba drei tame puk palei.”

Di tỉnh Quảng Trị, dom pakat kapul urang kumei pataom tame peih ngak rilo bruk siam lagaih, yau ye: peih ngak praong - dalam tal urang kumei saong bhap bini dalam puk palei, peih dom labik brei thau, pathau khan pablak tame dom mbang pataom mbaok di dom kalup kapul, dom kapul “urang kumei patak pataom, brei mesraiy”, kapul “daong gauk”, kapul “patak pataom saong phun jien mesraiy puk, palei”. Biak caik hatai sangka tal dom xã taphia negar. Amuk Đỗ Thị Lý, akaok Kapul urang kumei tỉnh Quảng Trị brei thau: “Dahlau di abih kol dahlak jhul khang bruk pathau khan tal urang kumei dalam kapul ka bruk pacang caga pablei salih menuac, dalam nan pataom tame dom jalan bleik saleik pablei salih menuac brei adei sa-ai kumei thau piah plaih, sangka tal bruk patagok ngak mbang ka adei sa-ai kumei, ba bruk ngak, tagok jien mek tame, piah daong ka adei sa-ai kumei ngak kaya meda angaok bhum palei di drei.”

Dalam thun 2020, Kapul urang kumei Việt Nam pakat negar hu peih ngak dom bruk ba tabiak “Jalan pathau khan salih bahrau bruk ngak di puk palei”, dalam nan pataom tame peih ngak dom bruk pachreih tui “Harei abih bhap bini pacang caga pablei salih menuac - 30/7” saong pathau khan haong negar Lào ka pacang caga pablei salih menuac, abih di nyu lac pablei salih menuac tapa jalan tapen negar Việt – Lào.   Kapul urang kumei pakat negar jeng hu pambuak bruk haong Bộ Tư lệnh Bộ đội Biên phòng peih ngak danak dak “yam nao haong urang kumei bhum taphia negar” vaktu 2018 - 2020, dalam nan, taduan mek, pabak brei dom labik hu rilo bruk pablei salih menuac 300 pok daong camereip ka urang njauk bala pablei salih menuac (yaok pok yaom 500.000 đồng).

Hadei di tuk urang njauk bala pablei salih menuac mai veik sang, Kapul urang kumei taduan mek, daong brei saong tacei pato piah ka urang hu jalan pilih ruah tuk camereip piah langyah dom kan kandah bo urang njauk nao tapa, daong ka urang oh daok mboh melau, tani tanat hatai sahneng piah ba drei tame puk palei saong pacang caga ka urang oh laik tame bruk pablei salih menuac veik. Hadei di nan, Kapul urang kumei puk palei daok hu daong piah ba dom adei sa-ai kumei mai sang veik hu siam mekre, salamat, daong ka adei sa-ai kumei ngak harak gar yau ye CMND, harak khai sinh ka anek……. Amuk Nguyễn Thị Minh Hương, akaok mban Tuyên giáo TƯ Kapul urang kumei Việt Nam brei thau: “Nao ngak mbang duah jien urak ini lac 1 bruk caong khin praong, min tuk drei nao tabiak negar lingiu ye drei brei thau drei nao haong thei, daok pak halei, labik ngak bruk yau habar, khol dahlak hu khan brei thau cambaih laih.”

Taphia labik dang di kapul urang kumei, daok brei hu bruk ba tangin tame samu gauk di dom gah, dom pakat dalam bruk pacang caga pablei salih menuac, meng caga tal mesruh pacang, pagui mek kol pablei salih menuac saong taduan mek, daong  urang gaok bala. Bruk ini piah peih ngak sarak an sinh xã hội, rik daong tame bruk khik hu siam mekre, sron mbon, tani tanat di puk palei./.

Urang lang: M. Phương – 07/01/2021