Urang ngak gah y te daok pruh jru di ahaoh piah caga ngak iek bruk rok tuai dunya

Tui urang par akaok UBND tỉnh Kiên Giang, caong jhul samar bruk ngak iek rok tuai negar langiu mai rivang main di ban Phú Quốc, bruk ngak dahlau di abih saong hu makna praong abih lac bhap bini di pulao njauk hu klauk ginup 2 mbang vaccine. Urak ini, bahrau hu labaih 35% rahra di pulao hu klauk mbang ka 1. Ong Nguyễn Lưu Trung, Phó akaok UBND tỉnh Kiên Giang brei thau lac tỉnh hu panuac likau Mintri y te brei vaccine dahlau ka Phú Quốc: “Bruk peih pambang rok tuai dahlau di abih brei khik hu salamat prein yava ka bhap bini Phú Quốc,  nan ye njauk klauk vaccine ginup 2 mbang. Tui janih vaccine, yau ye Astrazenca lac 8-10 adit meng klauk mbang ka 2, dom janih karei lac meng 3 tal 4 adit, nan ye tỉnh likau pabak brei dom janih nan, dui katut tukvak klauk di 2 mbang piah samu tal puac bilan 10 ngak iek bruk rok 1 tal 2 mbang par tui yaok baoh sang.”

Dahlau di nan, dalam bilan 7, Kiên Giang hu tabiak bruk klauk vaccine mbang 1 ka rahra, ieu pataom sinh viên, jru pato gah y, dom sang iek ruak di tỉnh saong pasak y te dom huyện: Vĩnh Thuận, Giồng Riềng, Tân Hiệp, Hòn Đất saong An Biên tabiak Phú Quốc piah peih jaik 90 bàn klauk, padang 3 pasak cấp cứu piah langyah dom bruk oh lagaih hadei di tuk klauk. Urak ini, tỉnh hu peih viek bruk ni, blei dom pandap panda piah mayah tuk hu vaccine meda peih ngak chip. Ong Huỳnh Quang Hưng, akaok UBND ban Phú Quốc, lac: “Khol dahlak caong samar hu vaccine klauk ka rahra angaok pulao, tui kuhria meng 250-300 ribau mbang. Tuk klauk vaccine blaoh ye bruk peih ngak passport vắc xin tok lac bruk peih ngak min. Phú Quốc daok caga ngak sarak di Mintri Chính trị. Khol dahlak kham marat peih ngak siam bruk ngak iek rok tuai dunya mai Phú Quốc”

Tal tukvak ini, Phú Quốc daok pasang iek hu siam jit ruak COVID-19, oh hu urang halei njom ruak dalam rahra. Ini lac sa bruk biak siam lagaih piah peih pambang rok tuai rivang main dalam tukvak anak tal. Dalam tuk daok cang vaccine, dom gah ngak du lịch di Phú Quốc jeng daok caga peih bruk ngak mbang, pambuak haong karja palei piah hu jalan lkhik kajap salamat ka tuai du lịch. Ong Trần Trung Kết, Phaok Tong Yam ndok tập đoàn CEO brei thau: “Ngan haong doanh nghiệp CEO di Phú Quốc, khol dahlak hu caga klauk jru ka abih urang ngak, caga manuac ngak gah y te piah dut iek ka urang ngak, ka dom tuai mai rivang main. Khok dahlak jeng padang labik brei daok karei ka tuai negar langiu saong tuai dalam taneh ia”

Kiên Giang daok samar drah padang danak dak rok tuai mai rivang main, mek panuac rikm daong di bhap bini, di dom hiep hoi buh jien tame ngak mbang, di doanh nghiệp dalam ban Phú Quốc. Tỉnh kham marat tal harei 25/9 meda ngak salah bruk ni; saong peih bruk pilih ruah, taong yaom dom labik ginup prein pabak bruk ndih daok, bruk pajeng ba tuai nao rivang main…, khik salamat ka tuai damuai. Kiên Giang jeng daok peih ngak yaok bruk piah khik salamat di abih ka Phú Quốc, khik kajap lac labik hijao piah ngak iek bruk rok tuai rivang main hu mbuan lagaih, siam mekre, salamat./.

Urang lang: Thu Thao – 17/09