Amuk Hồ Thị Đoa daok di palei Đông Bắc, xã Đại Trạch, huyện Bố Trạch, tỉnh Quảng Bình khan lac: sang kan kandah, amaik ame lahik avar nan ye amuk daok raong ba 3 urang adei prong jeng manuac jeng urang. Dom urang adei patui gauk nao tok diuk tok pasang, daok sa drei amuk daok dalam baoh sang taik tahak, hajan mai ye pasah abih. Bahrau ini, amuk Đoa hu karja daong 30 triệu đồng, blaoh amuk nao njim mesre pabak tame piah padang ngak sang. Amuk Hồ Thị Đoa brei thau:Sang kan kandah nan ye karja daong ka amuk hu sa baoh sang khang kajap, oh daok huac hajan angin.

 Ong Nguyễn Ngọc Thụ, Phaok akaok UB bhap bani huyện Quảng Ninh, tỉnh Quảng Bình brei thau: dahlau diah, baoh sang kathaot dalam huyện hu labaih 30% min urak ini trun daok ala 10%. Dom thun tapa, huyện Quảng Ninh hu ralo sarak sangka tal urang kathaot tui ralo jalan ngak yau: tacei pato ilkamu kỹ thuật, daong brei phun pajaih, anek pajaih, athur raong; tacei jalan ka mikva patagok kinh tế piah tabiak truh kan kathaot: Urang kathaot urak ini hu tabiak truh kan kathaot. Khaol dahlak tacei pato gilang pariak sarak karja palaghaih ka urang mesre jien ngak mbang patagok kinh tế.         

Peih bruk jak ba “Harei brei ka urang kathaot”, dalam 15 thun tapa, tỉnh Quảng Bình jak ba ralo gah hu labaih 280 tỷ đồng daong brei urang kathaot. Meng kadung jien ini, tỉnh Quảng Bình hu pambuak bruk haong karja paei padang ngak bahrau saong pasiam veik labaih 13 ribau baoh sang gul pataom alin brei ka sang kathaot. Yaok pluh ribau baoh sang kathaot karei hu daong limo binai, patagok bruk ngak mbang. Tui ong Phạm Xuân Bình, Akaok Sở Lao động, Thương binh và Xã hội tỉnh Quảng Bình, langiu di bruk daong padang ngak sang daok ka urang kathaot, tỉnh daok hu pambuak bruk haong gilang pariak sarak karja palagaih ka yaok rituh mbang baoh sang kathaot mesre phun jien piah ngak mbang pablei salih: Ralo janih meng bruk daong brei mesre piah ngak mbang pablei salih, daong ngak sang daok, daong ka anek kamuan bac megru, daong brei bảo hiểm y tế.. Dom urang kathaot di Quảng Bình jeng mboh hu bruk sangka di Đảng saong Karja, nan ye kham merat yam tagok. Dut haong dahau diah, bruk pagam pambak tame Karja daok takik nao. Jalan ngak di tỉnh nan lac brei “gai vah” oh brei “drei ikan”. Nan ye ngak jeng pren khang yam tagok di dom urang kathaot saong dom baoh sang kathaot./.