Umo labaih 30 thun, bác sĩ Trần Khánh Thu, Akaok khoa Dinh dưỡng, sang iek ruak Đa khoa tỉnh Thái Bình nan lac urang ranaih abih hu pok brei Giải thưởng urang kamei thun 2015. Caong khin jeng bác sĩ meng tuk daok sit kayua pambak meng hatai ranam bruk ngak di ong ngoại saong urang amaik, meng dom harei daok bac pakat phổ thông, sa-ai Trần Khánh Thu kham merat abih drei piah pakacah tame sang bac Đại học Y Thái Bình. Bac tamat bloh, sa-ai hu pilih ruah nao ngak bruk pak Sang iek ruak Đa khoa tỉnh Thái Bình meng thun 2008. Hatai caong khin hu jeng biak, sa-ai Khánh Thu tuk halei jeng kham merat bac megru ngak siam abih bruk hu jao brei. Akaok thun 2014, Sang iek ruak padang Khoa Dinh dưỡng, sa-ai hu pok ngak trưởng khoa. Anak dom kan kandah ka bruk dinh dưỡng ka urang ruak, sa-ai haong urang jakar dalam khoa tuk halei jeng gul pataom gauk, kham merat, ngak siam bruk duh ka jaik 2000 suất mbang yaok harei; peih bruk brei saoh dom suất mbang ka urang ruak kathaot. Taphia di nan, meng hatung hatai di urang ranaih, sa-ai tuk halei jeng ba akaok nao dahlau dalam dom bruk ngak pahla saong ta-eng sa-ai jeng hu 30 mbang halar hatian brei darah. Sa-ai Trần Khánh Thu khan lac: Dom bruk ngak pahla biak hu yaom glaong, khaol dahlak meda ba ilamu chuyên môn di drei saong meda mai jaik haong mikva. Ralo mikva tuk khaol dahlak mai jeng khan lac, lac oh ka hu mbang halei nao iek ruak pak sang iek ruak tỉnh. Daok bruk brei darah ye kol dahlak mboh tapa dom melam trực atau cấp cứu urang ruak ye darah piah cấp cứu urang ruak biak takik biak kurang. Dahlak hu brei darah daong ka ralo urang kamei ndih tapui. Ini lac bruk ngak biak hu yaom glaong, hu bhap bani pok meyaom. 

Giải thưởng Urang kamei Việt Nam oh lac pok meyaom dom urang hu ralo rik daong ka bhap bani bo daok brei ka dom kapul nyaom hu ralo jalan ngak bahrau hu kein laba ka đơn vị saong rahra. Pagap yau kapul urang jakar, urang dalam Kapul Urang kamei di Hội sở Gilang pariak bol bala. Dalam 22 jalan ngak bahrau ka bruk patagok tukvak 2010-2015, 70% nan lac di urang kamei; hu daong ka gilang pariak patak pataom hu jaik 15 tỷ đồng jien pah urang tư vấn negar langiu. Pagap yau dom sáng kiến: Pabak, pasiam quy chế ngak bruk di quản trị rủi ro; bruk dut iek rủi ro, pathau khan bruk pasang iek, hệ thống thông tin khik iek… saong tham mưu ka Gilang pariak ba tabiak dom sản phẩm dịch vụ brei ka urang kamei yau: “Patak pataom ka anek”, dom danak dak daong brei mesraiy ka urang kumei kathaot: tacei pato brei saoh jalan ngak mbang pablei salih ka jaik 2 ribau urang kamei; daong oh mek jien jhung thun akaok mereip ka 455 dự án di urang kamei, ralo meng lac gah ngak nong palei pala. Sa-ai Nguyễn Thị Cẩm Phượng, Phaok akaok Kapul urang kamei Hội sở Gilang pariak bol bala brei thau: hu jak jeng yau nan meng hu dom bruk ngak di Kapul urang kamei hu pambuak pagam adei sa-ai dalam jabat: Labaih 60% adei sa-ai lac urang kamei, hu Kapul piah sinh hoạt gam daong ba gauk dalam bruk ngak gam klah rabha haong gauk dalam rai diuk . Meng bruk Ban chấp hành ba tabiak bruk ngak njauk haong tukvak saong hatai caong khin di adei sa-ai ye bruk sangka pachreih tui meda glaong jang. Ngan haong adei sa-ai daok ranaih ye gilang pariak hu sarak patagok ilamu, bruk ngak piah daong ka adei sa-ai hu thau ralo jang piah pasiam rai diuk saong bruk ngak di drei.

Nan lac tok 2 dalam 9 kapul nyaom saong 10 menuac urang hu pok brei  Giải thưởng urang kamei Việt Nam thun ini. Yaok urang, yaok bruk hu dom jak jeng, dom rik daong karei di gauk min dom sa-ai jeng lac dom kareih camin di hatai kham merat oh padeih, yam tapa dom kan kandah dalam rai diuk piah ngak bruk, jeng dom urang kamei thành đạt saong daong ka ralo urang karei tapa truh kathaot, hu rai diuk trei sil, tani tanat. Amuk Nguyễn Thị Minh Hương, Akaok ban Tuyên giáo Trung ương Kapul urang kamei Việt Nam brei thau: Urang kamei Việt Nam daok pamaong tal rilo bruk. Brei mboh prong di abih nan lac bruk rik daong dalam gah chuyên môn di dom urang nan saong hu mbaok tame dom bruk jhul patagok bruk tiến bộ di urang kamei, dom bruk ngak brei likei kumei hu samu gauk. Ngan haong dom kapul nyaom ye brei hu urang kamei meng 60% tagok, dom kapul nyaom yau công an, bol bala jeng njauk hu meng 40% urang kamei tagok. Tuk hội đồng giải thưởng pilih ruah, khaol dahlak jeng dut iek dom kapul nyaom saongmenuac urang piah palih tabiak.

Meng thun 2003 tal thun 2015, Giải thưởng Urang kamei Việt Nam hu pok brei 55 kapul nyaom saong 104 urang kamei naih gheih di taong abih gah dalam rai diuk. Giải thưởng Urang kamei VN oh lac piah pok meyaom dom urang kamei Việt Nam kham merat yam tapa kan kandah dalam rai diuk, dalam bruk ngak bo daok lac bruk pachreih ba piah ka dom sa-ai kham merat brei ka baoh sang di drei saong abih di nyu nan lac brei ka bruk cak rok patagok di rahra. Dom sa-ai njauk lac dom kareih camin brei mboh labik dang saong dom rik daong prong di urang kamei dalam xã hội bahrau harei ini./.