“Padang ngak labik bhap bini jaik taphia haong bilai dân quân tapen negar”

Bình Hòa Nam, - lac angan biak anit ranam, jaik taphia haong urang jakar, urang lin Tapon nyaom bol pan phao kraong Quân khu 7, ngak brei hadar viek halau gha, labik tabiak rai di dom kapul Khu 7, Khu 8 saong Khu 9 dalam dom thun camereip Nam bộ kháng chiến. Di tapen kraong Vàm Cỏ, harei 10-12-1945, Xứ ủy lâm thời Nam bộ peih nyaom biai brei tabiak rilo bruk praong, dalam nan hu bruk brei padang Khu 7, lac angan ieu camereip di Tapon nyaom bol pan phao kraong Quân khu 7 urak ini.

Dalam mesuh metak pacang France, Bình Hòa Nam lac labik daok di dom jabat dang akaok di Khu 7, Khu 8 saong Khu 9 kayua Trung tướng Nguyễn Bình par akaok, ba jalan. Dom thun camriep di bruk mesuh metak pacang khol Mỹ, Bình Hòa Nam lac labik ngak bruk di Tỉnh ủy Long An saong Tapon nyaom bol pan phao kraong Quân khu 7. Khol kamang taong palai biak khang, proi jru mek kalik kruac, ngak ka labik ini jeng bhum patih.

Urak ini, dalam mblang bein di Sang ilamo xã, blah “mbia truyền thống”di Tapon nyaom bol pan phao kraong Quân khu 7 yau sa panuac kakei dom rai urak ini saong rai harei hadei miat miat kanal hadar dhar phor dom urang var klaak rup drei, ndih trun piah khik sron mbon ka taneh ia, meng nan ngak brei hadah tagok hatai mboh hadah mbaok meta di bangsa, lac palei anh hùng piah kham marat dak padang Bình Hòa Nam dak harei dak kaya mada, siam ghieh.

Meng hatai pamaong tal halau gha, dalam tukvak tapa, Tapon nyaom bol pan phao kraong Quân khu 7 hu padang ngak alin brei Bình Hòa Nam rilo danak dak mek hu chuan palei pala bahrau, yau ye: pasak ilamo thể thao xã, jalan nao mai dalam palei, sang bac tiểu học mek hu chuan pakat negar, sang anit ranam, rik daong haong palei patruh eik patrun kathaot, paglaong ilamo, jhul kinh tế-xã hội dak harei dak cak rok patagok.

Rilo bruk ngak hu peih tabiak yaok thun, yau ye nao ravang, alin hadaih pandap ka amaik Việt Nam anh hùng, peih bruk iek ruak, brei jru ka mikva dalam xã, jao học bổng, alin radaih juak ka dom anek saih sang kan kathaot, saong rilo bruk ngak karei karei hu ngak brei kajap jang talei rohim anit ranam gauk di bol bala saong bhap bini.

Amuk Nguyễn Thị Kim Ngân, Bí thư Đảng ủy, akaok UBND xã Bình Hòa Nam, huyện Đức Huệ, tỉnh Long An brei thau: “Rajaei tuk halei jeng hu bruk sangka di Tapon nyaom bol pan phao kraong QK7, hu daong ngak salah dom bruk yau ye bruk jalan mbak, sang bac, sang daok, labik ilamo. Langiu di nan jeng hu bruk sangka meng Tapon nyaom bol pan phao kraong QK7 daok buh jien padang ngak dom danak dak karei piah duh ka anek saih di Sang bac tiểu học Bình Hòa Nam, ngak danao caluai ia, rik daong ka xã Bình Hòa Nam ngak salah danak dak padang ngak palei pala bahrau.”

Meng bruk rik prein daong di Tapon nyaom bol pan phao kraong Quân khu 7, Bình Hòa Nam daok salih mbaok mata yaok harei, meng nan ngak salah dom bruk padang ngak palei pala bahrau. Raidiuk di bhap bini dak harei dak hu tagok glaong. Urak ini, jien mek tame kuhria rah tapa tui akaok menuac hu labaih 51 triệu đồng sa thun; sang kan kathaot trun tapa yaok thun, urak ini tok daok 3,06%;  xã oh daok sang taik tahak.

Hadei di 3 thun peih ngak danak dak “padang ngak labik bhap bini jaik taphia haong bilai dân quân tapen negar”, 2019-2021 di Đảng ủy, Bộ Tư lệnh Quân khu 7 di 3 tỉnh tapen negar Tây Ninh, Bình Phước, Long An hu ngak jeng prein diukrai bahrau, mbaok mata bahrau ka raidiuk, kinh tế, xã hội labik jalan tapen negar.

Saai Nguyễn Thị Trúc Phương, puk Gò Dầu Nhỏ, xã Bình Thạnh, huyện Mộc Hóa, tỉnh Long An ndem lac: “Hatai caong di dahlak daok pak ini lac daok jaik haong bilai khik iek, mboh labik ini jeng sahanang hatai nan ye dahlak ngak mbang meda hu kaya mada jang, dahlak haong gauk gar daok veik abih di pak ini.”

76 thun tapa, tuk mbuan lagaih jang yau tuk kan kandah, tapon nyaom bol pan phao kraong Quân khu 7 tuk halei jeng paglaong hatai “caga, sahneng duah, tự lực, tự cường”, pasiam dom kan kandah, yam tapa kan kandah, khang hatai dalam mesuh metak, tari tarieng, hadah krah, kein laba dalam bruk ngak mbang, pala drak, ngak tabiak rilo drap ar, pandap panda, rik daong paglaong prein khang quốc phòng.

Bộ đội Wa Hồ - bộ đội di bhap bini. Meng paglaong prein khang di taong abih gah dalam dak padang quốc phòng abih bhap bini bo Quân khu 7 padang ngak hu thế trận lòng dân dak harei dak khang kajap. Bhap bini jia tame Đảng, anit ranam chế độ, anit ranam, pacang khik tapon nyaombol pan phao kraong, tuk halei jeng glaong hatai sangka saong taong tayah bruk khin palai pajoa di khol kamang, khik caga khang kajap taneh ia dalam yaok bruk./.

Urang lang: Thu Thao – 22/12