Tui ong Lê Trí Thanh, akaok UB bhap bani tỉnh Quảng Nam, tỉnh hu ba tabiak jalan ngak cambaih laih, anak meta meda brei palih ruah tuai meng Hàn Quốc mai padeih padei di Labik padeih padei Hoiana, di huyện Duy Xuyên saong Tui Blue Nam Hội An, di huyện Núi Thành, tapa mblang kapal haok Chu Lai, meng dom mbang par dunya tapak tui mbang (charter), tukvak daok veik meng 5 tal 10 harei.

Tapa pasang iek, Tổng cục Rivang ma-in Việt Nam taong yaom Quảng Nam lac labik pabak hu dom kadha ka jalan mbak nao mai, y tế, labik padeih padei rivang ma-in… piah peih ngak iek. Dalam nan, mblang kapal haok Chu Lai lac sa dalam lime pabah mbang negar pakat dunya tame Việt Nam saong ginup kadha piah pabak dom janih pandap duh ka bruk taduan raok dom mbang par dunya. Urak ini tỉnh Quảng Nam hu rilo labik rivang ma-in tapen tasik, dalam nan, 2 labik padeih padei hu palih ruah piah peih ngak iek lac Labik padeih padei Hoiana saong Tui Blue Nam Hội An hu ginup dom kadha piah taduan raok tuai dunya saong daok di labik atah labik daok di bhap bani, biak mbuan lagaih ka bruk pacang caga jit Covid -19.

Tui ong Mai Văn Mười, Akaok Sở Y tế tỉnh Quảng Nam, dalam tukvak ngak iek, bruk khik siam mekre dalam pacang cakak jit ruak Covid-19 hu ba tagok dang kaok; gah y tế tỉnh hu kuhria caga blaoh jalan ngak meyah hu manuac urang dương tính.

  “Meyah hu urang dương tính, meyah dut iek mbang ka dua atau mbang ka klau meng mboh dương tính khaol dahlak jeng hu jalan langyah siam bruk ini, nan ye oh huac kanda hagait bruk sa atau dua harei hu urang dương tính. Anak tal khaol dahlak brei pasang iek taong abih dom labik rivang ma-in ini saong ba tabiak sa jalan ngak cambaih laih, meyah oh khik hu siam mekre salamat bruk pacang caga jit ruak, khaol dahlak pok panuac ieu UB bhap bani tỉnh brei padeih chip.”  
Tui Sở Y tế tỉnh Quảng Nam, meng 8.400 mbang vắc xin bahrau hu ba brei, Quảng Nam brei klauk dahlau ka dom labik gaok tapak tal cak rok patagok bruk rivang ma-in, langiu di dom urang hu brei kluak vac-xin dahlau, lac dom urang hu mbaok tapak tame bruk pacang cakak jit. Urak ini, dom labik rivang ma-in hu mbaok tame mbang ngak iek ini, lac Hoiana saong Tui Blue Nam Hội An hu daong ka Quảng Nam 2 baoh mac dut iek PCR, saong sanya kluak vac-xin ka taong abih urang daok ngak bruk pak ini.

Ong Nguyễn Phú Khánh, Phaok Akaok Khik iek Tui Blue Nam Hội An brei thau, hu ba tabiak dom jalan khik caga gah y tế, parabha dom labik taduan raok karei, urang ngak hu pathram bruk ngak ngak y tế... hu caga dom jalan ngak piah taduan raok kapul nyaom tuai damuai dunya gilac veik.
  “Tui Blue Nam Hội An hu kuhria caga blaoh dom jalan ngak khik kajap siam mekre saong hu brei harak chứng nhận khik hu siam mekre tuk peih ngak dalam tukvak hu jit. Jeng meda hu dom kan kandah saong Tui Blue daok ngak abih drei piah ngak brei dom cuang kandah nan jeng siam laghaih, meng nan peih tabiak jalan ba bruk ngak ka urang ngak dalam khách sạn jeng yau bhap bani daok di labik ini.”

Bruk ngak iek taduan raok tuai dunya gilac veik oh lac tok hu makna ka ta-eng tỉnh Quảng Nam bo daok hu makna prong ka gah rivang ma-in Việt Nam. Hadei di mbang ngak iek ini, meda hu rilo jang dom labik rivang ma-in karei tra saong peih prong dom darak pasar dunya karei. Ong Lê Trí Thanh, Akaok UB bhap bani tỉnh Quảng Nam brei thau, ini jeng lac bruk ngak cambaih laih di abih piah ngak hu 2 bruk haong gauk di Raja-ei, lac gam pacang caga jit, gam pasiam veik saong patagok kinh tế dalam vaktuk siam mekre bahrau.  

  “Gah Quảng Nam, meyah ngak siam bruk dalam tukvak ngak iek ini, Quảng Nam meda padang hu thaot binguk, labik dang saong angan je, meng nan meda tut angan peih ngak rilo asal kadha karei pakat negar, taduan raok dom danak dak, nyaom biai prong di dunya hu peih tabiak di Việt Nam, taduan raok tuai damuai mai padeih padei rilo jang tuk mai tal Việt Nam saong Quảng Nam.”

Hadei di jaik 2 thun “kareik pabah mbang” pacang caga jit Covid-19, tui kuhria, bilan 7 anak tal, tỉnh Quảng Nam meda lac labik akaok meti taduan raok tuai dunya gilac veik Việt Nam rivang ma-in./.

Urang lang: JaSi - 28/4/2021