Urak ini Bình Dương hu padang talei pambuak bruk dua gah haong 10 tỉnh, ban negar langiu

Tui pathau khan oh ka ginup abih, meng akaok thun tal harei 15.11.2021, tỉnh Bình Dương pachreih hu jaik 2,069 tỉ USD phun jien negar langiu buh tame ngak mbang tapak (rilo jang 14,9% bruk ba tabiak di thun). Dalam nan hu 64 danak dak bahrau, 24 danak dak ramik veik brei tagok phun jien, 161 danak dak rik daong phun jien. Kuhria tal harei ini,  tỉnh Bình Dương hu 4.011 danak dak hu phun jien negar langiu tut angan abih tih lac 37 tỉ USD.

Yaom lac gaok rilo kan kandah kayua jit ruak Covid-19, min abih tih pandap panda ngak tabiak dalam tỉnh (GRDP) di Bình Dương dalam 6 bilan akaok thun 2021 jeng mek hu tanut patagok 7,23%. 10 bilan akaok thun 2021, jien mek tame meng bruk pablei tabiak negar langiu di tỉnh hu labaih 26,4 tỷ USD, yaom jien blei pandap tame meng negar langiu jaik 21,4 tỷ USD, tui nan jeng daok labaih hu 5 tỷ USD. 

Hu siam mekre yau nan dak brei mboh dom sarak dalam peih prong talei pambuak bruk dua saong rilo gah bo tỉnh hu peih ngak dalam dom thun jaik di ini. Urak ini Bình Dương hu padang talei pambuak bruk dua gah haong 10 tỉnh, ban negar langiu; lac thành viên chính thức, lac gah pambuak bruk njauk caik hatai jia di Diễn đàn Cộng đồng thông minh Dunya (ICF), Kapul nyaom pasak pablei salih dunya (WTCA), Diễn đàn Pambuak bruk kinh tế châu Á (Horasis). 

Lac tỉnh hu manuac njauk Covid-19 glaong tok hadei di TPHCM saong brei daok pa-atah di gauk lavik harei min meng jhul khang bruk klauk jru (oh kuhria urang thường trú atau tạm trú), samar peih ngak iek bruk brei daok karei F0 di sang, taong ruak F0 di labik nan ye Bình Dương hu manuac metai dalam dom urang njauk ruak biak biar; Tỉnh daok hu padang balai y tế nao mai dalam dom labik ngak kong saong brei quyền ka dom doanh nghiệp dalam bruk diukra salamat lagaih haong jit ruak piah peih veik pambang sang mac, labik ngak pandap, hu daong ka tỉnh Bình Dương khik hu tanut cak rok patagok biak siam, pakhang hatai jia di urang buh jien tame ngak mbang. Dahlau di tuk jit Covid-19 tamuh tabiak, Bình Dương lac tỉnh hu peih bruk taom gaok doanh nghiệp yaok bilan piah ka urang pan akaok Tỉnh ủy - UBND tỉnh gam haong dom gah caik hatai tui pang, duah thau, nao gam haong peih talaih kan kandah ka urang buh jien tame ngak mbang. Pak dalam vaktu jit ruak jeng daok rah tabiak khang, Bình Dương jeng peih nyaom biai online ka bruk buh jien tame ngak mbang haong dom doanh nghiệp Hàn Quốc – sa dalam dom negar hu phun jien buh tame ngak mbang dang akaok dalam tỉnh jeng lac điểm cộng dalam meta urang buh jien tame ngak mbang.        

Bruk sambar drah diuk rai lagaih haong jit ruak, pasiam veik bruk ngak mbang di doanh nghiệp saong rai diuk bhap bani brei mboh pren ranaih di sa tỉnh ngak kong. Tapa jit prong mbang ini meda daong ka Bình Dương hu rilo jang ilamu piah pacang caga haong dom jit ruak dreh yau nan meda rah tabiak, peih ngak hu siam dua bruk haong gauk lac pacang caga jit ruak saong cak rok patagok kinh tế./.

Urang lang: Jasi – 29/12