Po gru Hán Đô - Lac Akaok Hội đồng Halau janeng Cam ahier

Khaol dahlak mai palei Cam Vụ Bổn duah gaok Po gru Hán Đô urang dang akaok Hội đồng Halau janeng Cam ahier tỉnh Ninh Thuận. Ong daok ndom biai tapa phon haong dom urang daok dalam hội đồng piah peih ngak tui Harak ka 5187 harei 28/9/2021 di akaok UBND tỉnh tacei pato ka bruk ngak Katê thun 2021. Ini lac bruk ngak tui adat cambat tanarakun hu peih ngak yaok thun tuk tame akaok bilan 7 saka Cam piah pahadar tal ong kaok ong kei, caong khin palei negar hu sron mbon, angin siam hajan laghaih, pala hagait hu nan, mikva palei pala trei sil.

Katê peih tabiak di bimon kalan, puk palei, baoh sang ngan haong dom adat cambat tanarakun pambuak pagam haong bruk ma-in sambai di bhap bani puk palei. Thun ini kayua jit COVID-19 rah tabiak srau dhau, mbuan njaom mbak tabiak bol bhap rahra kayua yau nan ye dalam tỉnh njauk gauk oh peih ngak dom adat cambat saong dom bruk ilamo, padhih, bruk ma-in sambai di dom bimon kalan, dom labik kakuh yang, puk palei, but pajaih dalam tukvak  mbang Katê (meng harei 4 tal 7-10).

Po gru Hán Đô brei thau dom halau janeng saong mikva Cam thei jeng njauk hatai haong panuac tacei pato di Akaok UBND tỉnh ka bruk oh peih bruk me-in sambai pataom gauk uan Katê 2021. Ngak tui Harak ka 5187, Po gru Hán Đô, Akaok Hội đồng Halau janeng Cam Ahier tỉnh hu mboh tangin brei tabiak Harak pathau khan ka 30, ieu dom Po gru mong iek gah bimon kalan, dom halau janeng, Mban adat cambat dom palei saong taong abih mikva Cam Ahier njauk ngak siam dom adat hukum di karja ka bruk mbang Katê thun 2021. Njauk  gauk oh peih bruk raok khan ao saong oh peih ngak adat di dom bimon kalan, dom palei, dom but pajaih; oh peih ngak dom bruk daoh tamia, ma-in padhih, ma-in sambai. Dom baoh sang peih ngak adat mbang  Katê min oh daa tuai atau gauk hatian, talei pajaih. Gam haong nan ngak njauk tui 5 paka di Mintri Y tế piah khik siam pren yava ka rup babhap, daong jhul kadlul likuk jit dịch COVID-19 dalam tỉnh.

Tuk hu sua tangi ka ilamu di urang dang akaok Cam Ahier tỉnh Ninh Thuận dalam bruk pacang caga jit COVID-19, Po gru Hán Đô brei thau ong biak caik hatai tui iek bruk jit ruak  dalam negar saong angaok dunya, tapa dom harak báo, tivi. Abih di nyu lac  samar thau jalan ba di Tỉnh ủy saong tacei pato di UBND tỉnh ka bruk pacang caga jit COVID-19 dalam tỉnh. Tapa nan, Hội đồng Halau jeng Cam Ahier hu dom harak khan brei ka dom halau janeng saong mikva Cam ahier thau piah padeih ngak dom bruk  pataom rilo manuac yau: tame sang bahrau, ndam lakhah, ngak kut, adat cambat ngak yang ngak bhang di bimon kalan. Meng nan, bhap bani Cam dalam tỉnh oh ka hu urang halei njaom mbak COVID-19 meng dom bruk ngak di agama. Hội đồng Halau janeng jak ba mikva dom palei Cam tui jalan “daong ba gauk” klah rabha dom kan kandah haong mikva daok di dom labik njauk pacang veik dalam tỉnh saong rik daong jien ndo pacang caga jit COVID-19.

Po gru Hán Đô daok brei thau lac, ong saong dom halau janeng, mikva Cam dalam tỉnh hu mboh yaom lac jit COVID-19 dui atah min rai diuk kinh tế - xã hội dalam tỉnh jeng khik tani tanat, mbaok meta puk palei bahrau bhum urang Cam dak harei dak hadah hadai.

Jalan ngak di Đảng saong hukum di Karja hu sangka, hu daong palaghaih ka mikva Cam bac megru, duah jalan ngak mbang, pablei salih, peih ngak adat camat tanarakun. Abih di nyu lac tapa bruk pacang caga jit COVID-19 brei mboh Đảng, Karja ieu pataom abih pren khang piah pataom tame klauk vắc xin, taong ruak ka bhap bani, daong brei pandap mbang menyum ka dom labik njauk pacang veik, daong  jien ka urang ngak njauk lahik bruk ngak, grap tanat rai diuk bhap bani. Lac Akaok Hội đồng Halau janeng Cam ahier, Po gru Hán Đô daok jak ba mikva Cam gul pataom gauk, ba tangin tame haong pakat ủy, karja palei kham merat jhul kadhul likuk jit COVID-19 di puk palei./.

Urang lang: Jasi – 10/10