Bal raya HCM urak ini padang hu yaok ribau “bhum hijao” salamat pacang caga jit Covid-19. Yaok “bhum hijao” lac sa tổ dân phố, khu phố, ấp, labik daok di bhap bani, sa baoh chung cư ngan haong dom jalan eng drei khik iek, eng drei tui iek menuac saong radaih tame tabiak.

Bruk ngak ini gam pacang caga hu jit ruak, gam pajeng ba hu pandap panda. Abih di nyu lac, tapa bruk eng drei khik iek di bhap bani saong dom kapul nyaom dalam “bhum hijao” hu daong biak rilo ka bruk jak ba, pathau khan peih ngak dom adat hukum pacang caga jit saong brei daok pa-atah di gauk. Kapul eng drei khik iek hu ngak gam bruk “nao yaok jalan, taih yaok sang” piah duah thau ka rai diuk di bhap bani dalam labik. Tapa nan, daong samar drah dom sang kan kandah saong daong ka gah y tế dalam bruk duah thau dịch tễ, pacang labik hu F0 saong F1, F2.

Anak meta mboh lac, piah khik caga “bhum hijao”, kadha prong abih nan lac bruk sa hatung hatai haong gauk di bhap bani dalam labik nan. Yaom lac labik oh hu jit, min bhap bani halan hatian daok dalam kan kandah dalam bruk nao mai. daok dang yaok harei piah ngak catang bruk pa-atah di gauk yau dalam labik pacang veik. Oh lac yau nan thaoh, rilo urang daok halar hatian hu mbaok tame bruk khik iek chốt.

Jeng di dom “bhum hijao”, bhap bani saong urang jakar di labik hu dom jalan ngak piah daong ka bhap bani biak siam laghaih. Dom “labik pablei pandap zero đồng”, “Tu la-ar anit ranam”, “Gok bhu anit ranam”, “Van mbang anit ranam”… hu daong ka yaok ribau baoh sang yam tapa kan kandah dalam tukvak daok pa-atah di gauk. Yaok pok njam, ký brah, thùng mì, pa-po ikan, gok bhu… bo bhap bani klah rabha haong gauk daok ba mai chreih chrai, kajap hatai jia, gul pataom, pan kajap tangin gauk yam tapa kan kandah, jayah jit ruak. Taphia di bruk sa hatung hatai haong gauk,  nan lac bruk kham merat di karja palei dalam bruk pacang caga jit.  

Ong Bùi Thế Hải, Phaok akaok UB bhap bani quận 10 brei thau, rilo phường hu tổ dân phố mek hu tanut “bhum hijao” biak glaong. Anak tal, quận peih prong bruk bhap bani eng drei khik caga “bhum hijao”, peih ngak catang bruk pataom labik, neh dom F0 tabiak truh bol bhap rah ra. Gam haong nan lac padang kapul ngak bruk samar drah, kapul tư vấn pren yava, sangka iek glang siam rai diuk piah ka bhap bani sahanang hatai pacang jit.

Dalam mbang pasang iek dom bilai khik caga “bhum hijao” di quận 3 bahrau ini, Phaok Bí thư Thành ủy, akaok HĐ bhap bani bal raya HCM Nguyễn Thị Lệ taong yaom biak glaong hatai saneng, bruk ngak di yaok bhap bani dalam khik caga “bhum hijao”. Gam haong nan, lac bruk ngak di taong abih hệ thống chính trị gam haong bhap bani khik caga, peih prong “bhum hijao” di yaok tổ dân phố, khu phố.

Oh lac khik caga “bhum hijao” lac labik daok di bhap bani, bo kham merat sản xuất siam mekre salamat di bal raya HCM jeng lac dak padang dom “bhum hijao” siam mekre salamat dalam sản xuất. Tal puac bilan 7, bal raya HCM hu labaih 600 doanh nghiệp ngak bruk tui jalan “3 di labik” atau “1 jalan nao - 2 labik tal”. Bahrau ini, ngak bruk di Labik công nghệ glaong bal raya HCM, Ủy viên Trung ương Đảng, Phaok Bí thư Thường trực Thành ủy bal raya HCM Phan Văn Mãi ieu bal Thủ Đức saong gah y tế brei pataom dom jalan ngak piah Labik cong nghệ glaong bal raya HCM jeng “bhum hijao”, labik siam mekre salamat ka dom doanh nghiệp khik ramik bruk ngak, khik kajap yaom ngak tabiak di bruk ngak kong./.

Urang lang: Jasi - 17/8/2021