Rilo tỉnh, ban daok hu jit ruak jeng pataom tame pato online ka pakat trung học cơ sở, trung học phổ thông

Dalam dom tỉnh, ban hu peih thun bac bahrau saong daok tame thun bac bahrau 2021-2022, jaik abih jeng pambuak bruk pato tapak saong pato online, hu takik labik oh hu menuac njaom bahrau COVID-19 dalam bhap bini meng 14 harei tagok meng peih pato bac tapak. Rilo tỉnh, ban daok hu jit ruak jeng pataom tame pato online ka pakat trung học cơ sở, trung học phổ thông, oh peih pato online di pakat mầm non. Dom sang bac haong dom gru pato jeng brei salih jalan pato ka nyu lagaih haong bruk pato online piah hu tuk pato siam, khik hu chất lượng: “Patagok bruk taom gaok nao mai di anek saih tapa dom jalan ngak, pagap yau parabha kapul sit piah ginum biai tui kapul. Anai gru ndom biai haong yaok kapul piah daong ka dom adei, atau pandar “khung chat”, anek saih vak panuac javap jalei tagok “khung chat” jeng ngak brei patagok bruk taom gaok gauk.”

Oh hu bruk taom gaok tapak, njauk var klaak meng rilo bruk vil val, rilo sang oh hu komputer brei ka anek bac online... nan ye bruk khik chất lượng pato bac online jeng lac sa cuang kandah praong. Kan kandah di abih lac bruk pato anek saih tal bac 1. Bruk mbeik vak yaok akhar karoh, bruk daok la ka nyu njauk di tal bac lac bruk kan, tapa màn hình dak kan kandah jang rilo mbang. Kayua yau nan ye, gam haong bruk kuhria caga, sami samar salih jalan pato bac, gru pato brei tacei pato tani tanat jalan eng drei bac dahlau saong hadei kadha bac ka anek saih tapa dom kapul amaik ame. Tui amuk Nguyễn Thị Lan Phương, Hiệu trưởng Sang bac Tiểu học Phú Đô, quận Nam Từ Liêm, Hà Nội, bruk pambuak gauk khang kajap di gru pato haong amaik ame di anek saih hu makna biak praong: “Piah ka bruk bac online di anek saih tal bac 1 hu jak jeng ye amaik ame brei caga ka anek dom bruk, yau pandap bac, labik bac saong brei thau hu dom phần mềm pato bac. Gru chủ nhiệm tacei pato amaik ame di anek saih tame dom phần mềm bac online saong amaik ame nao gam haong dom anek dalam tukvak camereip.”

Jit COVID-19 daok rah tabiak srau kadau saong kan kuhria mboh dahlau hu, nan ye “salih piah palagaih saong diuk haong jit” lac jalan hu gah pato megru ba tabiak ngak dalam thun bac bahrau ini. Yaok tỉnh, ban jeng hu dom jalan pato saong bac lagaih haong bruk jit ruak di yaok bhum palei, kuhria gam dom tỉnh, ban oh hu menuac njom bahrau.

Caga dahlau, sami samar salih karei, oh daok la cang, lac jalan bo dom labik pato pakai dalam taneh ia daok ba tabiak ngak piah palagaih haong bruk rah tabiak kan kuhria mboh dahlau hu di jit COVID-19. Kayua pato bac dalam tuk jit ruak daok mblo tabiak rilo tavak tavaiy, nan ye bruk pasang iek, taong yaom anek saih jeng hu dom ramik veik. Akaok Mintri Pato Megru Nguyễn Kim Sơn ndom lac: “Anak meta oh pasang iek, taong yaom bruk pato angaok rayo papar binguk atau pato online ngan saong tal bac 1, tal bac 2, bo brei cang tuk mai veik taom gaok tapak. Meyah tal bilan 9 thun hadei bo oh pasang iek, taong yaom hu, ye brei hu jalan ngak lagaih. Bruk brei ka dom anek saih tal bac 1, tal bac 2 maong iek rayo papar binguk lac jalan bac min me-in, me-in min bac, hu du halei siam du nan”

Mintri Pato Megru hu ba tabiak “kho bài giảng điện tử” angaok Internet piah daong ka gru pato peih bruk pato bac online dalam tukvak anek saih padeih tal sang bac piah caga jit COVID-19. Dom tỉnh, ban jeng daok maong akaok Rajaei samar ba tabiak danak dak klauk jru vaccine caga COVID-19 ka anek saih, piah ka dom adei nao bac trun hu bruk mbuan njom jit ruak./.

Urang lang: M. Phuong – 18/09