Dah page harei som akaok adit, dom cei gru, anai gru di Sang bac Phổ thông bangsa bán trú Trung học cơ sở Krong padeih tagok cuk ao li-an, cuk pabak ao hajan piah nao tal palei Tung Gút, atah di sang bac jaik 10 km, “duah” anek saih. Tal akaok palei, sa-ai Đinh Uýt- urang dang akaok palei Tung Gút daok caga raok, gam haong dom cei gru, anai gru parabha jeng dom kapul, nao tal yaok sang piah jak ba dom adei nao bac veik.. Jaik mon 7 mesup, hu 6 anek saih tangin pan kadung khan ao daok la gah likuk radaih patuh di dom cei gru, anai gru piah mai veik sang bac. Sa-ai Đinh Uýt – akaok palei brei thau: “Mbang ini, lac mbang ka 2 drei pambuak bruk haong dom cei gru, anai gru piah ka anek saih nao sang bac veik, hu tuk pambuak bruk haong mban ngành, kapul nyaom, urang đảng di palei piah ka dom adei nao bac veik. Hu tuk pataom rahra pathau khan di palei, hu tuk pambuak bruk haong amaik ame di anek saih ieu kakei anek bhik nao bac veik, pambuak haong cei gru, anai gru jak ba tuk melam.

Lac sa dalam dom gru pato daok ranaih abih di sang bac, gru Nguyễn Quốc Triều khan veik, rilo mbang sa-ai haong dom cei gru, anai gru khut radaih kreh jalan, labuh trun jalan, khan ao bak gluh baok.

“Dalam 4 thun pato bac ye tukvak camereip biak glaih glar, jalan nao kan kandah. Drei sahneng tal anek saih di drei biak caong hu akhar haroh nan ye drei kham merat piah daong ka dom adei di bhum atah bayah, piah ka dom adei thau hu ilamu bahrau, piah ngak drap ar brei ka dom adei yam tame dunya”

Atah di pasak huyện Kbang labaih 40 km, Sang bac Phổ thông Bangsa bán trú Trung học cơ sở Krong daok di kreh mbon ceik. Sang bac ini padang tagok hu labaih 17 thun, urak ini hu 14 gru pato, hu 322 anek saih, dalam nan rilo meng lac urang Ba Na. Gru Phan Danh, Phaok hiệu trưởng sang bac brei thau, tukvak dahlau, tuk jit Covid-19 tamuh tabiak, anek saih oh ginup pandap piah bac online, dom cei gru, anai gru soạn phiếu bac da-a ba tal yaok palei brei ka dom adei. Meng kreh bilan 11/2021, anek saih hu mai sang bac piah bac veik. Min dom anek saih padeih bac rilo, gru pato njauk nao jak ba dom adei mai sang bac veik. Yaok mbang nao jak ba lac sa mbang glaih glar. Gru Phan Danh khan lac:

   “ Hatai sahneng ka bruk bac da-a di dom adei ka oh glaong, amaik ame di anek saih jeng oh khin brei anek nao bac kayua urak ini anek saih pakat 2 dom adei praong abih, thau ngak bruk saong amaik ame iek dom anek lac menuac ngak daong ka sang. Hu dom amaik ame oh brei anek nao bac. Daok hu sang tuk adei sa-ai nao jak ba, amaik ame pagui pateok gru pato, bruk jak ba biak kan kandah.”

Yam tapa dom kan kandah, dom cei gru, anai gru di sang bac Phổ thông bangsa bán trú Trung học cơ sở Krong jeng abih hatai anit ranam anek saih, abih drei ka bruk ngak. Meda lac bruk bui sambai praong abih di dom cei gru, anai gru pak ini, lac dom anek saih oh klaak sang bac, oh klaak tal bac, piah harei hadei oh daok glaih glar haong bruk eik lapa, kathaot rambah./.

Urang lang: M.Phuong -18/12/2021