Urak ini daok lac bilan sim tathak di huyện đảo Phú Quốc, tỉnh Kiên Giang. Yaok thun tame bilan sim tathak, bhapbini jak gauk tame glai nao paik sim pablei ka dom labik ngak alak sim angaok pulao. Meng lavik mai, sim glai jeng pandap di langik tasik alin brei ka urang kan kathaot angaok pulao Phú Quốc piah hu jien mbang cai dalam raidiuk. Kadha vak di urang vak Lam Hieu brei thau :

Atah di ini jaik 10 thun, tuk alak sim glai hu bhapbini huyen dao Phu Quoc ngak hu saong jeng sa pandap du lich ye janih alak ini jeng hu angan je angaok taneh pulao. Meng nan, baoh sim glai di Phú Quốc hu jeng janih pandap hu yaom kinh te glaong. Sim glai daok hu maong lac risky di glai bo lingik tasik alin brei ka bhapbini kan kathaot angaok pulao duah hu jien tame tani tanat.

Phu Quoc urak ini hu jaik 500 hecta phun sim, hu rilo di tapen glai dom xa yau Cửa Dương, Cửa Cạn, Dương Tơ, Gành Dầu saong Bãi Thơm. Baoh sim paik hu jaik 200 tấn sa vụ. Tui bhapbini angaok pulao, yaok thun sim glai paik hu 5 bilan, meng akaok bilan 1 tui saka ia harei sim nyu tathak saong tal bilan 5 meng abih bilan paik. Urak ini, angaok pulao hu jaik pluh labik ngak alak sim glai, yau nan ye, bruk caong blei baoh siam piah ngak alak biak glaong. Yaom blei sim glai meng 35 tal 40 rabau dong sa kg. Meyah urang halei khang, paik samar ye sa harei meda paik hu meng  5 tal 7 kg. Saai Hứa Như Tâm, sa urang bhian nao paik sim angaok pulao Phú Quốc  brei thau : tame bilan sim tathak, dom urang kan kathaot yau kol dahlak hu bruk ngak piah duah jien tame :"Var pagaiy tal 11 tuk cala, dahlak paik hu 5 tal 6 kg, jien duah hu meng 200 tal 300  rabau dong sa harei. Urak ini, sim hu urang blei rilo nan ye nyu hu yaom, dahlau diah takik hu menuac blei ye yaom meng 5 tal 10 rabau đồn sa kg min. Urak ini, hu yaom nao paik sim duah jien bingi jang, tuk  oh hu bruk ngak ye nao paik sim.

Dom harei ini, di labik ngak alak sim angan Bảy Gáo di sang ong Mạc Văn Nghiêm daok di khu phố I, thị trấn Dương Đông mboh chreih chrai tagok. Yaok harei, labik alak sim Bảy Gáo blei tame labaih 1 tấn baoh sim. Piah ngak dom bruk meng blei, ngak brei siam hacih baoh sim tal bruk tram, pandih, sang ong Nghiêm njauk pah jaik 20 urang ngak bruk tui bilan. Tui ông Mạc Văn Nghiêm, sim glai thun ini hu rilo baoh, tui kuhra ong meda blei jaik 40 tấn. Ong daok brei thau lac: bruk karei  gauk di alak sim saong rilo janih alak karei nan lac baoh sim hadei di tuk ba tame pandih jeng brei tagok men eng. Kayua yau nan ye, alak nyu pahe, yamen, bingi meng hu tram ủ tự nhiên di baoh sim. Tuai halei nao tal Phú Quốc jeng takre menyum sa klaok alak sim piah mboh bruk mebhuk having di taneh pulao. Ndom ka bruk pablei tabiak baoh sim glai, ong Mạc Văn Nghiêm, po labik ngak alak sim Bảy Gáo brei thau : "Thun ini sim hu rilo baoh jang dom thun dahlau. Dom thun dahlau, oh hu yau nan, min thun ini hu biak rilo baoh, tathak patui di gauk, tathak meng hadei tet tal ini. Drei blei yaom tani tanat 40 rabau dong sa kg lac yaom glaong di  abih kuhria  meng dahlau mai."

Alak sim Phú Quốc hu jeng sa pandap du lịch hu angan je saong hu pablei khang di darak pasal, jeng pandap doc dao ka yaok urang tuai tuk yam takai tal pulao. Thau hu bruk ini, urak ini rilo sang urang nong angaok pulao Phú Quốc meng sahaneng tal bruk pala sim glai. Bruk ngak ini, oh njauk lac rik daong khik caga moi truong sinh thai glai bo daok pabak bruk cakrok kinh te./.

Thúy Linh