Phú Yên : Urang jakar, urang đảng nao gam jalan saong urang kathaot.

Pathau mikva saong grauk yut !Akaok thun 2014, Ban Thường vụ Tỉnh ủy Phú Yên patabiak Kế hoạch 68 peih ngak  mô hình “Cơ quan, đơn vị daong  xã, palei kan kandah saong urang jakar, urang đảng, công chức, viên chức daong sang kathaot”. Barau labaih sa thun peih ngak,  mô hình ini ngak hu rilo bruk siam mekre; akaok sahaneng, hatai trách nhiệm di urang đảng hu paglaong; yaok rabau sang kathaot hu daong patruh kathaot. Daa mikva saong gruk yut pang kadha vak di Hà Minh urang vak daok di gah kreh negar :

Sang amuk Trần Thị Cúc daok di ban sit Phú Hòa, huyện Phú Hòa, tỉnh Phú Yên hu 6 urang diukrai pagam pambak tame 2 sào hamu, yaok vụ yuak hu 6 tạ padai. Pasang saai Cúc lac ông Nguyễn Văn Bảy ruak tâm thần meng jaik 20 thun ini mai. Yaom lac oh eik lipa tuk cang bilan yuak, min kayua nyim jien iek ruak ka ông Bảy, nan ye sang amuk Cúc laik tame kan kandah, rambah rambep. Dom urang anek amuk Cúc klak bac meng tan bac 3 nao ngak pah daong amaik duah jien iek ruak ka ame. Klah rabha kan kandah haong sang amuk Cúc, Chi bộ Văn phòng Huyện ủy Phú Hòa jak ba urang jakar, urang đảng rik daong harei jien bilan blei limo alin sang amuk Cúc. Harei harei, amuk Cúc iek glang bein hareik limen anak sang, ngak pabu pabak tame ka limo mbang samal praong : Limo drei raong, drei caong nyu samar praong piah pablei hu jien drei kuhria dalam sang. Sang drei urak ini daning oh ka tô, hu jien piah drei tô sang veik, drei ngak ka haci hacih. Drei kham merat ngak piah raong limo ka nyu praong piah hu phun jien, drei pablei drei blei veik limo nek mai raong. 

Meng jalan ngak lac “ alin mbaik vah salih ka alin drei ikan” hu daong ka 41 sang bhapbini tabiak truh kathaot khang kajap, Chi Cục thuế huyện Phú Hòa, tỉnh Phú Yên hu ruah bruk alin kaya raong ka dom sang kathaot di labik ini. Labaih sa thun tapa, Chi bộ Chi Cục thuế huyện Phú Hòa hu rik daong labaih 40 triệu đồng daong ka 17 sang bhapbini tabiak truh kathoat. Taphia bruk daong phun jien ka dom sang kathaot, Chi bộ Chi Cục thuế huyện Phú Hòa brei urang jakar trun daong bhapbini pandar alamu barau patagok sản xuất, paglaong jien mek tame. Ông Dương Công Diệp, Bí thư Chi bộ, akoak Chi cục thuế huyện Phú Hòa, tỉnh Phú Yên, brei thau : (Adei saai sahaneg lac lingiu bruk mek je joi, drei njauk gam saong Đảng, karja rik pren yava tame peih ngak sarak an dân xã hội. Taduan mek ye uan tabuan min jeng mboh duh hatai. Adei saai ginum gauk lac jien bilan yaok bilan di drei njauk koh tabiak piah padang kadung jien. Dalam sa bilan ye kol dahlak hu ngak blaoh. 

Ông Nguyễn Văn Phụng, Phó Bí thư thường trực Huyện ủy Phú Hòa khan lac: tui bruk di anak meta, yaok đơn vị, yaok cơ quan brei urang jakar, urang đảng pambuak bruk saong akaok palei atau Bí thư Chi bộ palei pasang iek raidiuk di yaok sang kathaot; tapa nan hu jalan daong njauk, lagaih: 3 urang đảng, 2 urang jakar tra lac 5, brei trun nao palei B halei nan hu 4 sang kathaot piah pambuak bruk saong Chi bộ pasang iek brei 2 sang mesraiy dahlau atau lac sa sang. Dom sang kathaot rilo meng mesraiy bloh paje, drei njauk nao tal gilang pariak sarak, drei dang tabiak tín chấp mesraiy paok jien praong dua mbang atau 3 mbang yau nan, bloh drei bayan paok jien dom urang mesraiy dahlau nan, daok labaih hadom urang blei limo, meyah oh ginup ye adei saai rik daong tame, tui bruk halei nan bo sang nan caong khin patagok di dom urang nan. 

Labaih sa thun peih ngak kế hoạch 68 di Tỉnh ủy Phú Yên ka bruk “Cơ quan, đơn vị daong xã, palei kan kandah saong urang jakar, urang đảng daong sang kathaot” dom cơ sở đảng tỉnh Phú Yên ieu pataom hu labaih 8 tỷ đồng daong sang kathaot, padang tủ tapuk pháp luật; ngak jalan nao mai di palei; ramik pasiam, daong pandap ka dom balai y tế xã, dom sang bac ... Labaih 3 rabau sang kathaot dalam tỉnh hu daong. Tal urak ini, jaik 15% dalam dom urang ini hu tabiak truh kathaot. Rilo sang hu jien mek tame tani tanat, raidiuk ginup meda jang dahlau. Ông Huỳnh Tấn Việt, Bí thư Tỉnh ủy Phú Yên, brei thau Yau nan lac dua bruk, ka sa daong ka bhapbini kathaot, dom sang kan kandah; ka dua lac mboh hu trach nhiem di urang jakar, urang đảng. Tapa nan urang kathaot, dom urang jakar, urang đảng kathoat jeng mboh bui hatian, urang mboh tuk halei jeng hu đảng jaik taphia drei, sangka daong ka urang tabiak truh hu kan kandah. Hadei di tuk sơ kết blaoh, kol dahlak mboh bruk ini daok hu yaom siam. Yau nan ye daok tacei pato dalam tukvak anak tal ngak khang jang, siam jang piah mo hinh ini nao tame raidiuk biak dalam, yaok cơ sở, yaok menuac urang.

Meng bruk ngak hu di mô hình daong sang kathaot di tỉnh Phú Yên hu rik daong pakhang pakajap hatai jia di bhapbini ngan saong Đảng. Kế hoạch 68 nao jaik taphia urang kathaot di puk palei ini jeng lac jalan ngak gheih piah pasiam thái độ vô cảm, quan liêu, atah di bhapbini di dom urang jakar, urang đảng urak ini ./.

Thúy Linh