Sa doanh nghiệp di huyện Bắc Bình, tỉnh Bình Thuận hu brei tabiak alak vang thanh long 

Ngan haong sang sa-ai Nguyễn Văn Lộc daok di xã Hồng Thái, huyện Bắc Bình, tỉnh Bình Thuận, bein thanh long lac gaok lisei di baoh sang hu 5 urang. Dahlau Tết thun sak kubao 2021, sang sa-ai buh jien blei gom truac hadah piah caong pablei hu yaom di tuk dahlau Tết, min bruk oh rah tabiak yau hatai caong khin: “Meng blaoh truac gom nyu tabiak baoh oh hu rilo, 250 ghang hu jaik 2 tấn min, urang mai blei bayar yaom 5.000 đồng sa ký, kuhria tabiak oh hu hadom”.

Tui Sở Ngak nong saong patagok palei pala tỉnh Bình Thuận, kuhria tal puac bilan 2 thun 2021, dalam tỉnh hu jaik 33.700 ha thanh long, tagok labaih  20.000 ha dut haong thun 2010. Dom thun tapa, taneh pala saong sản lượng thanh long dalam tỉnh oh padeih patagok, ba mai kein laba kinh tế saong paglaong jien mek tame ka urang nong. Min thanh long Bình Thuận hu pablei  angaok darak pasa rilo meng lac baoh that, hu takik pandap panda kaya mbang menyum hu tapa chế biến yau aia ép thanh long, alak vang thanh long, thanh long bluh thu, sấy dẻo… Kayua yau nan ye yaom kaom baoh thanh long tuk trun tuk tagok ngan haong urang nong lac bruk yau bhain randap.

Amuk Lê Phương Chi, akaok Hợp tác xã Dịch vụ – Sản xuất thanh long Hàm Minh 30 brei thau, biak kan khik yaom thanh long tani tanat, kayua yau nan ye bruk ngak tabiak pandap hacih njuak hu kuhria tal meyah caong khin pablei tabiak darak pasa negar langiu: “HTX hu tacei pato mikva jalan ngak yau habar piah tabiak baoh thanh long tuk test mẫu oh hu kandaong labaih jru khik caga phun pala, hu ye pambuak bruk haong công ty mai blei tapak ka mikva. Pagap yau drei khan haong công ty lac bein ini daok ngak tui chuẩn di châu Âu, hadei di nan dahlau di tuk tasak sa adit ye khan brei ka gah công ty thau, trun mai cakak baoh nao test. Test samar rilo  tok dalam sa harei lac thau hu.”

Bahrau ini, sa doanh nghiệp di huyện Bắc Bình, tỉnh Bình Thuận hu brei tabiak rai janih pandap asar thanh long pablei tapa darak pasar Hàn Quốc. Ini lac kadha bui sambai brei ka urang pala thanh long. Ong Trần Văn Liêm – Akaok Công ty TNHH aia ép Phúc Hà (xã Hải Ninh, Bắc Bình) brei thau urak ini, pandap asar thanh long bluh thu di doanh nghiệp hu pablei tapa Hàn Quốc yaom 250 USD/kg: “Piah daong ka mikva urang nong tỉnh Bình Thuận tabiak truh bruk lac tuk pala hu rilo ye laik yaom, dahlak caong khin urang pal akaok dom mban ngành sa tangin haong gauk piah patagok ka thanh long ini.”

  Dalam 2 bilan akaok thun 2021, dom doanh nghiệp dalam tỉnh Bình Thuận pablei tabiak negar langiu tui jalan chính ngạch hu labaih 945 tấn thanh long, samu labaih 1 triệu USD, tagok jaik 40% dut haong tukvak ini thun dahlau. Piah daong ka urang nong sahanag hatai pala, ngak, langiu di bruk patui jalan daong salih bahrau ilamu, pandap panda ngan haong dom doanh nghiệp ngak tabiak dom janih pandap hu pren khang tui Sarak 16 thun 2017 di UBND tỉnh, dom puk palei daok jhul pakhang sarak daong pambuak gauk ngak saong pablei pandap panda kaya nong tui Sarak 86 thun 2019 di HĐND tỉnh. Tui ong Nguyễn Đức Hoà – Phaok akaok UBND tỉnh Bình Thuận, ini lac jalan piah ka dom doanh nghiệp blei, chế biến thanh long dalam tỉnh khang hatai buh jien tame ngak, oh padeih cak rok patagok dom janih pandap panda kaya nong bahrau: “Bruk pala, ngak hu ngak tui chuỗi giá trị khang kajap, hu pandar bruk pablei salih điện tử saong thau hu asal di pandap, gam tui nan lac hu sarak daong piah pablei kaya nong. Dalam nan hu baoh thanh long jeng njauk pablak tame ngak habar piah daong ka urang nong pablei hu kaya nong siam jang.”  

Dom jalan ngak grap tanat darak pasar pablei pandap, bruk tabiak rai di dom janih pandap bahrau hu ngak meng thanh long daok ba mai rilo siam lagaih ka bruk pablei dom kaya nong hu pren khang di tỉnh Bình Thuận. Meng nan daong ka urang pala thanh long sahanag hatai ngak mbang, grap tanat bruk pala, ngak saong yam tagok ngak meda./.

Urang lang: Jasi – 22/03