Urang hu ba phun kroc aik oh hu asar mai pala di bhum taneh Hậu Giang nan lac ong Nguyễn Văn Chiến, urak ini lac giám đốc HTX ngak nông Thạnh Phước daok di xã Đông Thạnh, huyện Châu Thành, tỉnh Hậu Giang. Ông Chiến brei thau, meng labaih 10 thun dahlau, ong hu nao tal pasak pachreih nông Cần Thơ blei 11 phun kroc aik oh hu asar mai pala salih ka phun kroc aik giấy oh daok siam, năng suất biar. Meng iek glang siam, taneh haluk lagaih nan ye phun kroc aik oh hu asar tamuh siam. Oh padeih di labik nan, ong Chiến daok ruah duah janih phun lagaih piah pagam dhar piah ka phun kruac aik diuk hu lavik jang saong brei năng suất glaong, taphia di nan ong daok hu pabam pajaih piah pablei ka bhap bini dalam bhum pala.   

 “Camereip hu 11 phun min, drei ba mai pala iek, pagam angaok dom janih got, drei mboh hu kein laba ye drei pambak praong, urak ini got kroc aik tàu bông tím drei pambak praong hu bruk ngak ini, drei mek got kroc aik tàu bông tím pagam tame mbo kroc aik oh hu asar”.

  Meng dom siam lagaih lac baoh praong, kanduh lipih, oh hu asar, ralo ia, hu rilo baoh, abih di nyu nan lac pablei tabiak tani tanat, nan ye kroc aik oh hu asar hu ralo urang nông daok di tỉnh hậu Giang palih ruah piah patagok kinh tế baoh sang. Urak ini dalam tỉnh Hậu Giang hu labaih 700 ha kroc aik oh hu asar, hu pala ralo di huyện Châu Thành. Ong Nguyễn Văn Dư ở xã Đông Phước huyện Châu Thành, urak ini hu jaik 750 phun kroc aik hu pala di angaok mblang taneh praong labaih sa ha brei thau:

 “meng thun ka 3, nan lac hu 36 bilan tagok ye paik baoh sa phun sa thun meng 30 tal 40 kg. Yaom kaom tuk trun tuk tagok min jaik 10 ribau, yau nan sa phun kroc aik meng 3 tal 4 thun paik baoh pablei hu meng 300 tal 400 ribau”

Jeng tui ralo urang nông daok dalam tỉnh, phun kroc aik oh hu asar pala dak lavik thun dak tabiak rilo baoh. Tuk trun yaom ye meng 8 tal 10 ribau sa kg, yau urak ini hu yaom meng 29 tal 30 ribau đồng sa kg, thun bloh yaom labaih 40 ribau sa kg. Tui yaom yau ini, kein laba di kroc aik oh hu asar oh laih hagait, atau daok glaong jang duk saong dom janih phun hu pasiu karei yau cam sành, kroc bung năm roi. Tal urak ini, kroc aik oh hu asar oh lac pablei laik dalam taneh ia tapa dom darak pasar, dom siêu thị, bodaok lac janih baoh gia vị daok hu dom doanh nghiệp taneh ia langiu pataom blei piah pablei tabiak negar langiu. Dalam nan, HTX ngak nông Thạnh Phước daok di xã Đông Thạnh saong Công ty The Fruit Republic di Hà Lan lac đầu mối blei ralo kroc aik oh hu asar di tỉnh. Ông Nguyễn Văn Chiến- Giám đốc Hợp tác xã ngak nông Thạnh Phước daok di xã Đông Thạnh, huyện Châu Thành brei thau:

“Drei blei abih di urang nông, di xã viên, bloh drei ngak dom mô hình VietGAP, GlobalGA,e urak ini drei pablei ka dom taneh ia yau Trung Đông, bloh châu Âu . Urak ini sa bilan 3 công tai nơ labaih 60 tấn”. 

Taphia bruk pala kroc aik oh hu asar tui tanut chuẩn VietGAP, GlobalGAP, meng jaik 2 thun ini mai, HTX ngak nông Thạnh Phước daok hu cục sở hữu trí tuệ brei harak chứng nhận nhãn hiệu “kroc aik oh hu asar Hậu Giang”. Ini lac dom kadha piah baoh kroc aik oh hu asar di bhum taneh ini dang khang di darak pasar dalam saong langiu taneh ia. Ong Ngô Minh Long- Giám đốc  pasak pachreih nong – pachreih ngư tỉnh brei thau:

“Kroc aik oh hu asar pala di tỉnh Hậu Giang biak siam, takik hu halak halin duk saong dom janih phun pala karei. Anak tal jeng daok daong kỹ thuật piah patagok rilo jang taneh pala barau jeng yau, jeng ye langyah dom bruk kỹ thuật piah phun kroc aik oh hu asar patagok sản lượng, số lượng jang saong chất lượng jeng daok khik kajap piah pablei tabiak dom atneh ia angaok dunya”.

Jeng tui ong Ngô Minh Long: Tui Đề án 1000 di tỉnh ka bruk salih phun pala, janih raong, anak tal tỉnh hu jak ba urang nông salih dom janih phun pala oh hu kein laba piah pala kroc aik oh hu asar tui jalan qui hoạch kayua urak ini darak pasar blei kroc aik oh hu asar biak ralo yaok harei, abih di nyu nan lac dalam bilan pandiak, min kroc aik dalam tỉnh oh ginup pablei./.