Rilo adei hu nao ngak di dom Công ty tuk mbang bac ka oh tamat

Meng akaok thun tal ni, pasak pabak prein khang ka anek manuac hu pato pakai jaik 60 urang joh jo mai meng rilo tinh bal dalam negar. Dalam nan, 80% urang bac blaoh duah hu bruk ngak chip tuk tamat mbang bac, rilo adei hu nao ngak di dom Công ty tuk mbang bac ka oh tamat. Dalam tal bac bahrau ni hu 39 urang joh jo hu pato oh mek jien. Saai Nguyễn Thị Sương, 29 thun, daok di Hà Tĩnh khan lac: “Di pasak pabak prein khang ka anek manuac ye khol dahlak hu bac saong hadei di tuk bac blaoh, khol dahlak caong khin hu pasak yaih khan tal dom công ty ngak bruk. Dahlak rup sit nan ye lagaih haong bruk rami ramik thaot binguk taneh riya.”

Gam saong bruk pato pakai bruk ngak, pasak pabak prein khang ka anek manuac daok peih  ngak rilo danak daong ka urang bac ngak bruk di sang piah hu jien tame, gam tui di nan jeng hu daong meteh yaom jien blei computer ka dom urang bac piah bac ta-a saong ngak bruk. Langiu di nan, pasak jeng hu pambuak bruk saong jak ba rilo doanh nghiệp taduan urang ngak bruk lac urang joh jo kayua pasak pato pakai. Muk Nguyễn Thị Vân, Giám đốc pasak pabak prein khang ka anek manuac brei thau: “Bhian di nyu dalam dom tal bac di khok dahlak ye hu 80% dom adei hu bruk ngak siam. Khol dahlak jia lac dom adei eng drei meda nao ngak hu. Daok mayah caong khin ye dahlak caong abih dom adei bac tamat blaoh jeng duah hu bruk ngak, duah hu rilo jien.

Tui muk Vân, di dom doanh nghiệp bo dom adei tame ngak meda oh hu urang joh jo halei, min yaok urang ngak jeng hu maong yau gauk kayua dom adei ngak bruk meng prein, meng ilamo, oh njauk bac piah pilih ruak labik ngak bruk di urang joh jo.

Tapa pasang iek samar drah di danak dak cak rok patagok Liên hợp quốc di Việt Nam, 72% urang joh jo hu tapa pasang iek mboh jien mek tame yaok bilan lac ala sa triệu đồng, 30% daok ka oh hu bruk ngak kayua jit praong Covid-19 saong jaik meteh dom urang nan njauk trun tukvak ngak bruk. Kayua yau nan ye, tukvak anak tal, dom mintri, dom gah, dom tinh, bal njauk peih ngak rilo bruk siam lagaih jang piah daong ka urang joh jo thau hu dom ilamu piah pandar dom nền tảng số, ba mai rilo bruk ngak di sang saong hu bruk ngak tapa online, daong ka dom urang nan meda ngak bruk biak salamat saong hu meriak gauk dalam saman công nghệ 4.0./.

Urang lang: Thu Thảo - 03/12