Dom thun jaik ini, huyện Nghĩa Hành lac puk palei cakrok phun mbang baoh rilo abih tỉnh Quảng Ngãi, bo bhian lac karei bilan duk saong dom tỉnh karei. Ini lac kein laba camereip dalam bruk ba alamu barau tame ngak nong, ngak jeng pandap kaya nong piah pablei, rik daong patagok jien tame ka urang nong. Anh Vinh urang pambuak bruk di rayo sap ndom VN daok di gah kreh negar brei thau : 

Pasiam bier tạp, pala phun mbang baoh nan lac sa dalam dom jalan ngak di gah ngak nong tinh ba tabiak piah patagok jien mek tame ka urang nong. Thun 2009, Sơ alamu – cong nghe tinh Quang Ngai peih ngak danakdak “ pilih ruah phun akaok tabung saong peih bruk pabam pajaih vo tinh dom phun mbang baoh sau rieng, chom chom, kruac kabung di huyn Nghia Hanh ”. Danakdak hu peih ngak di bein phun mbang baoh di dom xa Hanh Minh, Hanh Nhan, Hanh Dung saong ban sit Cho Chua, huyn Nghia Hanh .

Ong Nguyen Đang Hiep daok di xa Hanh Nhan, huyn Nghia Hanh, sa dalam dom po bein phun chôm chôm hu pilih ruah brei thau : dalam abih tih 40 phun chôm chôm dalam bein pala angaok 10 thun, pasak pachreih ngak nong – pachreih ngak ikan hu pilih ruah 3 phun njauk tanut. Tapa pasang iek, nang suat, chat luong di 3 phun ini dang akaok dalam 40 phun chôm chôm. Yaok thun, abih 3 phun jeng hu năng suất glaong saong tani tanat meng 1 tal 1 tạ 2 . Bruk ini brei mboh lac, phun chôm chôm meda “ dang takai “ di taneh Quảng Ngãi: “ Tuk phun nyu praong paje, nyu dang tagok oh lac taneh hagait, tok daok sit, abih di nyu nan lac tuk phun daok sit. Nghĩa Hành dahlak ndom lac oh taneh halei oh ngak hu, ngak hu atau oh mai meng drei”

Meyah phun chôm chôm dang hu di xã Hành Nhân ye phun Sầu Riêng jeng brei năng suất saong chất lượng glaong angaok bhum taneh di xã Hành Minh, ban sit Chợ Chùa. Bein Sầu Riêng di ông Lam Tan Nghiep pak palei Binh Phu, ban sit Cho Chua pilih ruah hu 7 phun hu nang suat saong chat luong glaong jang. Yaok phun hu meng 40 tal 50 baoh, yaok baoh trak meng 5 tal 6 kg. Bruk praong abih lac Sau rieng tabiak baoh karei vụ saong sau rieng gah meraong yau nan ye, yaom tani tanat, ba  jien tame glaong ka urang nong. Ong Lam Tan Nghiep brei thau : “ Dalam  vụ li –an tabiak baoh karei vụ saong gah meraong, tuk gah meraong abih ye phun drei hu. Di vụ la – ar urang nong drei oh mek tame hu jien halei piah cai bo paik hu, pablei hu ye urang biak  uan tabuan”

Bruk ba alamu barau tame ngak nong pak huyn Nghia Hanh tukvak tapa hu ba mai rilo kein laba, siam lagaih, rik daong praong dalam bruk paglaong năng suất, sản lượng dom janih phun pala. Ini lac jalan salih praong, daong ka urang nong paglaong jien mek tame, patruh kan kathaot, yam tagok ginup meda angaok mblang taneh palei drei. Min, piah pambak praong jalan ngak ini, urang nong njauk hu urang jakar pachreih nông tacei pato alamu saong brei hu daong brei taduan jien mesraiy jien. Ong Lê Quang Tịnh, phaok akaok Uy ban bhapbini huyn Nghia Hanh brei thau : “ ngak habar dom gah alamu di tinh pato pathram ka urang nong saong ngak ka urang nong caga hu pajaih, kayua jien mesraiy ka urang nong peih praong pala drak saong cakrok pala phun mbang baoh”

Dom kein laba tuk camereip dalam bruk cakrok phun mbang baoh di huyn Nghia Hanh peih tabiak jalan nao barau ka urang nong tỉnh Quảng Ngãi dalam bruk salih phun pla, paglaong jien mek tame; rik daong tame bruk peih ngak danakdak pakat negar padang ngak palei pala barau./.

Biên dịch Thúy Linh