Baoh craoh ia pandiak Bưng Thị daok dalam Labik khik ramik alam langik tasik Tà Kóu, xã Thuận Quý, huyện Hàm Thuận Nam. Lac labik mekre meng po langik alin brei, labik ini daok hu langik tasik biak lahơi bingi, abih di nyu lac bingun ia pandiak 85 độ C, craoh ia pandiak Bưng Thị daok hu rilo bhap bini saong tuai damuai mai tal duah thau di tuk puac adit, abih di nyu lac dom harei padeih lễ. Pak ini tuai hu mboh di anak meta 1 baoh bingun ia pandiak eng, saong eng drei palao dom baoh menuk baoh ada trun blaoh cang mek tagok mbang dalam chreih chrai, bui sambai. Jaik nan, 1 bingun sit hu ia pandiak piah tuai menei, tram rup. Atah di nan oh hadom, sa baoh craoh ia la-an jangaih, meda maong mboh hu abih janih di ala mbat craoh. Ia nduac tapa dom got kayau saong nduac nao tal baoh craoh praong jang. Baoh craoh ini, lac labik hu 2 halau ia pandiak haong la-an. 

Baoh craoh ia pandiak labik Bưng Thị hu duah mboh meng lavik mai. Ini lac ia craoh tabiak meng haluk, nduac jeng craoh. Vil val daok hu glai tamo hijao mekre, hu rilo janih athur haong kayau patau. Labik ini daok hu prein khang kandauk dalam biak praong piah ngak du lịch sinh thái.

Kayua daok dalam labik khik ramik alam langik tasik Tà Kóu nan ye piah nao tal craoh ia pandiak Bưng Thị, tuai brei nao tapa sa jalan haluk atah jaik 7 km. Jalan tame Bưng Thị urak ini mbuan nao jang dahlau kayua hu buh jien tame ngak. Rah tui dua gah jalan lac dom phun kayau hijao la-an. Angaok jalan nao, tuai daok hu mboh dom phun daruai glai tamuh angaok cuah mbong patih, ala takai lac tal hareik katam kanyik, dreih yau labik taneh cuah thu lagu. Tuai damuai tuk mai tal ini yau hu ba drei tame langik tasik, hu suak yava dalam labik hacih sa-at, la-an bingi.

  Tui ong Võ Hữu Phương – akaok mban khik iek labik khik ramik alam langik tasik Tà Kóu, urak ini labik craoh ia pandiak Bưng Thị oh ka hu ramik ngak duh ka bruk du lịch min piah pabak ka bruk duah thau, me-in sambai di bhap bini dalam palei saong dom bhum jaik taphia, mBan khik iek hu padang Bilai khik caga glai craoh ia pandiak Bưng Thị tuk halei jeng hu menuac pato, kakei bhap bini ngak njauk tui dom bruk ba tabiak, jalan pandar pui…tuk ravang iek labik ini piah khik hu siam mekre, salamat, pacang caga khuah glai.

Abih huyện Hàm Thuận Nam urak ini hu jaik 15.000 ha pala thanh long. Lingiu di baoh thanh long, huyện daok hu rilo trang trại ngak dom jnaih ahar, kẹo, ia iak, alak vang…meng baoh thanh long. Ini lac prein khang piah ka huyện patagok bruk du lịch sang bein, ravang iek bruk ngak nong, pamaong tal parilo janih du lịch. Tukvak tapa, huyện Hàm Thuận Nam hu pambuak bruk haong Sở Ilamu, Thể thao saong Du lịch tỉnh Bình Thuận padang dua janih ravang me-in bein thanh long. Tuk camereip mboh lac dom bruk ini hu tuai meyaom.

Labik ravang me-in bein baoh kayau Sáu Trúc, daok di palei Minh Tiến, xã Hàm Minh lac sa labik njauk ndom tal. Mai meng hatai sahneng ngak jeng labik me-in ka ayut sahabat haong gauk gar di tuk puac adit, ong Nguyễn Thanh Trúc  ramik ngak mblang bein praong 4 ha jeng sa bein phun mbang baoh hu rilo janih yau: thanh long, kruac bung, la-u, panat, pa-ok… Ayut sahabat, tuai damuai mai tal dak harei dak rilo, ong Trúc meng sahneng tal bruk ngak du lịch. Meng nan, sang ong buh jien tabiak ngak labik vah ikan me-in sambai, ngak pasiam danao craih, padang ngak dom labik yau puk palei meng kan piah ka tuai damuai  thaot binguk…Tuk mai tal ini, tuai damuai hu po bein tacei pato ngak urang nong, hu ba drei tame bruk iek glang bein thanh long, jalan paik baoh, cakak dhar atau ravang iek bein kruac bung klik hijao bak baoh, hu mbang dom janih baoh kayua tui bilan pak di bein. Ong Nguyễn Thanh Trúc brei thau: Bruk duh ka tuai ravang me-in hu ba jien tame ka sang ong saong daok hu daong yaih khan bruk ngak nong di palei.

Bruk ravang me-in bein thanh long daok peih tabiak 1 jalan nao bahrau, nyu ngak jeng janih du lịch pambuak haong patagok bruk ngak nong, rik daong cakrok  du lịch di huyện, bo daok daong yaih khan, brei thau kaya nong di huyện Hàm Thuận Nam jeng yau di tỉnh Bình Thuận. Caong lac oh suai lavik, meng pambuak haong dom bruk du lịch tâm linh, padeih padei tasik saong ravang me-in sang bein,  huyện Hàm Thuận Nam meda ngak jeng sa “tour” du lịch biak karei di drei, dui pachreih tuai damuai./.

Urang lang: M.Phuong - 3/4/2021