Rilo bruk tamia nghệ thuật hu parang main ka tuai 

Di Khánh Hòa, meng harei 16-10, rilo công ty du lịch brei raok tuai dalam negar  hu  thẻ hijao atau thẻ katam Covid-19 tal ban tasik  Nha Trang. Dom labik du lịch yau Bimaong Ponagar, Hòn Chồng hu taduan tuai mai rivang me-in veik. Bhap bini  jeng hu menei ia tasik, main sambai di mblang tasik. Dom hotel, resort Vinpearl angaok palao Hòn Tre di  Công ty CP Vinpearl - dhar Nha Trang jeng hu peih pabah mbang ka tuai mai padeih padei. 

Lac sa dalam dom doanh nghiệp mek hu tanut du lịch song labik “hijao”, muk  Võ Thị Phương Nga, Phaok Yam ndoc điều hành labik du lịch Champa Island di  Nha Trang brei thau, piah raok tuai, urang ngak brei ngak bruk gam gam piah khik kajap dom bruk gah duk balik, pandap mbang huak, alam môi trường, abih di nyu lac bruk pacang caga jit. Labaih 10 harei tapa, labik ni hu takik tuai, min thei jeng mboh chreih chrai.

Dom harei jiak di ni, tỉnh Bình Thuận jeng hu raok dom kapul tuai camereip  mai padeih paei di 3 labik dok  3-5 patuk di ban  Phan Thiết. Akaok Hiệp hội Du lịch tỉnh Bình Thuận Nguyễn Văn Khoa brei thau, anak meta dom labik du lịch dalam tỉnh pataom tame taduan raok tuai dalam negar, abih di nyu lac dom nyaom tuai sit, sang di ban raya  HCM song dom tỉnh gah merong. Meyah hu tani tanat, tỉnh brei taduan raok tuai dunya dalam quý 1-2022.  

Di Bà Rịa - Vũng Tàu, meng harei  16-10, tỉnh brei pacadu bruk pasang iek nao mai tapa tỉnh, peih pabah mbang labik menei ia tasik. Tui bruk batabiak, tỉnh brei adat ka dom labik ngak mbang dịch vụ di bhum hu jit pakat 1 song 2 hu peih veik taong abih. Di bhum pakat 3, bruk rivang main labik du lịch song dom bruk ngak pataom gauk dalam sang, dom danak dak  du lịch tui nyaom ala 25 urang, labik padeih padei song labik mbang menyum di labik du lịch oh brei tapa  meteh pren ngak. Tuai meng dom  tỉnh jiak taphia tuh mai Bà Rịa-Vũng Tàu dak harei dak rilo, min jiak abih tuai njauk mai veik dalam harei kayua dom hotel oh taduan tuai kayua huac jit ruak njom mbak.

Ong Nguyễn Văn Hậu, po di sa labik padeih padei labaih 40 balik di labik Bãi Sau ban Vũng Tàu brei thau, dom hotel oh njauk ieu kreik pabah mbang min brei hu jalan pacang caga jit  hu pakat  huyện mbaoh tangin meng hu peih ngak. Anak meta mboh lac, dom khách sạn oh ka ginup siam mekre tui bruk pacang caga jit dok loa taduan tuai nan ye rah tabiak bruk tuai njauk Covid-19. Bahrau ni, Sở Du lịch tỉnh Bà Rịa - Vũng Tàu hu harak payua ka dom labik ngak du lịch, padeih padei, anak meta oh taduan raok tuai meng dom  tỉnh mbuan si njom mbak glong  yau TPHCM, Đồng Nai, Bình Dương, Long An. 

Yaom lac brei peih pabah mbang min dom tỉnh ban jeng caik hatai ba tabiak bruk lac tuai brei hu klauk takik di abih sa mbang  vaccine Covid-19 hadei di 14 harei, atau abih ruak Covid-19 dalam 6 bilan. Uranaih nao gam oh ka klauk vaccine, brei hu dut iek mboh lac  âm tính hong jit  Covid-19. Tong abih tuai hu mek mẫu dut iek tuk mai tal labik padeih padei. Urang ngak bruk khik ramik song urang duh ka tuai du lịch brei hu klauk ginup  2 mbang vaccine atau abih ruak; urang ngak di dom labik karei dalam  labik padeih padeih brei hu klauk takik di abih  sa mbang vaccine. 

Yam ndoc  Sở Du lịch Khánh Hòa Nguyễn Thị Lệ Thanh brei thau, dom doanh nghiệp hu padang jalan ngak pabak hu bruk pacang caga Covid-19. Sở pambuak bruk song dom jabat , đơn vị hu pagam tal  padang jalan ngak, danak dak pacang caga tuk hu tuai lac F0. Gam hong nan, doanh nghiệp njauk khik ramik urang ngak, tuai damuai khik kajap bruk pacang caga jit tui adat, hukum./.

Urang lang: Hanipha- 2/11